އިޒްރޭލުގެ ހަމަލާގައި ހިޒްބުﷲ ގެ ލީޑަރު ހަސަން ނަސްރުﷲ އަވަހާރަކޮށްލައިފި ކަމަށް ހިޒްބުﷲ އިން ކަށަވަރު ކޮށްދީފިއެވެ.
ލުބުނާނުގެ ހިޒްބުﷲ އިން ހޮނިހިރު ދުވަހު ބުނެފައިވަނީ އެ ޖަމާޢަތުގެ ލީޑަރު ހަސަން ނަސްރުއްލާ އަވަހާރަވެއްޖެ ކަމަށާއި، އިޒްރޭލާ ދެކޮޅަށް ކުރަމުންދާ ހަނގުރާމަ ކުރިއަށް ގެންދާނެކަމަށް ވައުދުވާކަމަށެވެ.
ހުކުރު ދުވަހުގެ ރޭ ބެއިރޫތުގެ މީހުން ގިނަ ސަރަޙައްދަކަށް ބޮންއަޅާ ދިން ވަރުގަދަ ހަމަލާގައި ހިޒްބުﷲގެ ލީޑަރު ޙަސަން ނަޞްރުﷲ އަވަހާރަކޮށްލައިފި ކަމަށް އިޒްރޭލުގެ އަސްކަރިއްޔާއިން ކުރިން ވަނީ ބުނެފައެވެ.
އިޒްރޭލުގެ ސިފައިންގެ ބަޔާނުގައި ނަސްރުﷲ އާއެކު ހިޒްބުﷲ ގެ އެހެން އިސްވެރިއެއް ކަމަށްވާ ޢަލީ ކަރަކީ އާއި އެހެން ކޮމާންޑަރުންތަކެއްވެސް އަވަހާރަކޮށްލާފައިވާ ކަމަށް ބުނެފައިވެއެވެ.
ހޮނިހިރު ދުވަހުގެ ހެނދުނާ ހަމައަށްވެސް ލުބުނާނުގެ އެކި ސަރަޙައްދުތަކަށް އިޒްރޭލުން ވައިގެ ހަމަލާތައް އަންނަނީ ދެމުންނެވެ.
އިޒްރޭލުގެ ހަމަލާތައް ނުރައްކާވެފައިވުމާއެކު އެތައް ހާސް މީހުން ގެދޮރު ދޫކޮށް އެ ސަރަހައްދުން ދަނީ ނުކުންނަމުންނެވެ.
