އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުމަކީ ތިން ބާރު ވަކިވެފައިވާ ނިޒާމް ހަލާކުކޮށްލުން ކަމަށާއި މިއީ ރައީސް ޑރ.މުހައްމަދު މުއިއްޒު ދެއްވާ އިންޒާރެއް ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވެއްޖެއެވެ.
އޭނާ އެފަދައިން ވިދާޅުވީ އަންގާރަ ދުވަހު އެންޓ-ިކޮރަޕްޝަން ކޮމިޝަނުގެ ޤާނޫނަށް ސަރުކާރުން ގެންނަ އިސްލާހުގެ ބިލުގެ އިބްތިދާއީ ބަހުސް މަރުހަލާގައި ވާހަކަދައްކަވަމުންނެވެ. ސަރުކާރުގެ ފަރާތުން އެންޓި-ކޮރަޕްޝަން ކޮމިޝަންގެ ޤާނޫނަށް އިސްލާހު ގެނައުމުގެ ބިލު މަޖިލީހަށް ހުށަހެޅުއްވީ ފެލިދޫ ދާއިރާގެ މެންބަރު އާދަމް ޒާހިރުއެވެ.
މަޖިލީހުގައި ވާހަކަދައްކަވަމުން، އިސްލާހު އެ ބަސްވެސް އެ ބިލަށް ބޭނުންކުރުން ރަނގަޅު ނޫން ކަމަށް މީކާއިލް ވަނީ ވިދާޅުވެފައެވެ. އިސްލާހަކީ ކުރިއަށް އެޅޭ ފިޔަވަޅެއް ކަމަށާއި އެއީ ރަނގަޅަކަށް ގެނެވޭ ބަދަލަކަށް ކިޔާ ނަމެއް ކަަމަށް މީކާއިލް ވަނީ ވިދާޅުވެފައެވެ. އެހެންނަމަވެސް މި އިސްލާހާއި އެކު ފެނިގެން ދަނީ އެތައް ބަޔަކު އެތައް ޒަމާނެއްވަންދެން ކުރި ބުރަ މަސައްކަތުން ހޯދާފައިވާ ތިން ބާރު ވަކިވެފައިވާ ނިޒާމެއް ހަލާކުކޮށްލާ މަންޒަރުކަމަށް މީކާއިލް ވަނީ ވިދާޅުވެފައެވެ.
އިސްލާހެކޭ ކިޔަން ހެޔޮވެސް ނުވާނެ. އިއްޒަތްތެރި ރައީސް، ރާއްޖޭގެ ގިނަ ޕާޓީ ހިމެނޭ ނިޒާމެއް އުފައްދަން އުޅުނީމަ ވެސް ބަޔަކު މީހުން އެކަމާއި ދެކޮޅަށް ނުކުތް. ދެން ފެނުނީ އެ ޕާޓީ އެއް އުފައްދައިގެން ޕާޓީގެ ތެރެއިން އެބަޔަކު ވެސް ކުރިމަތިލީތަން. މި މަޖިލީހުގަ ވެސް އޭގެ ތެރެއިން މެމްބަރުން ތިބުން އެކަށީގެންވޭ. 18 އަހަރުން މަތީގެ ޒުވާނުންނަށް ވޯޓުލުމުގެ ހައްގު ދޭން އުޅުނީމަ އެކަމާއި ދެކޮޅަށް ވެސް ބަޔަކު ނުކުތް. ނަމަވެސް މިއަދު ތިމަންނާމެންނަކީ ޒުވާނުންގެ ޕާޓީ އޭ، ޔޫތް ސިޓީގެ އިސް މީހުންނޭ ބުނެ ކެމްޕެއިނޭ ބުނެ ކެމްޕެއިން ކުރަނީ ވެސް އެ ދުވަހު 18 އަހަރުން މަތީގެ މީހުން ވޯޓުލާނެ ވަރުގެ ބުއްދިއެއް ނެތް ކަމަށް ވާހަކަ ފެތުރި މީހުން.ގަލޮޅު އުތުރު ދާއިރާގެ މެމްބަރު މީކާއިލް އަހުމަދު ނަސީމް
މީކާއިލް ވަނީ މިހާރު އޭސީސީގެ ރައީސްއަކަށް ހުންނަ މީހަކު ހައްލާލަން މަސައްކަތް ކުރާ މަންޒަރު ފެންނަކަމަށް ސިފަކުރައްވާފައެވެ. އަދި އެ މަޤާމުގައި ހުންނަ މީހަކަށް ރިޝްވަތު ހުށަހަޅާ، އެ މީހަކަށް ރެހެންދި ފްލެޓް ދިން ޒަމާނަށް ރުޖޫއަވާން މަސައްކަތް ކުރަނީތޯ އޭނާ ސުވާލު އުފެއްދެވިއެވެ. އޭސީސީގެ ޒިންމާ އަދާ ނުކުރާ ކަމަށް ޤަބޫލުކުރައްވާ ކަަމަށް ފާހަގަކުރައްވާ މީކާއިލް ވަނީ އެމްޑީޕީގެ ސަރުކާރުގައި ވެސް އެކަން ފާހަގަކުރެވުނު ކަމަށް އޭނާ ވިދާޅުވިއެވެ. އެމްޑީޕީގެ ސަރުކާރުގައި އޭސީސީގެ ބަޔާނަކުން މަޝްރޫޢޫތައް ނުފެށެނީސް ހުއްޓުވި ކަމަށް އޭނާ ވިދާޅުވިއެވެ. ނަމަވެސް އޭސީސީގެ މެމްބަރުންނަށް ހުރަހަކަށް ވާން އެމްޑީޕީން މަސައްކަތްކޮށްފައި ނުވާނެ ކަމަށް އޭނާ ވިދާޅުވިއެވެ.
ސަބަބަކީ އެމްޑީޕީ އަށް ދިމާވާ ދަތިކަމަކަށް ވުރެ މިނިވަން މުއައްސަސާ އެއް އޭގެ ގޮތުގައި މަސައްކަތްކުރުން މުހިންމުކަމަށް އެ ޕާޓީން ޤަބޫލުކުރާތީ ކަމަށް ވެސް އޭނާ ވިދާޅުވިއެވެ. އޭސީސީ އަށް ދިމާވާ ދަތިކަންތައްތައް ހައްލުކުރެވޭނީ ރައީސް އައްޔަންކުރާ ބަޔަކު އެތާ ތިބެެގެން ކަމަށް ޤަބޫލުކުރަން ޖެހޭ ސަބަބެއް ނެތް ކަމަށް އޭނާ ވިދާޅުވިއެވެ.
ރައީސް އައްޔަންކުރެއްވީމަ ވަކި ހިކުމަތެއް، ޚާއްސަކަމެއް ލިބެނީތޯއޭ. މަޖިލީހުގަ ވެސް ތިބީ ރައްޔިތުން އިންތިޚާބު ކުރާ މީހުން. މެމްބަރުން. ރައީސްގެ މެމްބަރުންތަކެއް ތިބެ ރައީސްގެ ވަކާލާތު ކުރި ޒަމާނެއް ދިޔަ. އެކަންކަން ބަދަލުވެގެން ސީދާ ރަައްޔިތުންނަށް ބާރު ދިނީ ކޮންމެވެސް ސަބަބަކާ ހުރެ. އަޅުގަނޑު ލަދުގަނޭ 90އިގެ އަހަރުތަކުގައި މަޖިލީހަށް ހުށަހެޅޭ ފަދަ ކަމެއް 20 ވަނަ މަޖިލީހަށް ހުށަހަޅާތީ ވެސް. މިއީ ހަމަ ލަދުވެތިކަމެއް. މިއީ ހަމައެކަނި ބިލެއް ނޫން. މިއީ ސިގްނަލެއް. އޭސީސީ އަށް ވެސް އެހެން މުއައްސަސާތަކަށް ވެސް މުއިއްޒު ފޮނުވާ. މިއީ ތިމަންނާ ބޭނުންވާ ގޮތަށް އަމަލު ނުކުރާނަމަ ކަނޑާލާނެ ކަމުގެ އިންޒާރެއް. ކުރިން ވެސް ޕީޕީއެމް އިން ޑިމޮކްރަސީ އާއި ބީރައްޓެހި މިފަދަ ބޯދާ ކަންކަން ހުށަހެޅުއްވި.ގަލޮޅު އުތުރު ދާއިރާގެ މެމްބަރު މީކާއިލް އަހުމަދު ނަސީމް
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން ސަރުކާރުން ވަނީ ހުށަހަޅާފައެވެ.
