އެޑިއުކޭޗަން މިނިސްޓްރީން ފެށި ކޫލް ސްކޫލް ޕްރޮޖެކްޓަކީ ނަމުގައި ސަރުކާރުގެ ޕްރޮޖެކްޓެއް ކަމަށާއި، އެކަމަށް ހަރަދުކުރަން ޖެހެނީ ކައުންސިލާއި ބެލެނިވެރިންނާއި ޖަމިއްޔާ ޖަމާއަތްތަކުން ކަމަށް އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވިދާޅުވެއްޖެއެވެ.

ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން އެޑިއުކޭޝަން މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި އެމްޑީޕީގެ ތައުލީމާއި ބެހޭ ކޮމިޓީގެ މުގައްރިރު މުހައްމަދު އިހުސާން ވިދާޅުވީ ތައުލީމީ ދާއިރާގައި ހުރި މަސައްސަލަތަކަށް ޖުމްލަ ހައްލެއް ހޯދުމަށް މަސައްކަތް ކުރުމުގެ ބަދަލުގައި ސްކޫލްތަކުގެ އިންފްރާސްޓްރަކްޗަރގެ ކަންކަމުގައި މި ސަރުކާރުގައި މިސްރާބެއް އަމާޒެއް ނެތް ކަމަށެވެ. އިހުސާން ވިދާޅުވީ ވަރަށް ފަހުން ކޫލް ސްކޫލް ޕްރޮޖެކްޓެއްގެ ވާހަކަ މި ސަރުކާރުން ދެއްކި ކަމަށެވެ.

އިހުސާން ވިދާޅުވީ ކްލާސްރޫމްތައް އޭސީ ކުރުމުގެ ޕްރޮޖެކްޓް ފެށީ މާފުށީގައި ކަމަށާއި، މާފުށީގައި އޮތް ރަސްމިއްޔާތުގެ ހުރިހާ ކަމެއް ހަޖެއްސީ މާފުށީ ކައުންސިލުން ކަމަށެވެ. އަދި ސްކޫލް އޭސީ ކުރުމުގެ ހުރިހާ ހަރަދެއްވެސް ކުރީ މާފުށީ ކައުންސިލުން ކަމަށާއި، އެ ޕްރޮޖެކްޓަކީ ވެސް އެ ކައުންސިލްގެ ޕްރޮޖެކްޓެއް ކަމަށެވެ.

ނަމަވެސް ޕްރޮޖެކްޓް ފެށުމުގެ ރަސްމިއްޔާތަށް ވަޑައިގެން އެޑިއުކޭޝަން މިނިސްޓަރ ޑރ. އިސްމާއިލް ޝަފީއު ވިދާޅުވެފައިވަނީ އެއީ ސަރުކާރުގެ ކޫލް ސްކޫލް ޕްރޮޖެކްޓް ފައްޓަވައިދެއްވީ ކަމަށް މިނިސްޓަރު ވިދާޅުވި ކަމަށެވެ. އިހުސާން ވިދާޅުވީ އެ ޕްރޮޖެކްޓް ހިނގަމުންދާ ގޮތަށް ބަލާއިރު އެއްގޮތަކަށް ވެސް އުސޫލެއް މިނިސްޓްރީގައި ނެތް ކަމަށެވެ.

އިހުސާން ވިދާޅުވީ މައުލޫމާތު ލިބުނުގޮތުގައި ކައުންސިލަކުން ރަށެއްގެ ހުރިހާ ކްލާސްރޫމްތަކެއް އޭސީ ކުރުމުގެ މަސައްކަތް ކުރުމަށްޓަކައި އެޑިއުކޭޝަންއަށް ހުށަހެޅުމުން، އެޑިއުކޭޝަނުން ބުނެފައިވަނީ ކައުންސިލުން އޭސީ ކޮށްފައި އަދި އެކަންކަން ދެމެހެއްޓެނިވި ގޮތެއްގެ ޕްލޭނަކާއެކީގައި ވަޑައިގަތުމަށް ކަމަށެވެ. އިހުސާން ވިދާޅުވީ މިކަމުން އެނގިގެންދަނީ މިނިސްޓްރީގައި ވެސް އެކަހަލަ ޕްލޭނެއް ނެތް ކަމެވެ.

މި ޕްރޮޖެކްޓުގެ ސަބަބުން ނުރަނގަޅު ވާދަވެރިކަމެއް ސްކޫލްތަކުގެ ތެރޭގައި އުފެދިއްޖެ ކަމަށް އިހުސާން ވިދާޅުވިއެވެ. އިހުސާން ވިދާޅުވީ ވާދަވެރިކަމުގެ ސަބަބުން އެކަމުގެ ތަކުލީފު އުފުލަންޖެހޭނީ ބެލެނިވެރިންނާއި، އަމިއްލަ ޖަމިއްޔާ ޖަމާއަތްތައް ކަމަށެވެ. އިހުސާން ވިދާޅުވީ ރަށެއްގެ ސްކޫލެއް އޭސީ ކުރާ ހިސާބުން ސައިކޮލޮޖިކަލީ ޖެހިގެން އޮންނަ ރަށުގެ ބެލެނިވެރިންނަށް ވެސް އެ ޕްރެޝަރު އަންނާނެ ކަމަށެވެ.

އިހުސާން ވިދާޅުވީ ސްކޫލްތައް އޭސީ ކުރެވެންޖެހޭ ކަމަށެވެ. ނަމަވެސް އެކަމަށް އިންތިޒާމަތަކެއް ރޭވި އެކަން ކުރެވެންވާނީ ދެމެހެއްޓެނެވި ރަނގަޅު އިންތިޒާމްތަކެއްގެ ދަށުން ކަމަށެވެ. އަދި އެކަން ކުރަންވާނީ ބެލެނިވެރިންނާއި މުޖްތަމައުއިން އެ ބުރަ އުފުލަން ނުޖެހޭ ގޮތަށް ކަމަށެވެ.