ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރުގެ މަކަރުވެރި ސިޔާސަތު ހާމަކުރުމުގެ މަސައްކަތް ކުރަންޖެހޭ ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ސަމީރު ވިދާޅުވީ މިސަރުކާރުން ދަނީ ރައްޔިތުން ހައްގުތަކަށް ހުރަސް އަޅަމުން ކަމަށާއި، ރައްޔިތުން ބޭނުންވާ ކަންކަން ފުއްދައިދިނުމުގައި ފެއިލްވެފައިވާ ކަމަށެވެ.
ފްލެޓާއި ގޯތި މައްސަލާގައި 21 އޮކްޓޯބަރ 2024 ވީ ހޯމަ ދުވަހު ރައްޔިތުންގެ މަޖިލިސް ކައިރީގައި ކުރިއަށް ގެންދިޔަ މުޒާހަރާގެ ބައިވެރިން ވަރަށް ބޮޑަށް ފަހަތަށް ޖައްސާފައިވާތީ އެކަމަށް އިޝާރާތް ކުރައްވައި މެންބަރު ސަމީރު ވިދާޅުވީ ރައްޔިތުންގެ ހައްގުތައް ހޯދުމަށް މަގު މައްޗަށް ނުކުތުމުން ސަރުކާރުގެ ބޭފުޅުން ގަންނަނީ ބިރު ކަމަށާއި، އެދުވަހު ވެސް ފެނިގެންދިޔައީ އެ މަންޒަރު ކަމަށެވެ.
މެންބަރު ސަމީރު ވިދާޅުވީ ކުރީ ސަރުކާރުގައި ޔަގީންކަމާއެކު ދިން ގޯއްޗާއި، ފްލެޓު ރައްޔިތުންނަށް ނުލިބި، މިއަދު ތިބީ ވާނުވާގައި ކަމަށެވެ. މި މައްސަލާގައި ރައްޔިތުން ކުރަމުން ދިޔަ އުންމީދު ވެސް ގެއްލޭ ހިސާބަށް ކަންކަން ގޮސްފައިވާ ކަމަށް މެންބަރު ސަމީރު ވިދާޅުވިއެވެ.
އަޅުގަނޑުމެންނަށް އެބަ އެނގޭ ތެދެއްތޯ މިބޭފުޅުން ރައްޔިތުންގެ ހައްގެއް ރައްޔިތުންނަށް ބޭނުންވާނެ ކަމެއް ފުއްދައިދިނުމަށްޓަކައި މިބޭފުޅުން ގަންނަނީ ބިރު. މިބޭފުޅުން އެއްވެސް ގޮތަކަށް ބޭނުމެއް ނުވޭ އެންމެ ކުޑަވެގެން އަޅުގަނޑުމެން ދަންނަވަމުން މިދަނީ އަޅުގަނޑުމެންގެ ސަރުކާރުގައި ހަފްތާއަކު އެއްފަހަރު އަޅުގަނޑުމެން ވާނީ މާލީ ހިސާބުތައް ރައްޔިތުންނަށް ހާމަކޮށްދީފައޭ. މިބޭފުޅުން ޖޫން މަހުން ފެށިގެން އަޅުގަނޑުމެންނާ ހަމައަށް މިއަދާ ހަމައަށް އަޅުގަނޑުމެންނާ ހަމައަށް އެއްވެސް ހިސާބެއް އާއްމުކޮށްފައިނުވޭ. ދެން ތި ވިދާޅުވީ ފްލެޓާއި ގޯތީގެ ވާހަކަ. އެނގިލައްވާނެ މިހާރު އެންމެފަހުން ފްލެޓުގެ ވަޒީރު މަޖިލީހަށް ވަޑައިގެން އެވިދާޅުވީ މިހިނގާ އޮކްޓޫބަރު ނިމުމުގެ ކުރިން ލިސްޓް ހާމަ ކުރައްވާނަމޭ. އަދި އެއްވެސް ރައްޔިތަކަށް ނޭނގޭ މިއީ ކިހިނެތް ހިނގާ ކަމެއް ކަމެއް. އަދި ލިސްޓް އޮތް ގޮތެއް ވެސް ލިސްޓަށް އަންނަ ބަދަލެއް ލިސްޓަށް ގެންނަން ބޭނުންވާ ބަދަލެއް ވެސް އަޅުގަނޑުމެންގެ އެއްވެސް ރައްޔިތަކަށް ނޭނގޭ.ރައްޔިތުން މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު
މެންބަރު ސަމީރު ވިދާޅުވީ ރައްޔިތުންގެ ހައްގު ކަށަވަރު ކުރުމަށް މަގުމައްޗަށް ނުކުމެ މިހާރަށް ވުރެ ބޮޑަށް އަޑު އުފުލަންޖެހޭ ކަމަށެވެ. އެމްޑީޕީން އަބަދުވެސް ރައްޔިތުންގެ ހައްގުގައި ވަކާލަތު ކުރާނެ ކަމަށާއި، މިސަރުކާރުގެ މަކަރުވެރި ސިޔާސަތު ހާމަކުރުމަށް މަސައްކަތް ކުރަންޖެހޭ ކަމަށެވެ. އަދި ރައްޔިތުން ވެސް މިމަސައްކަތުގައި ބައިވެރިވުމަށް މެންބަރު ސަމީރު ގޮވާލެއްވިއެވެ.
