މަތީ ތައުލީމު ހާސިލު ކުރަމުންދާ ދަރިވަރުންނަށް މިނިސްޓްރީން ދޫކުރަންޖެހޭ ފައިސާ ދޫކުރުން ލަސްވަނީ ލިއެކިއުންތައް ފުރިހަމަނުވުން ފަދަ ސަބަބުތަކާހުރެކަމަށް މިނިސްޓަރ އޮފް ހަޔަރ އެޑިޔުކޭޝަން ލޭބަރ އެންޑް ސްކިލްސް ޑިވެލޮޕްމަންޓް ޑރ. މަރިޔަމް މާރިޔާ ވިދާޅުވެއްޖެއެވެ.
އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ، ލޯނާއި ޑިގްރީގެ ފައިސާ ދޫކުރުން ލަސްވުމުގައި ސަބަބުތަކެއް ހިމެނޭ ކަމަށެވެ.
އެގޮތުން ބަލާއިރު، ލިއެކިއުންތައް ފުރިހަމައަށް ހުށަހަޅާފައި ނުވުމާއި، ލޯނު ދޭން އިއުލާނު ކޮށްފައިވާ ޤައުމު ނޫން ޤައުމަކަށް ދާން އެދުމުން ދިމާވާ އިދާރީ ދަތިތަކާއި، ޔުނިވާސިޓީތަކުން ލިބެންޖެހޭ ބައެއް ލިއުންތައް ނުލިބުން ފަދަ ކަންކަން އޭގެ ތެރޭގައި ހިމެނޭ ކަމަށް މިނިސްޓަރ ވިދާޅުވިއެވެ.
އަދި އެފަދަ ޙާލަތްތަކުގައި ދަރިވަރުންނަށް ފައިސާ ދޫކުރުމާ ގުޅޭގޮތުން މިނިސްޓްރީން އަމަލު ކުރާ ވަކި ގޮތްތަކެއް ހުންނަކަންވެސް މިނިސްޓަރ ފާހަގަ ކުރެއްވިއެވެ.
އެހެންނަމަވެސް ކުރިން ސަރުކާރުން ވަނީ ފައިސާ ދޫކުރުން ލަސްވަނީ ޑޮލަރުގެ ތާށިކަމާހުރެކަމަށް ބުނެފައެވެ. އަދި މިހާރު އަލަށް ކިޔަވަމުންދާ ދަރިވަރުންނަށްވެސް ފައިސާ ލިބުން ވަނީ އެތައް ގުނައެއް ލަސްވެފައެވެ.
އެކަމާ ގުޅޭގޮތުން ސުވާލު ކުރުމުން މިނިސްޓަރ ވިދާޅުވީ، ޑޮލަރުގެ ތާށިކަމެއް ދަރިވަރުންގެ ތައުލީމަށް މިވަގުތު ކުރިމަތިވެފައި ނެތް ކަމަށާއި، މާލީ ވުޒާރާއިންވެސް ދަރިވަރުންނަށް ޚާއްސަ އިސްކަމެއް ދޭ ކަމަށެވެ.
މިނިސްޓްރީގެ މަސައްކަތްތައްވެސް ލަސްވަނީ އެކަށީގެންވާ "ސިސްޓަމެއް" ޤާއިމު ކުރެވިފައި ނެތުމުންކަމަށް މިނިސްޓަރ ވިދާޅުވިއެވެ.
ބޭރުގައި ކިޔަވަން ތިބި ދަރިވަރުންނަށް ޑޮލަރު ލިބުން ދަތިވެ ގިނަ ބަޔަކު ތަކްލީފުތަކާ ކުރިމަތިލާން ޖެހިފައިވާއިރު، ރާއްޖެއިން ބޭރުގައި ސްކޮލަރޝިޕްގައި ގޮސް ތިބި ކުދިން އަތުގައި ލާރިއެއް ނެތްކަމަށާއި، ލިބެންޖެހޭ ސްޓައިޕެންޑް (އެލަވަންސް) ލިބުން ނުހަނު ލަސްވާކަމަށް އެތައް ދަރިވަރުންގެ އާއިލާތަކުން ވަނީ ފާހަގަކޮށްފައެވެ.
އަދި އާއިލާއާ ދުރުގައި ރާއްޖޭން ބޭރުގައި އެކުދިން ދިރިއުޅެމުންދާއިރު، އެކުދިން ދުވަހުން ދުވަހަށް ކުރަން ޖެހޭ ހަރަދުތައް ވެސް ނުކުރެވި، އެކި ފަރާތްތަކުގެ އެހީތެރިކަމަށް އެދި ސަލާން ޖަހަން ޖެހޭ ހާލަތަށް ބައެއް ކުދިންނާއި އެކުދިންގެ އާއިލާ ގޮސްފައިވާކަމަށް ބައެއް އާއިލާތަކުން ވަނީ ބުނެފައެވެ.
