ކ. މާފުށިގައި މާރާމާރީއެއް ހިންގަައި މީހަކު ޒަހަމްކޮށްލައިފިއެވެ.

ފުލުހުން ބުނީ ހޮނިހިރު ދުވަހު ފަތިހު ހިންގި މި މާރާމާރީގައި އަނިޔާ ލިބިފައިވާ މީހަކަށް މާފުށީ ހޮސްޕިޓަލުގައި ފަރުވާދެމުންދާކަމަށް ފަތިހު 05:30 ހާއިރު އެއިދާރާއަށް ރިޕޯޓުކޮށްފައިވާ ކަމަށެވެ.

މި ހާދިސާގައި އަނިޔާވެފައިވަނީ 34 އަހަރުގެ ދިވެހި ފިރިހެނެއްކަމަށާ އެމީހާއަށް މިހާރު ޓްރީޓޮޕް ހޮސްޕިޓަލުގައި ފަރުވާދެމުންދާ ކަމަށް ފުލުހުން މައުލޫމާތުދެއެވެ.

މީގެ އިތުރުން ހޮނިހިރު ދުވަހު މާފުށިގައި އިތުރު މާރާމާރީއެއް ވެސް ވަނީ ހިންގާފައެވެ. މިކަމާ ގުޅޭގޮތުން ފުލުހުންގެ މީޑިއާ އޮފިސަރު ރާއްޖެއެމްވީއަށް މައުލޫމާތު ދެމުން ވިދާޅުވީ މާރާމާރީއަކާ ގުޅިގެން މިހާތަނަށް ދެ ފިރިހެނުން ހައްޔަރުކޮށްފައިވާ ކަމަށެވެ. އަދި ހައްޔަރުކޮށްފައިވާ ދެ މީހުންނަކީ ހޮނިހިރު ދުވަހު ފަތިހު ހިންގި ފުރަތަމަ މާރާމާރީގައި ބައިވެރިވި ބައެއްކަމަށް މިހާތަނަށް ބެލިބެލުމުން އެނގިފައިވާ ކަމަށް ފުލުހުން ބުނެއެވެ.

މި މައްސަލަ ފުލުހުން މިހާރު ދަނީ އިތުރަށް ތަހުގީގު ކުރަމުންނެވެ.