އައްޑޫ ސިޓީގެ ހިތަދޫ-ހުޅުމީދޫ ގުޅުވާލަ ދޭ ބްރިޖުގެ މަސައްކަތް ކުރުމަށް މިސްރުގެ ކުންފުންޏެއް ކަމަށްވާ ދަ އަރަބް ކޮންޓްރެކްޓާސްގެ ޕްރޮޕޯސަލެއް ލިބިފައިވާ ކަމަށާއި، އެ މަސައްކަތް ފެށުމަށް މަޝްވަރާ ކުރަމުންދާ ކަމަށް ސަރުކާރުން ބުނެފިއެވެ.

އާދިއްތަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް ދަ އަރަބް ކޮންޓްރެކްޓާސް އިން އައްޑޫ ސިޓީ ހިތަދޫ-ހުޅުމީދޫ ގުޅުވައިދޭ ބްރިޖުގެ މަސައްކަތް ކުރުމަށް ޝައުގުވެރިކަން ފާޅުކޮށްފައިވާ ކަމަށާއި، އެ ޕްރޮޕޯސަލްއާ މެދު މަޝްވަރާކުރެވިފައިވާ ކަމަށެވެ.

މި މަޝްރޫއު ކުރިއަށް ގެންދިއުމުގައި ހަދަންޖެހޭ ސާވޭތައް އެކުންފުންނީގެ ފަރާތުން ހިލޭ ސާބަހަށް ކޮށްދޭނެ ކަމުގެ އިޝާރާތެއް ދީފައިވާ ކަމަށް ނާޒިމް ވިދާޅުވިއެވެ.

އައްޑޫ ސިޓީގެ ހިތަދޫ-ހުޅުމީދޫ ގުޅުވާލައިދޭ ބްރިޖަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ.

ހިތަދޫ-ހުޅުމީދު ގުޅާލަދޭ ބްރިޖު އެޅުމުގެ މަސައްކަތަށް ބޭނުންވާ ސާވޭއަށް މި އަހަރުގެ ބަޖެޓުގައި 30 މިލިއަން ރުފިޔާ ބަޖެޓުކޮށްފައިވެއެވެ.