މި ސަރުކާރުގައި މާލީގެ ކަންކަން އެނގިވަޑައިގަންނަވާ އެއްވެސް ބޭފުޅެއް ނެތް ކަމަށާއި، މިހާތަނަށް މަސައްކަތް ކުރީ ސަރުކާރުގެ ކޮރަޕްޝަންގެ މައްސަލައެއް ހޯދުމަށް ކަމަށް ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ ވިދާޅުވެއްޖެއެވެ.
ފަލަސުރުހީ ޕްރޮގްރާމްގައި ޔައުގޫބް ވިދާޅުވީ މިސަރުކާރުގެ ފުރަތަމަ ފިނޭންސް މިނިސްޓަރު ޑރ މުހައްމަދު ޝަފީގު މަގާމުން ދުރުކޮށްފައިވަނީ ސަރުކާރުން ބޭނުންވާ ގޮތަށް އެބޭފުޅާ އަމަލު ނުކުރުމުގެ ސަބަބުން ކަމަށެވެ. ރާއްޖޭގެ މާލީ ހާލަތު ރަނގަޅު ކުރުމުގެ މަސައްކަތް ކުރުމަށް ޝަފީގަށް މިސަރުކާރުން ޖާގަ ނުދިން ކަމަށާއި، އެބޭފުޅާ ދިން އިރުޝާދާއި، ލަފާގެ ބޭނުން ވެސް ހިފާފައިނުވާ ކަމަށެވެ. އަދި ވިދާޅުވީ މާލީ ކަންކަމާއި ގުޅުވައިގެން ބޭއްވި ނޫސްވެރިންގެ ބައްދަލުވުންތަކުގައި ވެސް ޝަފީގު ވަރަށް ބޮޑަށް އެކަހެރިކޮށްފައިވާ މަންޒަރު ފެނިފައިވާ ކަމަށެވެ.
ޔައުގޫބް ވިދާޅުވީ ރާއްޖޭގެ މާލީ ހާލަތުގެ ވާހަކަ އެންމެ ގަދައަށް ދައްކައި، ގޮތް ކިޔަމުންދަނީ މިހާރުގެ ފިނޭންސް މިނިސްޓަރު މޫސާ ޒަމީރާއި، އެޓަރނީ ޖެނެރަލް އަހުމަދު އުޝާމް ކަމަށެވެ. ނަމަވެސް އެ ދެ ބޭފުޅުންނަކީ މާލީ ދާއިރާ އަދި އެކަމުގެ ފަންނު އެނގިވަޑައިނުގަންނަވާ ދެބޭފުޅުން ކަމަށް އޭނާ ވިދާޅުވިއެވެ. އަދި ވިދާޅުވީ ނޭނގޭކަންކަމުގައި ގޮތް ކިޔައި، އަމަލުކުރުމުގެ ހިތި ނަތީޖާ ގައުމުން ފެންނަމުންދާ ކަމަށެވެ.
މީގެ އިތުރުން ޔައުގޫބް ވިދާޅުވީ މިސަރުކާރުން މިހާތަނަށް މަސައްކަތް ކޮށްފައިވަނީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގެ ބޭފުޅެއްގެ ބޮލުގައި ކޮރަޕްޝަންގެ ތުހުމަތެއް އެޅުވުމަށް ކަމަށާއި، ނަމަވެސް އެ މަސައްކަތް ކާމިޔާބުނުވީ ކަމަށެވެ. އަދި މިހާރު މަސައްކަތް ކުރަމުންދަނީ 2 ބިލިއަން ރުފިޔާ ހިސާބުނުކޮށް އޮތް ކަމަށް ބުނެ، ރައްޔިތުންނަށް ހަގީގަތް އޮޅުވާލުމަށް ކަމަށް އޭނާ ވިދާޅުވިއެވެ.
ފުރަތަމަ ބެލީ ކުރީ ސަރުކާރުގެ އެއްވެސް މީހަކު ވައްކަމެއް ކޮރަޕްޝަނެއް ނާޖާއިޒް ފައިދާއެއް ކަމެއް ކޮށްފައި އޮތްތޯ މިދިޔަ 1 އަހަރުގެ ތެރޭގައި ކުރި މަސައްކަތަކީ އެއީ. ކުރީ ސަރުކާރުގެ އެއްވެސް މީހެއްގެ ބޮލަށް އެއްވެސް ކަމެއް ކެޑޭތޯ. އެކަމެއް ކާމިޔާބެއް ނުވި. އެމީހުންނަށް ސާފުކޮށް އެނގިގެން ދިޔައީ ކުރީ ސަރުކާރަށް ނިސްބަތްވާ އެއްވެސް މީހަކު އެކަހަލަ އެއްވެސް ކަމެއް ނުކުރައްވާކަން. ސާފުކަން އެންމެން ވެސް. އޭގެ ފަހުން ބެލީ ބޭންކް އޮފް މޯލްޑިވްސް ގުޅުވައިގެން އެމްޑީޕީން މާލީ ބަގާވާތެއް ގެންނަން މަސައްކަތް ކުރީއޭ. އެކަން ވެސް ކާމިޔާބު ނުވީމަ މިހާރު މިހެދި އެއްޗަކީ ކުރީ އަހަރުގެ ހިސާބުތަކުގެ ތެރެއިން 2 ބިލިއަން ރުފިޔާ އެބަ އޮތޭ ހިސާބު ނުކޮށް އެހެންވީމަ އެއީ ބޮޑު ހިޔާނާތެކޭ. އެމައްސަލަ ބަލަންޖެހޭނޭ. އެކަމާ ގުޅޭގޮތުން ގާނޫނީ ފިޔަވަޅު އަޅަންޖެހޭ ފަރާތްތަކާމެދު އަޅާނޭ. އެވެސް ހަމަ ބޮޑު އޮޅުވާލުމެއް. އެކައުންޓް ކުރުމާއި، ހިސާބުކިތާބު ބެލެހެއްޓުމާއި، އޮޑިޓް ކުރުމާއި މިކަންކަން ކުރުމަކީ މިބޭފުޅުންނަށް ޚާއްސަކޮށް މިސަރުކާރާއި މިސަރުކާރުގެ ފިނޭންސް މިނިސްޓަރަށް ނޭނގޭކަން ހާމަވާ އަލިގަދަ ދަލީލެއް. އެއްވެސް އަހަރެއްގައި އަހަރު ނިމޭއިރު، އެނިމުނު އަހަރުގެ ހިސާބުތައް އަޕްޑޭޓް ވެފައި ނުހުންނާނެ.ރައްޔިތުން މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ
ޔައުގޫބް ރާއްޖޭގެ މާލީ ހާލަތު ދަށްވެ، ރައްޔިތުންނަށް ދަތިވެގެންދަނީ މިސަރުކާރުގެ ނާގާބިލް ކަމުގެ ސަބަބުން ކަމަށެވެ. މިހާރުގެ ފިނޭންސް މިނިސްޓަރު ޒަމީރަށް އޮޑިޓްގެ އިތުރުން، އެކައުންޓިންގެ އެންޓްރީ، ޑެބިޓް އަދި ކްރެޑިޓް ވަނީ ކޮންއެއްޗެއްކަން ވެސް އެނގިވަޑައިނުގަންނަވާނެ ކަމަށް އޭނާ ވިދާޅުވިއެވެ.
