ދިވެހިރާއްޖެއިން އިންޑިއާގެ ރުޕޭ ކާޑުގެ ޚިދުމަތް ތަޢާރަފުކޮށްފިއެވެ.

ވިސާ، މާސްޓަރކާޑު ފަދައިން ބޭނުންކުރެވޭ، ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) ގެ އުފެއްދުމެއް ކަމުގައިވާ ރުޕޭ ކާޑަކީ އިންޑިއާގައި ފުރަތަމަ ފަހަރަށް ތަޢާރަފުކުރެވުނު މިބާވަތުގެ ގްލޯބަލް ކާޑު ޕޭމަންޓް ނެޓްވޯކެވެ.

މި ކާޑު އިންޑިއާގެ އޭޓީއެމް ތަކާއި، ޕީއޯއެސް މެޝިންތަކާއި އަދި އީ-ކޮމާސް ވެބްސައިޓްތަކުގައި ފުޅާ ދާއިރާއެއްގައި ބޭނުންކުރެވެއެވެ.

އިންޑިއާގެ ގިނަ ބޭންކުތަކާއި މާލީ އިދާރާތަކުގައި އިލެކްޓްރޯނިކް ޕޭމަންޓް ހެދުމަށް މި ކާޑު އަންނަނީ ބޭނުން ކުރަމުންނެވެ.

މި ކާޑު ޚިދުމަތް ތަޢާރަފުކޮށްފައިވަނީ ހޯމަ ދުވަހުގެ މެންދުރުފަހު ބޭއްވުނު ރަސްމިއްޔާތެއްގައެވެ.

މި ރަސްމިއްޔާތު ބޭއްވުނީ އިންޑިއާގެ ބޮޑުވަޒީރު ނަރެންދްރަ މޯދީއާއި ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ދެމެދު ނިއު ދިއްލީގައި ބޭއްވުނު ދެ ފަރާތުގެ މަޝްވަރާތަކަށް ފަހުގައެވެ.

ރުޕޭ ކާޑު ބޭނުންކޮށްގެން ކުރެވުނު ފުރަތަމަ މުޢާމަލާތަކީ އޮތެންޓިކް މޯލްޑިވްސް ފިހާރައިން ކާޑު ބޭނުންކޮށްގެން އެއްޗެއް ގަތުމެކެވެ.

ބީއެމްއެލްއާއި އެންޕީސީއައި ދިވެހިރާއްޖޭގައި ރޫޕޭ ކާޑު ތަޢާރަފުކުރުމަށް މެމޮރަންޑަމް އޮފް އަންޑަސްޓޭންޑިންގއެއް (އެމްއޯޔޫ) ގައި ސޮއިކުރީ 2019 ވަނަ އަހަރުއެވެ.

މި ޚިދުމަތް ތަޢާރަފުކުރުމާއެކު، ބީއެމްއެލްގެ ނެޓްވޯކުގައި ޤަބޫލުކުރާ ކާޑު ސްކީމްތަކުގެ ތެރެއަށް ރޫޕޭ ކާޑު އިތުރުކުރެވިފައިވެއެވެ. މަޝްވަރާތަކަށްފަހު ނެރުނު ޖޮއިންޓް ޕްރެސް ބަޔާނެއްގައި ރައީސް މުޢިއްޒު ވިދާޅުވެފައިވަނީ ރުޕޭ ޚިދުމަތް ތަޢާރަފުކުރުމުން މާލީ ޚިދުމަތްތަކަށް ވާސިލުވުމުގެ ފުރުސަތު އިތުރުވެގެންދާނެ ކަމަށެވެ.

ބޮޑުވަޒީރު މޯދީ ވިދާޅުވެފައިވަނީ އިންޑިއާއާއި ދިވެހިރާއްޖެ ޔުނިފައިޑް ޕޭމަންޓްސް އިންޓަފޭސް (ޔޫޕީއައި) އާ ގުޅިގެންދާނެ ކަމަށެވެ. ޔޫޕީއައި އަކީ އިންޑިއާގެ އިންސްޓަންޓް ޕޭމަންޓް ނިޒާމެއް ކަމަށާއި، މި ނިޒާމުން ބޭންކުތަކުގެ މެދުގައި އަދި ފަރުދުންނާއި ވިޔަފާރިތަކުގެ މެދުގައި މުޢާމަލާތްތައް ކުރުމަށް މަގުފަހިކޮށްދޭ ކަމަށް އޭނާ ވިދާޅުވިއެވެ.

ދިވެހިރާއްޖެ އާއި އިންޑިއާ ވަނީ އޯގަސްޓް މަހު އިންޑިއާގެ ޚާރިޖީ ވަޒީރު ޑރ. އެސް. ޖައިޝަންކަރު މާލެއަށް ކުރެއްވި ދަތުރުފުޅުގައި، ރާއްޖެއަށް ޔޫޕީއައި ނިޒާމު ތަޢާރަފުކުރުމާ ގުޅޭގޮތުން އެމްއޯޔޫއެއްގައި ސޮއިކޮށްފައެވެ.