ޚިޔާނާތްތެރިވެވަޑައިގަތް ކަމަށް ބުނެ ދޮގު ފަތުރާތީ، އަބުރުގެ ދައުވާ ކުރެއްވުމާމެދު މަޝްވަރާކުރައްވަމުން ދާކަމަށް، އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް މިފަދައިން ވިދާޅުވެފައިވަނީ، 1 މިލިއަން ޑޮލަރަށްވުރެ ގިނަ ފައިސާއަށް އާޒިމް ޚިޔާނާތްތެރިވެވަޑައިގެންފައި ވާކަމަށާއި، ޚިޔާނާތުގެ އިތުރު ތުހުމަތުތައް އޭނާގެ މައްޗަށް ކުރެވޭކަމަށް ވިދާޅުވެ، ޔޫތު މިނިސްޓްރީގެ ޑެޕިއުޓީ މިނިސްޓަރު މަލްސާ ޝަރީފް ދައްކަވާފައިވާ ވާހަކަފުޅުތަކާ ގުޅިގެންނެވެ.

މަލްސާ ވަނީ، އާޒިމްގެ އިހުމާލުން މަހާޖައްރާފު ރިޕެއަރކުރުން ލަސްވެ، 509،617،500 ރުފިޔާގެ ގެއްލުންވިކަމަށް ތުހުމަތު ކުރައްވާފައެވެ. މީގެ އިތުރުން އެސްޓީއޯގެ އެމްޑީއަކަށް ހުންނެވިއިރު އެސްޓީއޯގެ ބޭސްފިހާރަ ހުޅުވުމުގެ މަރުހަލާގައިވެސް ކޮރަޕްޝަން ހިންގަވާފައިވާކަމަށް އޭނާ ވަނީ ވިދާޅުވެފައެވެ.

މަލްސާގެ އެ ވާހަކަފުޅުތަކަށް އާޒިމް ވަނީ އިންކާރުކުރައްވާފައެވެ. އާޒިމް ވިދާޅުވީ އެ ފަދަ ބޮޑެތި ދޮގުތައް ހަދަމުން ދަނީ އޭނާގެ އަގު ވައްޓާލުމަށް ކަމަށެވެ. އަދި މި ސަރުކާރުގެ ޑެޕިއުޓީ މިނިސްޓަރަކު އެ ވާހަކަދައްކަވާނީ ސީދާ ރައީސްގެ އޯޑަރަށް ކަަމަށް އާޒިމް ވިދާޅުވިއެވެ.

އާޒިމް ވަނީ އަބުރުގެ ދައުވާ ކުރެއްވުމާމެދު ގޮތެއް ނިންމަވާނީ ލީގަލް ޓީމާ މަޝްވަރާ ކުރެއްވުމަށްފަހު ކަމަށް ވިދާޅުވެފައެވެ. އާއްމުންވެސް ވަނީ، އާޒިމާ ދެކޮޅަށް ސާބިތު ނުހިފޭ ތުހުމަތުތަކެއް ކުރާކަމަށް ބުނެ، އެކަމާމެދު ސުވާލު އުފައްދާފައެވެ.