އެތުލެޓިކޯ މެޑްރިޑަށް ކުޅެމުން އަންނަ ސްޕެއިންގެ ސްޓްރައިކަރ އަލްވާރޯ މޮރާޓާ އެ ކުލަބާއެކު ހަދާފައިވާ އެއްބަސްވުން އައުކުރުމަށް ނިންމައިފިއެވެ.
އުމުރުން 31 އަހަރުގެ ކުޅުންތެރިޔާ އެ ކުލަބާއެކު ހަދާފައިވާ އެއްބަސްވުމުގެ މުއްދަތު ހަމަވާން އޮތީ މި ސީޒަނުގެ ނިޔަލަށެވެ. ނަމަވެސް އެތުލެޓިކޯއާއެކު ކުރިއަށްގެންދިޔަ މަޝްވަރާތަކަށްފަހު، މިދިޔަ ޖޫން މަހު އޭނާ ވަނީ އެއްބަސްވުން އައު ކުރަން ނިންމައިފަ އެވެ. އެތުލެޓިކޯގެ އެއްބަސްވުން މޮރާޓާ އައު ކޮށްފައި ވަނީ ތިން އަހަރު ދުވަހަށެވެ. އެހެންކަމުން 2027 ވަނަ އަހަރުގެ ޖޫން މަހުގެ ނިޔަލަށް މިހާރު އޭނާ އެ ކުލަބުގައި ހުންނާނެ އެވެ. މޮރާޓާ އެތުލެޓިކޯގެ އެއްބަސްވުން އައު ކުރީ، ސައުދީ ޕްރޯ ލީގު އަދި މޭޖާ ލީގު ސޮކާ (އެމެރިކާ ލީގު) އިން ލިބުނު ހުށަހެޅުންތައް ދޫކޮށްލުމަށްފަހު އެވެ.
އެތުލެޓިކޯއަށް ދެ ފަހަރެއްގެ މަތިން މޮރާޓާ ވަނީ 120 މެޗު ކުޅެދީ، 49 ލަނޑު ޖަހާފައެވެ. މިހާރު ކުރިއަށްދާ ސީޒަންގައި ވެސް އޭނާ އަންނަނީ މޮޅަށް ކުޅެމުންނެވެ. މި ސީޒަންގެ ސްޕެނިޝް ލީގުގައި މިހާތަނަށް ކުޅުނު 10 މެޗުން އޭނާ ވަނީ ހަތް ލަނޑު ޖަހައި، ދެ ލަނޑު ޖެހުމަށް އެހީތެރިވެދީފަ އެވެ. ޔުއެފާ ޗެމްޕިއަންސް ލީގުގައި އޭނާ ވަނީ ހަތަރު މެޗުން ފަސް ލަނޑު ޖަހައިފަ އެވެ. މޮރާޓާ އޭނާގެ ސީނިއަރ ކެރިއަރު ފެށީ ރެއާލް މެޑްރިޑުންނެވެ. އޭގެ ފަހުން އޭނާ ވަނީ އިޓާލިއަން ލީގުގެ ޔުވެންޓަސްއާއި އިނގިރޭސި ޕްރިމިއަރ ލީގުގެ ޗެލްސީއަށް ވެސް ކުޅެފައެވެ. އެތުލެޓިކޯގައި ހުރުމަށްފަހު އެންމެ ފަހުން އޭނާ ޔުވެންޓަސްއަށް ކުޅުނީ ލޯނު އެއްބަސްވުމެއްގެ ދަށުންނެވެ.
