ރައީސް ޑރ. މުހައްމަދު މުއިއްޒުއާއި ކުރީގެ ނައިބުރައީސް އަހުމަދު އަދީބު ސިންގަޕޫރުގައި ބައްދަލުކުރެއްވި ކަމަށް ރައީސް އަބްދުﷲ ޔާމީން ކުރެއްވި ތުހުމަތުތައް މަޖިލީހުގެ ރައީސް އަބްދުއްރަހީމް ދޮގުކުރައްވައިފިއެވެ.

ހ. ދޫވެހީގައި ރޭ އޮތް ފްރަންޓް އޮފީސް ޖަލްސާ ގައި ވާހަކަފުޅު ދައްކަވަމުން ޔާމީން ވިދާޅުވީ ސިންގަޕޫރުގައި ރައީސް މުއިއްޒާއި އަހްމަދު އަދީބު ބައްދަލު ކުރެއްވި ކަމަށާ އެކަން އެމަނިކުފާނަށް އެނގިވަޑައިގަންނަވާ ކަމަށެވެ. އަދި އެއީ ސައްތައިން ސައްތަ ތެދު ވާހަކައެއް ކަމަށެވެ.

ރައީސް ޔާމީންގެ ވާހަކަފުޅު ދޮގުކުރައްވާ ރައީސް ޔާމީނަކީ ތަންދޮރު އޮޅުން ނުފިލާ ބޭފުޅެއްކަމަށް ސިފަކުރައްވަމުން އަބްދުއްރަހީމް ވިދާޅުވީ ހައުސިން މިނިސްޓަރުކަމުގައި ޑރ. މުހައްމަދު މުއިއްޒުހުންނެވި އިރު، ރައީސް ޔާމީންގެ ފުރަތަމަ ފަތުރުވެރިކަމާއި ބެހޭ ވަޒީރު އަދި ނައިބްރައީސް އަހުމަދު އަދީބު ކެބިނެޓްގެ ތެރެއިން އެންމެ ރުޅިއަންނަ މީހަކު ނަގާނަމަ އެމީހަކީ މުއިއްޒުކަމަށް އަބްދުއްރަހީމް ވިދާޅުވިއެވެ. އަދި ރައީސް ޔާމީންގެ ސަރުކާރުގައި ކެބިނެޓުގައި ތިއްބެވި ހުރިހާ ބޭފުޅުން އެކަން ގަބޫލުކުރައްވާނެ ކަމަށާއި، އެކަން އިނގޭ ހިސާބުގައި މަސައްކަތް ކުރެއްވި ހުރިހާ ބޭފުޅުންނަށްވެސް އެކަން އެނގިވަޑައިގަންނަވާނެ ކަމަށެވެ.

އަބްދުއްރަހީމް ވިދާޅުވީ މުއިއްޒުއާއި އަދީބާއި އެއްވެސް ގުޅުމެއް ނެތް ކަމަށެވެ. އަދި ގުޅުމެއް އޮތްނަމަ އެމްއެމްޕީއާރުސީގެ ހިޔާނާތުގެ ލިސްޓު އެކިފަހަރުމަތިން 10 - 12 ފަހަރަށް ނެރުނު އިރު އޭގައި 250 މީހުންނާއި 375 މީހުން ތިބި އިރުވެސް ރައީސް މުއިއްޒުގެ ނަންފުޅެއް ނެތް ކަމަށެވެ.

އަބްދުއްރަހީމް ވިދާޅުވީ 2023 ވަނަ އަހަރުގެ ރިޔާސީ އިންތިހާބުގެ ކެމްޕޭން ކުރިއަށްދިޔައިރު، އެވަރުގެ ވާހަކައެއް އޮތްނަމަ އިދިކޮޅުން އެވާހަކަ ދައްކާނެ ކަމަށާއި، އެމަނިކުފާނުގެ އަގުވައްޓާލަންވެސް އެވަރުގެ ވާހަކައެއް ދައްކާފައި ނުވާ ކަމަށެވެ. އަދި ރައީސް ޔާމީންވެސް އެކި ތަންތަނުގައި އެކަމާއި ގުޅޭ ވާހަކަ ދަައްކަވަމުން ގެންދެވި އިރުވެސް މުއިއްޒުގެ ވާހަކަ ނުދައްކަވާ ކަމަށެވެ.

އަބްދުއްރަހީމް ވިދާޅުވީ ރައީސް ޔާމީންގެ ފަރާތްޕުޅުން އަދީބު ހަމަޖައްސާފައިވާތީ އޭނާ މަޖިލީހަށްވެސް ވަޑައިގަންނަވާ ކަމަށާއި، އެހެންކަމުން އަދީބާއި އޮތް ގުޅުމަކީ އެމްއެމްޕީއާރުސީގެ ތެރެއިން އުފެދުނު މައްސަލައެއް ނޫން ކަމަށް އަބްދުއްރަހީމް ވިދާޅުވިއެވެ. އަދި ރައީސް މުއިއްޒުއާއި އެފަދަ ގުޅުމެއްވެސް އަދީބާއި ނެތްކަމަށް އަބްދުއްރަހީމް ވިދާޅުވިއެވެ.