ހޮނިހިރު ދުވަހުގެ ރޭ ކަމަދޫގެ ޢީދު ހަރަކާތްތައް ފެށުނީ ސަޤާފީ ހަރަކާތްތަކާއި އެކު އެ ރަށުގައި ޢީދު ހަރަކާތްތައް ބާއްވަން ތައްޔާރުކޮށްފައިވާ ޢީދު ސްޓޭޖް ހުޅުވުމުގެ ރަސްމިއްޔާތާއި އެކުގައެވެ. ރަށުގެ ކުދި ބޮޑު އެންމެންހެން އެކުވެގެން ކުރިއަށް ދިޔަ އެ ހަރަކާތަކީ ފާއިތުވި 10 ވަރަކަށް އަހަރު މި ރަށުގެ ސަޤާފީ ރަމްޒެއްގެ ގޮތުން ކުރަމުން އަންނަ ކަމެކެވެ. އެ ހަރަކާތުގެ އުސްއަލިއަކަށް ވެގެން ދިޔައީ "ޚިދުމަތުގެ ރަމްޒު" އެވޯޑް ދިނުމެވެ. އެ ރަށު ކައުންސިލުން މި ފަހަރު އެ އެވޯޑް ދީފައި ވަނީ އެ ރަށުގެ ކުރީގެ ކަތީބު އަދި ދަ ހޯކްސްގެ ޗެއަރމަން އަހުމަދު ރަޝީދަށެވެ. އެ ރަށުގެ ކުރިއެރުމާއި ތަރައްޤީ އަށް ގިނަ ޚިދުމަތްތަކެއް ކޮށްދެއްވާފައިވާ އަހުމަދު ރަޝީދު އާއި ގުޅުން ހުރި ޚާއްސަ ރިޕޯޓެއް އެ ހަރަކާތުގެ ތެރެއިން ވަނީ ގެނެސްދީފައެވެ. އެ ރިޕޯޓްގައި އޭނާގެ މަސައްކަތްތަކާއި، ޝަހުސިއްޔަތުގެ މުހިންމު މައުލޫމާތުތައް ގެނެސްދީފައިވެއެވެ. އަދި އޭނާ އާއި އެކުގައި މަސައްކަތް ކުރި މީހުން އޭނާ އާއި މެދު ދެކޭ ގޮތް ގެނެސްދީފައިވާ މި ރިޕޯޓަކީ ޖަޒުބާތީ ރިޕޯޓެކެވެ. މީގެ އިތުރުން އެ ހަރަކާތުގެ ތެރެއިން އަހުމަދު ރަޝީދު ވަނީ އޭނާ ރަށަށްޓަކާ ކުރާ އުންމީދުތަކާއި މެދު ވާހަކަދައްކަވާފައެވެ.

އަހުމަދު ރަޝީދު ފާހަގަކުރެއްވި ފަދައިން މުޅި ކަމަދޫ އިން ވެސް ފެނުނީ އެއްބަައިވަންތަކަމާއި އެއްބައެއްކަން ދައްކުވާދިނުމުގެ ރޫހެވެ. ކަމަދޫގެ ސްޓޭޖް ހުޅުވުމުގެ ރަސްމިއްޔާތުގައި އެ ރަށު ކަނބަލުންގެ ނެށުމުގެ ފަރި ހަރަކާތްތަކެއް ވަނީ ދައްކާލާފައެވެ. ކަމަދޫގެ ޢީދު ހަރަކާތްތަކުން ފާހަގަވި އެންމެ މުހިންމު އެއްކަމަކީ އެންމެންގެ ހިތްގައިމު ހިނިތުންވުމެވެ. އަދި ކަމަދޫގެ ރައްޔިތުންގެ ސަޤާފީ ހުނަރުވެރިކަމެވެ. ދަފި ނެގުމާއި، ބަނޑިޔާ ޖެހުން ފަދަ ޗާލު ނެށުންތައް ކަމަދޫގެ ޢީދު ހަރަކާތްތަކުން ފެނިގެން ދިޔަ އިރު، އެ ހަރަކާތްތަކުގެ އެއްވަރުކަމާއި، ފުރިހަމަ ކަމުން މި ޢީދަށް ކަމަދޫ ތައްޔާރުވެފައިވާ މިންވަރު އެނގިގެންދެއެވެ.

ކަމަދޫގެ ޢީދު ފޯރި އިތުރުކޮށްދިން އަނެއްކަމަކީ ރަށަށް އައި މެހެމާނުންނާއި މެދު ބަހައްޓާ ގާތްކަމެވެ. އެހެން ރަށްރަށެކޭ އެއްފަދައިން ކަމަދޫގަ ވެސް ޢީދުގެ ފުރަތަމަ ދުވަސް ފެށީ ޢީދު ނަމާދާއި އެކުގައެވެ. ބޮޑު ޖަމާއަތުގައި ކުރިއަށް ދިޔަ ޢީދު ނަމާދަށް ފަހު ޢީދު ސައި ވަނީ ބާއްވާފައެވެ. ރާއްޖެ އެމްވީ އަށް މައުލޫމާތުދެމުން އެ ރަށު ކައުންސިލްގެ ރައީސް ހަސަން ޒަރީރު ވިދާޅުވީ އީދު ސައިގެ ހަރަކާތަށް ވެސް ވަރަށް ރަނގަޅު ތަރުޚީބެއް ލިބިގެން ދިޔަކަމަށެވެ. އަދި އެފަދަ ހަރަކާތެއްގެ ބޭނުމަކީ މުޖުތަމައުގައި ދޭދޭ ފަރުދުންގެ މެދުގައި އޮންނަ ގާތް އެކުވެރި ގުޅުން ބަދަހިކުރުން ކަަމަށް އޭނާ ވަނީ ވިދާޅުވެފައެވެ. ޢީދު ސަޔަށް ފަހު ދެން ހެނދުނާއި މެންދުރުގެ ވަގުތުތަކުގައި ޚާއްސަ ސަޤާފީ ހުށަހެޅުންތަކެއް ވަނީ ހުށަހަޅާދީފައެވެ. ރަށުގެ ޒުވާނުންގެ ހުނަރުވެރިކަން ފެނިގެން ދިޔަ އެ ހަރަކާތްތައް ރަށުގެ އެކި ސަރަހައްދުތަކުގައި ވަނީ ކުރިއަށް ގެންގޮސްފައެވެ.

ޒަރީރު ވިދާޅުވީ މި ހަރަކާތުގެ ތެރެއިން، ރަށަށް އަންނަ މެހެމާނުންނަށް ޚާއްސަކޮށްފައިވާ ލަވައެއް ހުށަހަޅާދީފައިވާ ކަމަށެވެ. އެ ލަވަ ހުށަހަޅާދީފައި ވަނީ ޚާއްސަ ނެށުމަކާއި އެކުގައެވެ. މީގެ އިތުރުން އީދުގައި ހުށަހަޅާދޭ ލަވަތަކުގައި ކަމަދޫގެ ރީތިކަމާއި، ސަޤާފަތް އަދި ކަމަދޫ އަށް ޚާއްސަ ކަންކަމުގެ ވާހަކަ ވަނީ ގެނެސްދީފައެވެ. ރަށަށް އަންނަ މެހެމާނުންނަށް އެ ލަވައިގެ ޒަރީއާއިން ރަށާއި ގުޅުވާލަދިނުމަކީ އެ ލަވައިގެ އެއް މަޤްސަދުކަމަށް ޒަރީރު ވިދާޅުވިއެވެ. އޭނާ ވިދާޅުވީ މިފަދައިން ކޮންމެ އަހަރަކުވެސް މެހެމާނުންނަށް ޚާއްސަ ހުށަހެޅުންތައް ހުށަހަޅާދެމުންދާ ކަމަށެވެ. ކަމަދޫގެ މެންދުރުފަހުގެ ހަރަކާތްތައްވެސް އެހާމެ ފޯރިގަދައެވެ. އެހެނީ މެންދުރު ފަހު އޮތީ އަންހެނުންގެ ބިލެތްދަފި ނެގުމުގެ ޚާއްސަ ހަރަކާތެއް ކަމަށް ވުމެވެ.

ކަމަދޫ އަށް މިހާރު ވެސް އެ ރަށުން ބޭރުން އެތައް ބަޔަކު ވަނީ ގޮސްފައެވެ. ޒަރީރު ރާއްޖެ އެމްވީ އަށް ކިޔާދިން ގޮތުގައި އަދިވެސް ބައެއް އާއްމުން އެ ރަށަށް ދަނީ އަންނަމުންނެވެ. އެ އެންމެންނަށް މަރުޚަބާ ކިޔުމަށް މުޅި ކަމަދޫ ތައްޔާރަށް އޮތްކަން އޭނާ ވަނީ ފާހަގަކޮށްފައެވެ.