ރައީސް ޑރ މުހައްމަދު މުއިއްޒު ވެރިކަމަށް އައުމަށް ވޯޓު ހޯއްދެވުމަށް ވަޑައިގަތީ ޓެކްސީ ޑްރައިވަރުންގެ އަރިހަށެވެ. އެ ބޭފުޅުންނާއި އެކު ސެލްފީ ނަންގަވާ އެތައް އިރަކު ފޮނި ވާހަކަތައް އެމަނިކުފާނު ވަނީ ޓެކްސީ ޑްރައިވަރުންނާއި ދައްކަވާފައެވެ. ވެރިކަމަށް ރައީސް މުއިއްޒު ގެންނަން ޓެކްސީ ޑްރައިވަރުން އާނބަހީ ކިޔާފައި މަސައްކަތް ކުރީ އެހެންވެގެންނެވެ. އެ އުންމީދުތަކުގެ މަތީގައެވެ.

މިއަދު ކަން ހިނގާގޮތް ނިކަން ދެކެބަލާށެވެ. ޓެކްސީ ޑްރައިވަރުންގެ އަޑު އިއްވަން ޖެހުނީ މުޒާހަރާކޮށް، އެއްވުންތައް ބާއްވާށެވެ. ފިނިކޮޓަރީގައި ތިބި ވެރިންގެ ކަންފަތާއި ހިސާބަށް ޓެކްސީ ޑްރައިވަރުންގެ އަޑު އިވުނީ 72 ގަޑީއިރު ވަންދެން އެކި ގަޑި ގަޑީގައި ޓެކްސީ ޑްރައިވަރުން ކުރި މުޒާހަރާތަކަށް ފަހުގައެވެ. ދެން ޓެކްސީ ޑްރައިވަރުންގެ ވާހަކަ އަޑު ނާހާ ވާން ނެތުމުންނެވެ. އެކަން ނުކޮށް ފަރުޖައްސާލެވެން ނެތުމުންނެވެ.

ޓެކްސީ ޑްރައިވަރުން ބުނާ ގޮތުން ސަރުކާރުން އެ ދާއިރާ އާއި ގުޅުން ހުރި ކަންކަން ނިންމަމުން ދަނީ ދާއިރާގައި ތިބި މީހުންނާއި މަޝްވަރާ ނުކޮށް ދިރާސާކުރުމެއް ނެތިއެވެ. ޓެކްސީ ނުލިބޭ މައްސަލަ ހައްލުކުރުމަށް ކަމަށް ބުނެ މާލެ ސަރަހައްދަށް އިތުރަށް ޓެކްސީ ގެނައުމަކީ ޓެކްސީ ޑްރައިވަރުން އެއް ގޮތަކަށް ވެސް ރުހޭ ކަމެއް ނޫނެވެ. އެކަމުގެ ސަބަބުން އަމިއްލަ މީހުންގެ ވިޔަފާރިތަކަށް ގެއްލުން ވުމުގެ އިތުރުން ދެމެހެއްޓެނެވި ގޮތެއްގައި ޓެކްސީގެ ޚިދުމަތް ދިނުމަށް ވެސް ދަތިވާނެ ކަަމަށް ޓެކްސީ ޑްރައިވަރުން އައީ ބުނަމުންނެވެ.

ޓެކްސީ ޑްރައިވަރުންގެ ސުވާލަކަށް ވީ ސަރުކާރުން ވީ ވައުދާއި ޚިލާފަށް ޕާރކް ކުރާނެ ޖާގައެއް ނުދައްކާ އާއްމުންނަށް ތަކުލީފަކަށް ވާގޮތަށް އުޅަނދުތައް ޓޯވކުރަންމުންދަނީ ކީއްވެގެންތޯއެވެ؟ ދައުލަތުން ޚަރަދުތަކެއް ކޮށްގެން ޓެކްސީތަކެއް ގެނައުމަކީ އަމިއްލަ އެޖެންޑާ އެއް ނޫންތޯ ސުވާލު ކުރިއެވެ. އަދި މިއީ ޓެކްސީ ޑްރައިވަރުންނާއި ދެކޮޅަށް ސަރުކާރުން އުފެއްދި މައްސަލަތަކެއް ކަމަށް ތުހުމަތުކުރިއެވެ.

ދެން ކަންކަން ވެގެން ދިޔަގޮތަކީ ޓްރާންސްޕޯޓް މިނިސްޓަރާއި ޓެކްސީ ޑްރައިވަރުންނާއި ބައްދަލުވުމުން އެމަނިކުފާނުގެ ރާގު މުޅިން ބަދަލުކުރެއްވީއެވެ.

ޓެކްސީ ލައިނެއްގެ ހިދުމަތް ފަށަންވެގެން ސަރުކާރުން އެކަން އިޢުލާންކުރެއްވީ "މާލެ ފަހި ޕްރޮގްރާމް"ގައެވެ. ނަމަވެސް އެކަމާއި މެދު ޓެކްސީ ޑްރައިވަރުން ނުރުހުން ވުމުން މިނިސްޓަރ ވިދާޅުވަނީ ހޯހޯ އެއީ ނޫސްވެރިން ދައްކާ ދޮގު ވާހަކަ ކަމަށެވެ. މަނިކުފާނެވެ. ތިޔަ ކަހަލަ ސަމާސާ ނުކުރައްވާށެވެ. އެހެނީ ސަރުކާރުން މާސިންގާ ރަސްމިއްޔާތު ބާއްވާފައި ނެރުނު މާލެ ފަހި ޕްރޮގްރާމަކީ ކުރަން ފެންނަ ކަންކަމުގެ ގޮތުގައި ރައީސަށް ލަފާ އަރުވާ ކަންކަން ކަމަށް ޚުދު މަނިކުފާނު ވަނީ ވިދާޅުވެފައެވެ. އެހެންވީމަ ޓެކްސީ ޑްރައިވަރުންނާއި މަޝްވަރާނުކޮށް މިހިސާބަށް ވަޑައިގެން މަސްރަޙު ހޫނުވީމަ، ދެން އެކަމުން ރެކިވަޑައިގަންނަވަން ތިޔަ ގޯސްކުރައްވަނީ ނޫސްވެރިން ނޫންތޯއެވެ؟