އުތުރު އިންޑިއާގެ އުއްތަރު ޕްރަދޭޝްގެ ޖާންސީ ސިޓީގައި ހުރި ހޮސްޕިޓަލެއްގައި ހިނގި އަލިފާނުގެ ހާދިސާއެއްގައި މަދުވެގެން 10 ތުއްތުކުދީން މަރުގެ، އިތުރު 16 ކުދިން ޒަޚަމަވެއްޖެއެވެ.

ޑިސްޓްރިކްޓް މެޖިސްޓްރޭޓް (ޑީއެމް) އަވިނާޝް ކުމާރު ވިދާޅުވި ގޮތުގައި އަލިފާން ރޯވެފައިވަނީ މަހާރާނީ ލަކްޝްމީ ބާއީ މެޑިކަލް ކޮލެޖުގެ ނިއޯނޭޓަލް އިންޓެންސިވް ކެއަރ ޔުނިޓް (އެންއައިސީޔޫ) ގައި ހުކުރު ދުވަހުގެ ރޭ 10:45 ހާއިރުއެވެ. އަދި އަލިފާން ރޯވި ވޯޑުގައި އެވަގުތު 55 ކުދީން ފަރުވާ ހޯދަމުން ދިޔަ ކަމަށާއި، އޭގެތެރެއިން 45 ކުދިން ސަލާމަތްކުރެވި، އެކުދީންނަށް މިހާރު ދަނީ މެޑިކަލް ފަރުވާ ދެމުން ކަމަށް އޭނާ ވިދާޅުވިއެވެ.

މައުލޫމާތު ލިބޭ ގޮތުގައި ހާދިސާ ހިނގާފައިވަނީ އޮކްސިޖަން ކޮންސެންޓްރޭޓަރުގެ އެތެރޭގައި ޝޯޓް ސަރކިޓެއް ވުމުންނެވެ. އަދި ހޮސްޕިޓަލުގެ ފަޔަރ އެލާމް ސިސްޓަމްތައް މަސައްކަތް ނުކުރާ ކަމަށްވެސް ބައެއް ފަރާތްތަކުން ބުނެއެވެ.

ފުލުހުންގެ އޮފިޝަލަކާ ހަވާލާދީ އިންޑިއާގެ އެންޑީޓީވީ އިން ބުނިގޮތުގައި، މަރުވި 10 ކުދިންގެ ތެރެއިން 7 ކުދިން ވަނީ ދެނެގަނެވިފައެވެ. އަދި ބާކީ 3 ކުދިން ދެނެގަތުމަށް ބޭނުންވެއްޖެނަމަ ޑީއެންއޭ ޓެސްޓް ހަދާނެ ކަމަށްވެސް އެ އޮފިޝަލާ ހަވާލާދީ އެންޑީޓީވީން ބުނެފައިވެއެވެ.

ހާދިސާއާ ގުޅިގެން އުއްތަރު ޕްރަދޭޝް ސްޓޭޓުގެ ޑެޕިއުޓީ ޗީފް މިނިސްޓަރ ބްރަޖޭޝް ޕަތަކް ވަނީ ހޮނިހިރު ދުވަހު އެ ހޮސްޕިޓަލަށް ޒިޔާރަތްކުރައްވައި، ހާދިސާގައި ގެއްލުންވި އާއިލާތަކާ ބައްދަލުކުރައްވާފައެވެ. އޭނާ ވަނީ ހާދިސާގައި ގެއްލުން ލިބުނު އާއިލާތަކަށް ސަރުކާރުގެ އެހީތެރިކަން ފޯރުކޮށްދޭނެ ކަމަށާއި، މައްސަލަ ރަނގަޅަށް ތަހުޤީޤުކުރައްވާނެ ކަމަށް ވަޢުދުވެވަޑައިގެންފައެވެ.

"މި ހިތާމަވެރި ހާދިސާއަށް ޒިންމާވާންޖެހޭ ފަރާތްތައް އަޅުގަނޑުމެން ދެނެގަނެ، ހަރުކަށި ފިޔަވަޅު އަޅާނަން. މި އުނދަގޫ ދަނޑިވަޅުގައި ސަރުކާރުން މިތިބީ އާއިލާތަކާ އެކުގަ،" އަލިފާނުގެ ހާދިސާގައި ގެއްލުން ލިބުނު އާއިލާތަކާ ބައްދަލުކުރައްވާ ޑެޕިއުޓީ ޗީފް މިނިސްޓަރ ޕަތަކް ވިދާޅުވިއެވެ.

ސިއްހީ ދާއިރާގެ ޒިންމާވެސް އަދާކުރައްވާ ޕަތަކް ވިދާޅުވި ގޮތުގައި ލަކްޝްމީ ބާއީ މެޑިކަލް ކޮލެޖުގެ އަލިފާނުގެ ރައްކާތެރިކަމުގެ އޮޑިޓެއް މިދިޔަ ފެބްރުއަރީ މަހު ހެދިފައިވާ ކަމަށާއި، ޖޫން މަހު އަލިފާނުގެ ހާދިސާއަކަށް ތައްޔާރުވުމުގެ ގޮތުން މޮކް ޑްރިލްއެއް ވެސް ވަނީ ހަދާފައެވެ.

"މިކަން ހިނގީ ކިހިނެއް އަދި ކީއްވެގެންކަން އަޅުގަނޑުމެންނަށް ބުނެވޭނީ ތަޙުޤީޤު ރިޕޯޓު ލިބުމުން،" ޕަތަކް ވިދާޅުވިއެވެ.

އަލިފާނުގެ ހާދިސާއާ ގުޅިގެން ތިން ފަންތިއެއްގައި ތަޙުޤީޤު ކުރިއަށްދާނެ ކަމަށް އޭނާ ވިދާޅުވިއެވެ. އެއީ ޞިއްޙީ ދާއިރާއިންނާއި، ފުލުހުންނާއި، އަދި މެޖިސްޓްރޭޓްގެ ތަހުގީގެވެ.

މީގެއިތުރުން، ޗީފް މިނިސްޓަރ ޔޯގީ އަދިތްޔަނާތު ވަނީ ހާދިސާގައި މަރުވި ކުދިންގެ އާއިލާތަކަށް 5 ލައްކަ ރުޕީސް އަދި ހާދިސާގައި ބޮޑަށް ގެއްލުންވި ފަރާތްތަކަށް، 50،000 ރުޕީސް ދެއްވާނެކަމަށް ވިދާޅުވެފައެވެ.

އިންޑިޔާގެ ރައީސް ދްރައުޕަދީ މުރުމު އަދި ބޮޑުވަޒީރު ނަރެންދްރަ މޯދީ ވެސް ވަނީ މި ހާދިސާގައި މަރުވި ކުދިންގެ އާއިލާތަކަށް ތައުޒިޔާ ވިދާޅުވެފައެވެ.

އުއްތަރު ޕްރަދޭޝްގެ ސަރުކާރާ އިދިކޮޅު ފަރާތްތަކުން ވަނީ ހޮސްޕިޓަލް ހިންގުމުގައި އިހުމާލުވެފައިވާ ކަމަށް ތުހުމަތުކޮށްފައެވެ. އިދިކޮޅު ސަމާޖްވާދީ ޕާޓީގެ އިސްވެރިޔާ އަކިލޭޝް ޔާދަވް ވަނީ މިކަމަށް ޒިންމާވާންޖެހޭ ފަރާތްތަކާ މެދު ފިޔަވަޅު އެޅުމަށް ހަރުކަށި އިބާރާތުން ގޮވާލައްވާފައެވެ.