ޕޯޗުގަލްގެ ފުޓްބޯޅަ އައިކަން އަދި ސައުދީ އަރަބިއްޔާގެ އަލް ނަސްރު ފުޓުބޯޅަ ކްލަބުގެ ތަރި ކްރިސްޓިއާނޯ ރޮނާލްޑޯގެ ސޯޝަލް މީޑިއާ ޕްލެޓްފޯމްތަކުގެ ޖުމްލަ ފޮލޯވަރުންގެ އަދަދު އެއް ބިލިއަނަށް އަރާ، ތާރީޚުގައިވެސް މި ރެކޯޑް ހާސިލްކުރި ފުރަތަމަ މީހާ ކަމުގައިވެއްޖެއެވެ.

ފުޓްބޯޅައިގެ ތާރީޚުގައި އެންމެ މޮޅު ކުޅުންތެރިންގެ ތެރޭގައި ހިމެނޭ ރޮނާލްޑޯ، އޭނާގެ ސޯޝަލް މީޑިއާ ޕްލެޓްފޯމްތަކުގެ ތެރެއިން އެކްސް (ކުރިން ޓްވިޓަރ)، ޔޫޓިއުބް، ފޭސްބުކް، ޓިކްޓޮކް އަދި އިންސްޓަގްރާމް ގައި ހިމެނޭ ފޮލޯވަރުންނާއެކު ޖުމްލަ 1 ބިލިއަން ފަރާތުން އޭނާގެ ސޯޝަލް މީޑިއާ އެކަައުންޓްތައް ވަނީ ފޮލޯކޮށްފައެވެ.

"ތާރީޚު ލިޔެވިއްޖެ 1 ބިލިއަން ފޮލޯވަރުން. މިއީ ހަމައެކަނި އަދަދެއް ނޫން. މިއީ އަހަރެމެންގެ މެދުގައިވާ ޖޯޝާއި، ފޯރި އާއި، ކުޅިވަރަށް އޮތް ލޯބީީގެ ހެއްކެއް،" އަލް-ނަސްރުގެ ފޯވަރޑް އޭނާގެ އިންސްޓަގްރާމް އަދި އެކްސް އެކައުންޓްގައި ބުނެފައިވެެއެވެ.

ރޮނާލްޑޯ އިތުރަށް ބުނެފައިވަނީ، މަޑޭރާގެ މަގުތަކުން ފެށިގެން ދުނިޔޭގެ އެންމެ ބޮޑެތި ސްޓޭޖްތަކާ ހަމައަށް، އޭނާ އަބަދުވެސް ކުޅެފައިވަނީ އޭނާގެ އާއިލާއަށާއި އޭނާގެ ފޭނުންނަށް ކަމަށާއި، މިހާރު 1 ބިލިއަން މީހުން މިތިބީ އެކުގައި ކަމަށެވެ.

ރޮނާލްޑޯގެ އިންސްޓަގްރާމް އެކައުންޓުގައި އެކެނިވެސް 600 މިލިއަނަށްވުރެ ގިނަ ފޮލޯވަރުން ތިބިކަން ފާހަގަކޮށްލެވެއެވެ. އޭނާއަކީ އެ ޕްލެޓްފޯމްގައި އެންމެ ގިނަ ފޮލޯވަރުން ތިބި ފަރާތްތަކުގެ ތެރެއިން އެކެކެވެ. އަދި ރޮނާލްޑޯގެ އެކްސް އެކައުންޓުގައި ވެސް 113 މިލިއަނަށްވުރެ ގިނަ ފޮލޯވަރުން ތިބެއެވެ.

ސަޢޫދީ ޢަރަބިއްޔާގައި ރޮނާލްޑޯ ހޭދަކުރަމުންދާ ދުވަސްތަކުގެ ތަޖުރިބާތަކުގެ އިތުރުން އޭނާގެ އަމިއްލަ ދިރިއުޅުމުގެ ބައެއް ކަންތައްތައް ވެސް ފޮލޯވަރުންނާ ހިއްސާކުރުމަށްޓަކައި ދާދި ފަހުން އޭނާ ވަނީ ޔޫޓިއުބް ޗެނަލެއް ވެސް ހަދާފައެވެ. މި ޗެނަލް ހެދި ފުރަތަމަ 24 ގަޑީއިރުގެ ތެރޭގައި އެކަނިވެސް 20 މިލިއަނަށްވުރެ ގިނަ މީހުންވަނީ ޗެނަލަށް ސަބްސްކްރައިބް ކޮށްފައެވެ.