"އިބަމަ" އިޖުތިމާއީ ބަދަހި މަދަދުވެރިން އަކީ 2021 ވަނަ އަހަރު، ރައީސް އިބްރާޙިމް މުޙައްމަދު ޞާލިޙްގެ ސަރުކާރުން އެ އަހަރުގެ ސެޕްޓްމްބަރު މަހުގެ ތެރޭގައި ޔުނިސެފްގެ އެހީތެރިކަމާއެކު ފެށި ހަރަކާތެކެވެ. މި ހަރަކާތް ނުވަތަ ޕްރޮގްރާމުގެ މަގްސަދަކީ އިޖްތިމާއީ ރައްކާތެރިކަން ކަށަވަރުކުރުމަށްޓަކައި "ޕްރިވެންޓިވް" އަދި "ރެސްޕޮންސިވް" ފިޔަވަޅު އެޅުމުގެ އަވަސް ނިޒާމެއް ގާއިމު ކުރުމެވެ.
ހަމައެހެންމެ، ހާއްސަ ގޮތެއްގައި އެހީތެރިކަން ބޭނުންވާ ކުޑަކުދިންނާއި މީހުން ދެނެގަނެ އެފަރާތްތަކަށް ބޭނުންވާ އެހީތެރިކަން ވީއެންމެ އަވަހަށް ވީހާވެސް ގާތުން ފޯރުކޮށްދިނުމެވެ.
އެގޮތުން އެންމެ ގާތުން ވީހާ އަވަހަކަށް ކަމެއް ނުހިނގަނީސް، ނޫނީ އެކަމެއް ހިނގާ ހިސާބުން އަޅުގަނޑުމެންނަށް އެކަން އެދިމާވާ ބަޔަކާއެކު މަސައްކަތް ކުރެވިއްޖެނަމަ، އެކަމެއް ޙައްލުކުރުމަށްޓަކައި ރަށްރަށުގެ ކައުންސިލްތައް އިސްވެ އޮވެ، އަތޮޅުތަކުގައި ހުރި ފެމިލީ އެންޑް ޗިލްޑްރެން ސާވިސް ސެންޓަރުތަކާއި ސަރުކާރުގެ އޮފީސްތައް، ގުޅިގެން އިބަމަ މެމްބަރުންވަނީ ތަމްރީނުވެސް ކޮށްފައެވެ. އެ ޕްރޮޖެކްޓަކީ ޔުނިސެފްގެ މާލީ އެހީތެރިކަމާއެކު ހިންގަންފަށާފައިވާ ޕްރޮޖެކްޓަކަށް ވުމުން، މިދިޔަ ނޮވެމްބަރާ ހަމައަށް އެކަނި ވެސް ރާއްޖޭގެ 12 އަތޮޅެއްގައި އަދި ތިން ސިޓީއެއްގެ ޖުމްލަ 836 ބައިވެރިން އިބަމައަށް ތަމްރީނު ކުރެވިފައިވެ އެވެ.
އިބަމަ މަސައްކަތް ބައެއް ރަށްރަށުގައި ކާމިޔާބު ކަމާއިއެކު ކުރިއަށްގެންގޮސްފައިވާއިރު، ސަރުކާރު ބަދަލުވެ އިބަމަ މިޕްރޮޖެކްޓް މިވަނީ ހުއްޓާލާފައެވެ. ރައްޔިތުންނާއި ގުޅުންހުރި މިފަދަ ކޮންމެ ކަމެއް ސަރުކާރު ބަދަލުވާ ހިސާބުން ހުއްޓާލުމަކީ އެކަމުގެ ސަބަބުން ގިނަ ރައްޔިތުންނަށް ލިބޭ ބޮޑު ގެއްލުމެކެވެ. އަދި ކުރީ ސަރުކާރުން ރައްޔިތުންނަށްޓަކައި ހިންގާ މިފަދަ ބޮޑެތި މަޝްރޫއުތައް ފެއިލްކޮށްލުމެވެ.
އެހެންކަމުން އިބަމަވެސް ފެއިލްކޮށްލީއެވެ. އިބަމަ ފެއިލްކޮށްލުމަށްފަހު ސަރުކާރު ބަދަލުވުމާއި އެކު އިބަމަ ރީބްރޭންޑްކޮށް މިސަރުކާރުގެ އަމިއްލަ އެއްޗަކަށް ހަދަން މަސައްކަތް ފެއްޓީއެވެ. އެގޮތުން މިކާމިޔާބު ޕްރޮޖެކްޓް ކުރިއަށްގެންދިޔުމުގެ ބަދަލުގައި މިސަރުކާރުން ވަނީ "ހާލު ކިހިއްނެތް" މިނަމުގައި އައު ޕްރެޖްޓެއް ފައްޓާފައެވެ. އަލަށް ކުރިއަށްގެންދަން މަސައްކަތްކުރާ ހާލު ކިހިއްނެތް މިޕްރޮގްރާމްގެވެސް މަޤްސަދަކީ އިބަމައިގެ މަޤްޞަދެވެ. ހާއްސަ ގޮތެއްގައި އެހީތެރިކަން ބޭނުންވާ ކުޑަކުދިންނާއި މީހުން ދެނެގަނެ އެފަރާތްތަކަށް ބޭނުންވާ އެހީތެރިކަން ވީއެންމެ އަވަހަށް ވީހާވެސް ގާތުން ފޯރުކޮށްދިނުމަކީ މިދެ ޕްރޮޖެކްޓްވެސް މަޤްސަދެވެ. ސުވާލަކީ އިބަމަ މިނަމުގައި ކުރިއަށް ނުގެންދިޔައީ ކީއްވެތޯއެވެ. ރާއްޖޭގެ 12 އަތޮޅުގައި އިބަމަ މެމްބަރުން ތަމްރީނުކޮށްފައިވާއިރު، އިބަމަ ކުރިއަށްގެންދިޔުމަކީ ސަރުކާރަށްވެސް ހަރަދުކުޑަވާނެ ގޮތެކެވެ.
ނިމިދިޔަ ސަރުކާރު ނިމުނުއިރު އިބަމައިގެ މަސައްކަތް އޮތް ހިސާބުން ކުރިއަށްގެންދިޔުމަށް މަސައްކަތް ކުރުމަކީ ރައްޔިތުންނަށް ޚިދުމަތެއް ފޯރުކޮށްދިނުމަށް ބޭނުންވާ ބަޔަކު ނަމަ ކުރާނެ އެންމެ މުހިއްމު އެއްކަމެވެ. ކުރަން މިއުޅެނީ އެއް ކަމެކެވެ. ނަމަވެސް ސަރުކާރެއް ބަދަލުވާ ހިސާބުން ދެން ބޭނުންވަނީ ކޮންމެ ކަމެއްގައިވެސް ކްރެޑިޓް ނަގަންށެވެ.
އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އަލަށް ފައްޓާ 'ހާލު ކިހިނެއް؟' ޕްރޮގްރާމަކީ ގޭގެއަށް ޒިޔާރަތްކޮށް ރާއްޖޭގެ ހުރިހާ ރަށެއްގެ ހުރިހާ ޢާއިލާތަކުގެ ޙާލަތު ދެނެގަތުމަށް ހަމަޖެހިފައިވާ ޕްރޮގްރާމެކެވެ. ގޭގެއަށް ޒިޔާރަތްކުރާ ޓީމުތަކުން އެއްކުރާ މަޢުލޫމާތުތަކުގެ އެހީގައި، އެ ޢާއިލާތަކަށް ބޭނުންވާ އެހީތެރިކަން އަވަސްކަމާއި ފަސޭހަކަމާއެކު ފޯރުކޮށްދިނުމަށް މަސައްކަތްކުރުމަށްވަނީ ނިންމާފައެވެ.
ކަންމިހެންއޮތް އިރު، އިބަމަ މެމްބަރުން ތަމްރީނު ކުރެވުނުއިރު މިމަސައްކަތްކޮށްފައިވަނީ ވަރަށް ފުރިހަމައަށެވެ. އެގޮތުން މިތަމްރީނު ޕްރޮގްރާމްތަކުގައި ކުރެވުނު އެންމެ ބޮޑު މަސައްކަތަކަށްވެފައިވާނީ އިބަމަ މެޕިންއެވެ. މިއީ މުޖުތަމަޢުގައި ހަވާސާކުރެވިފައިވާ ފަރާތްތަކާއި، އެފަރާތްތަކުގެ ބޭނުންތައް ދެނެގަނެ، ބޭނުންވާ އެހީތައް ދަނެގަނެ، ގޭގެއަށް ޒިޔާރަތްކޮށް ކޮންމެ ރަށެއްގައިވެސް މިފަދަ އެހީތެރިކަމަށް ބޭނުންވާ ފަރާތްތަށް ދަނެގަނެ އެއްކުރެވިފައިވާ މައުލޫމަތުތަކެވެ. އެގޮތުން ހާއްސަ އެހީއަށް ބޭނުންވާ މީހުންނާއި، އުމުރުން ދުވަސް މީހުންނާއި އެކަނިވެރި މައިންނާއި އަދިވެސް އެކި ގޮތްގޮތުން އެހީތެރިކަމަށް ބޭނުންވާ ފަރާތްތައްވާނީ ދަނެގަނެވިފައެވެ.
ސުވާލަކީ ޑަބަލް މަސައްކަތް ކުރަން މިއުޅެނީ ކީއްވެބާ އެވެ. އިބަމަ ތަމްރީނު ހިންގި ބާރަ އަތޮޅުންވާނީ މިދެންނެވި މައުލޫމާތުތައް އެއްކުރުމަށްފަހު މިނިސްޓްރީގައި ހުންނަ އިބަމަ ހިންގާ އިދާރީ މަސައްކަތް ކުރާ މުވައްޒަފުންނާއި ހިއްސާކޮށްފައެވެ. އެހެންކަމުން ކުރަން މިއުޅެނީ ހަމަ ރައްޔިތުންނަށް ހެޔޮ ހިތުން ކޮށްދޭން އުޅޭ ކަމެކޭ ބުނެވެން އެބަ އޮތް ހެއްޔެވެ. މިހުރިހާ މައުލޫމާތުތައް ހުރި އިރު އިބަމަ ތަމްރީނު ނުހިއްގާ ރަށްރަށުގައި އެކަން ކުރިއަށް ގެންދަންވީ ނޫންތޯއެވެ. ރައްޔިތުންނަށް އޯގާތެރިވާންވީ ހުރިހާ ގޮތަކުންނެވެ.
