އައްޑޫ އަށް ދެމެހެއްޓެެނިވި ތަރައްޤީ ގެނެވޭނެ ހަމައެކަނި ޕާޓީއަކީ މޯލްޑިވިއަން ޑިމޮކްރެޓިކް ޕާޓީ، އެމްޑީޕީ ކަމަށް އެ ޕާޓީގެ ކުރީގެ ރައީސް ޑރ.އިބްރާހީމް ދީދީ (ޑރ.ޑީޑީ) ވިދާޅުވެއްޖެއެވެ.

އޭނާ މިހެން ވިދާޅުވީ ބުރާސްފަތި ދުވަހުގެރޭ އައްޑޫ ސިޓީގައި ބޭއްވި ކެމްޕެއިން ޖަލްސާއެއްގައި ވާހަކަދައްކަވަމުންނެވެ. ޑރ. ދީދީ ވިދާޅުވީ އައްޑޫ އަށް ދެމެހެއްޓެނެވި ތަރައްޤީ ގެނައުމަށް މަސައްކަތް ކުރެއްވި ރައީސަކީ ކުރީގެ ރައީސް އިބްރާހީމް މުހައްމަދު ސާލިހު ކަމަށެވެ. އަދި އެމަނިކުފާނު ގެނެސްދެއްވި ތަރައްޤީ ކުރިއަށް ގެންދެވޭނީ އެމްޑީޕީ އަށް މަޖިލީހުގެ މެޖޯރިޓީ ހޯދައި ދިނުމުން ކަމަށެވެ. އަދި އެމްޑީޕީގެ ވެރިކަންތަކުގައި އައްޑޫ އަށް ރަނގަޅު ގޮތްތަކެއް ހޯދައި ދިނުމަށް މަސައްކަތް ކުރަމުންދާ ކަން ތާރީހަށް ބަލާލުމުން އެނގޭ ކަމަށް އޭނާ ވަނީ ވިދާޅުވެފައެވެ.

އެގޮތުން އެމްޑީޕީގެ ފުރަތަމަ ސަރުކާރުގައި ވެސް އައްޑޫ ބަދަލުކޮށްލާ ފަދަ ތަރައްޤީގެ މަޝްރޫޢުތަކެއް ގެނައި ކަމަށް އޭނާ ވިދާޅުވިއެވެ. އެހެންކަމުން ސަރުކާރު ކެންޑިޑޭޓުން ތިބެގެން ނޫނީ އައްޑޫ އަށް ކުރިއެރުން ނުލިބޭނެ ކަމަށް ބުނާ ބުނުމަކީ ޤަބޫލުކުރެވޭ ވާހަކަ އެއް ނޫން ކަމަށް ޑރ. ދީދީ ވިދާޅުވިއެވެ. އައްޑޫ އަށް ބޭނުންވާ ކަންކަން ފުރިހަމަކުރެވޭނީ ޖަވާބުދާރީކުރުވޭނެ ފަދަ ބަޔަކު މަޖިލީހަށް އައްޔަންކޮށްގެން ކަމަށް އޭނާ ވިދާޅުވިއެވެ.

މި ސަރުކާރުން ކުރާ ކަމަކީ ކުރީ ސަރުކާރުން ހިންގާފައިވާ މަޝްރޫޢުތައް ނިމުމުން ރިބަން ފަށް ކެނޑުން ކަމަށް އޭނާ ވިދާޅުވިއެވެ. އަދި އައްޑޫ އަކީ ހޭލުންތެރި ބަޔަކު ތިބި ތަނެއް ކަަމަށާއި އެފަދަ ކަންކަން އައްޑޫގެ ރައްޔިތުންނަށް އޮޅުވާ ނުލެވޭނެ ކަަމަށް ޑރ.ދީދީ ވިދާޅުވިއެވެ.

ޑރ. ދީދީގެ ވާހަކައިގައި ވަނީ ރާއްޖޭގެ ޑިމޮކްރަސީގެ ހަޔާތުގައި އެމްޑީޕީގެ ތާރީހަށް އަލިއަޅުވާލައްވާފައެވެ. އެގޮތުން އެމްޑީޕީ އާއި އައްޑޫއާ ވަނީ ގުޅިފައި ކަމަށާއި އެކަން އެމްޑީޕީގެ ތާރީހުން ފެންނަން އޮންނާނެ ކަމަށް އޭނާ ވިދާޅުވިއެވެ. އަދި އެމްޑީޕީގެ ތާރީހުގެ ފޮޓޯތަކުން ފެންނަން އޮތް ކަމަކީ އައްޑޫ އިން އެމްޑީޕީގައި އަދާކުރި މުހިންމު ދައުރުކަމަށް ވެސް ޑރ.ދީދީ ވިދާޅުވިއެވެ. ޑރ.ދީދީ ވަނީ އެމްޑީޕީގެ 5 ރައީސުންގެ ތެރެއިން 2 ރައީސުންނަކީ އައްޑޫ އަށް ނިސްބަތްވާ ބޭފުޅުން ކަމަށާއި އެކަމުން ވެސް އައްޑޫ އިން އެމްޑީޕީގައި އަދާކުރާ މުހިންމު ދައުރު އެނގިގެންދާ ކަމަށް ފާހަގަކުރައްވާފައެވެ.