ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ރައްްޔިތުންނަށް ފައިދާހުރި އެއްވެސް މަސައްކަތެއް ނުކުރާ ކަމަށް ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ހޯމަ ދުވަހު ލާމަރުކަޒީ ނިޒާމުގެ ބާރު ކެނޑޭގޮތަށް މިސަރުކާރުން އަމަލުކުރަމުންދާތީ ލޯކަލް ގަވަރމަންޓް މިނިސްޓަރު އާދަމް ޝަރީފްއާ ބައްދަލުކުރުމަށް އެމްޑީޕީގެ މެންބަރުން އެ މިނިސްޓްރީއަށް ދިޔަ ނަމަވެސް މިނިސްޓަރު ވަނީ ބައްދަލު ކުރުމަށް ދެކޮޅު ހައްދަވާފައެވެ. އެކަމުގެ ކަންބޮޑުވުންތައް ހިއްސާކޮށް މެންބަރު ސަމީރު ވިދާޅުވީ އާބަން ޑިވެލޮޕްމަންޓް ގާނޫނާއެކު ލާމަރުކަޒީ ގާނޫނުގެ ބާރު ކެނޑިގެންދާ ކަމަށާއި، މިއީ ކަންބޮޑުވާ މައްސަލައެއް ކަމަށެވެ.
މެންބަރު ސަމީރު ވިދާޅުވީ ގާނޫނުތަކުގެ ބާރު ކެނޑޭގޮތަށް ސަރުކާރުން އަމަލުކުރަމުންދަނީ ރައްޔިތުންނަށް ހަދަމުންދާ ދޮގުތަކާއި، އޮޅުވާލުންތައް އިތުރު ކުރުމަށް ކަމަށެވެ. އަދި މިގޮތަށް އަމަލު ކުރުމުން ގާނޫނުގެ ތެރެއިން މިކަންކަން ސިއްރުކަން ބޮޑު ގޮތެއްގައި ކުރުމުގެ ފުރުސަތު ފަހިވާ ކަމަށް މެންބަރު ސަމީރު ވިދާޅުވިއެވެ.
މި ބިލުގެ 10 ވަނަ މާއްދާގައި މިއޮންނަނީ ވަރަށް ސާފު އިބާރާތުން އާބަން ސަރަހައްދުތަކުގެ އިހުތިސާސް ކަނޑައެޅުން. އެހެން ގާނޫނުގައި އެހެން ގޮތަކަށް ބަޔާންކޮށްފައިވީ ނަމަވެސް މިގާނޫނުގެ ދަށުން އާބަން ސަރަހައްދުގެ ގޮތުގައި ކަނޑައެޅާނެ ވަކި ސަރަހައްދަކީ ލޯކަލް ކައުންސިލްގެ އިހުތިސާސްގެ ތެރޭގައި ހިމެނޭ ސަރަހައްދެއްކަމަށް ވީ ނަމަވެސް އެސަހައްދެއްގެ ޕްލޭން ކުރުމާއި، ތަރައްގީ ކުރުމުގައި އަމަލުކުރާނެ މި ގާނޫނުގައި ބަޔާންކުރާ ގޮތުގެ މަތީންނެވެ. މި ބިލްގައި މިބުނާ ގޮތަށް ގާނޫނު ފާސްވެޖެއްނަމަ މިހާރު އަމަލުކުރަމުންދާ ލާމަރުކަޒީ ގާނޫނުގެ ބާރު އެބަ ކެނޑިގެންދޭ. މީގައި އެބައޮވޭ އެހެން ގާނޫނެއްގެ އެހެން ގޮތަކަށް އޮތް ކަމުގައި ވީ ނަމަވެސް.ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން، (އީސީ) ގެ ރައީސާއި ނައިބު ރައީސް، ރައީސުލްޖުމްހޫރިއްޔާ އައްޔަން ކުރައްވާގޮތަށް ބަދަލުކުރަން ޤާނޫނުތަކަށް ބަދަލު ގެންނަން ސަރުކާރުން ހުށަހަޅާފައިވާތީ އެކަމަށް ވެސް މެންބަރު ސަމީރު ވަނީ ފާޑު ވިދާޅުވެފައެވެ. އަދި ވިދާޅުވީ މިކަންކަމާއި ދެކޮޅަށް ރައްޔިތުން ނުކުންނަން ޖެހޭ ކަމަށެވެ.
މާދަމާ ރައީސް މުއިއްޒު ފޮނުއްވަފާނެ ރައްޔިތުންގެ މަޖިލީހަށް ދިވެހިރާއްޖޭގެ ރައީސުލްޖުމްހޫރިއްޔާ ކަނޑައަޅާނީ ރައީސުލްޖުމްހޫރިއްޔާ މުއިއްޒޭ. އަންނަ ފަސް އަހަރަށް. މިދާ ގޮތަށް ކުރިއަށްދާނަމަ މިއާ ދޭތެރޭގައި ޝައްކު. އަޅުގަނޑުމެންނަށް ހީވާ ގޮތުގައި އަޅުގަނޑުމެން މިހެން މަޑުން ތިބެއްޖެ ކަމަށްވާނަމަ އަޅުގަނޑުމެން މިހާރު މިދަނީ ލާމަރުކަޒީ ގާނޫނު ފުޑިގެން. މާދަމާ ގާނޫނު އާސާސީގައި ވަރަށް ސަރީހަ އިބާރާތުން އެކި މުއައްސަސާތަކުގެ މަސައްކަތްތައް ހަވާލުކޮށްފައި. ރައީސުލްޖުމްހޫރިއްޔާގެ ޒިންމާއެއް ނޫން އެއީ އިލެކްޝަން ކޮމިޝަން ހިންގުމާއި، އިލެކްޝަން ކޮމިޝަން މެންބަރުން އައްޔަން ކުރުމަކީ. ގާނޫނު އަސާސީގައި ވަރަށް ސަރީހަ އިބާރާތުން ކަނޑައެޅިފައި އެބަހުރި މިންތައް މިއީ.ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
މެންބަރު ސަމީރު ވިދާޅުވީ މިސަރުކާރުގެ ސަޕްލިމެންޓްރީ ބަޖެޓާއެކު ވެސް މިސަރުކާރުން ރައްޔިތުންނަށް ފައިދާހުރި އެއްވެސް މަސައްކަތެއް ނުކުރާނެކަން ހާމަވާ ކަމަށެވެ. ތަރައްގީގެ އެއްވެސް މަޝްރޫއެއް ކުރިއަށް ނުގެންދާއިރު، އިގްތިސާދަށް އެއްވެސް ކަހަލަ ކަމެއް ކުރިއެރުމެއް އަންނަ މަންޒަރު ނުފެންނަ ކަމަށް މެންބަރު ސަމީރު ވިދާޅުވިއެވެ.
