ހަމާސް އާއި އިޒްރޭލް އާ ދެމެދު މެދުވެރިއެއްގެ ދައުރު އަދާކުރުން ގަތަރުން މެދުކަނޑާލައިފި ކަމަށް އެ ގައުމުން އިއުލާން ކޮށްފިއެވެ. 

ގަތަރުން މިކަން އިއުލާނު ކުރިއިރު އިސްރާއީލާއި ހަމާސްއާ ދެމެދު ހަނގުރާމަ ހުއްޓާލުމުގެ އެއްބަސްވުމަކަށް އާދެވޭނެކަމުގެ އުންމީދު ވަނީ ވަރަށް ބޮޑަށް ކުޑަވެފައެވެ.

ޤަތަރުން ބުނެފައިވަނީ ޣައްޒާގައި ހިނގަމުންދާ ހަނގުރާމަ ނިންމުމަށް ހަމާސް އާއި އިސްރާއީލުން އެކަށީގެންވާ ޝައުގުވެރިކަމެއް ނުދޭތީ، އެ ދެފަރާތުގެ މެދުގައި ގަތަރުން އަދާ ކުރަމުން އައި މެދުވެރިއެއްގެ ރޯލު މެދުކަނޑާލީ ކަމަށެވެ. 

ހޮނިހިރު ދުވަހު އެކްސް (ޓްވިޓަރ) ގައި ޤަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ ވިދާޅުވެފައިވަނީ މިކަން ކަމާބެހޭ ފަރާތްތަކަށް 10 ދުވަސް ކުރިން އަންގާފައިވާނެ ކަމަށެވެ.

ޑިޕްލޮމެޓިކް މަސްދަރަކާ ހަވާލާދީ އެސޯސިއޭޓެޑް ޕްރެސްއިން ހޮނިހިރު ދުވަހުގެ ކުރިން ރިޕޯޓުކޮށްފައި ވަނީ ޤަތަރުގައި ހުރި ހަމާސްގެ ސިޔާސީ އޮފީހުގެ "ބޭނުން ނުހިފޭ" ކަމަށެވެ. 

ނަމަވެސް އަލް އަންސާރީ ވިދާޅުވީ ދޯހާގައި ހުރި ހަމާސްގެ ސިޔާސީ އޮފީހާ ބެހޭގޮތުން ނެރެފައިވާ މީޑިއާ ރިޕޯޓުތަކަކީ ސައްހަ ނޫން ރިޕޯޓުތަކެއް ކަމަށެވެ. އެ ގޮތުން "ޤަތަރުގައި ހުރި އޮފީހުގެ މައިގަނޑު މަޤްޞަދަކީ ކަމާބެހޭ ފަރާތްތަކުގެ މެދުގައި މުވާސަލާތުކުރުމުގެ ވަސީލަތެއްގެ ގޮތުގައި" ކަމަށް އޭނާ ވިދާޅުވިއެވެ. 

ހަމާސްގެ އިސް އޮފިޝަލެއް ބުނެފައިވަނީ ޤަތަރުން މެދުވެރިއެއްގެ ރޯލު އަދާކުރުން މެދުކަނޑާލާފައިވާކަން ހަމާސް އަށް އެނގޭ ކަމަށާއި ނަމަވެސް "ގަތަރު ދޫކޮށް ދިއުމަށް އެއްވެސް ފަރާތަކުން އަންގާފައި ނުވާ" ކަމަށެވެ.

ގަތަރުން މެދުވެރިއެއްގެ ދައުރު އަދާކުރުން މެދުކަނޑާޅި ކަމަށް ބުނިއިރު، ވޮޝިންގްޓަންގައި ހުރި އެމެރިކާގެ އޮފިޝަލެއް ބުނެފައިވަނީ ބައިޑެންގެ ސަރުކާރުން މީގެ ދެ ހަފްތާ ކުރިން ޤަތަރަށް އަންގާފައިވަނީ ދޯހާގައި ހުރި ހަމާސްގެ އޮފީހުގެ މަސައްކަތް މިހާރު ބޭނުންތެރި ނޫން ކަމަށާއި ހަމާސްގެ ވަފުދު އެތަނުން ނެރެންވާނެ ކަމަށެވެ.

"ރަހީނުން ދޫކޮށްލުމަށް ހުށަހަޅާފައިވާ ގިނަ ހުށަހެޅުންތަކެއް ބަލައިނުގަތުމަށްފަހު، [ހަމާސްގެ] ލީޑަރުންނަށް އެމެރިކާގެ އެކުވެރި ގައުމެއްގެ ވެރިރަށުގައި މަރުހަބާ ކިޔައިގެން ނުވާނެ،" ނަން ހާމަ ނުކުރުމަށް ޝަރުތުކޮށް އަލް ޖަޒީރާ އަށް މައުލޫމާތު ދިން އެމެރިކާގެ އިސް އޮފިޝަލަކު ބުނެފައިވެއެވެ. 

ޣައްޒާގައި އިސްރާއީލާއި ހަމާސްއާ ދެމެދު ހިނގަމުންދާ ހަނގުރާމަ އާއި، ލުބުނާންގައި އިސްރާއީލާއި ހިޒްބުﷲ އާ ދެމެދު ހިނގަމުންދާ ހަނގުރާމަ ނިމުމަކަށް އަންނާނެކަމުގެ އެއްވެސް ނިޝާނެއް ނުފެނެއެވެ.