ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ހޯމަ ދުވަހަށް ތާވަލްކޮށްފައި ވަނިކޮށް، އަނެއްކާވެސް މަޖިލީހުގެ ނާއިބު ރައީސް އީވާ އަބްދުﷲ މަޖިލީހުގެ ޖަލްސާ އަށް ސަލާމް ފޮނުއްވައިފިއެވެ.

މަޖިލީހުގެ އިދާރާއިން ވަނީ މަޖިލީހުގައި ހޯމަ ދުވަހަށް ތާވަލް ކުރި ޖަލްސާ، އީވާ ސަލާމުގައި ހުންނެވުމުން ކުރިއަށް ނުގެންދެވޭނެކަން މެންބަރުންނަށް އަންގަވާފައެވެ.

މަޖިލީހުގެ ރައީސްގެ އިތުބާރުނެތް ކަމުގެ މައްސަލަ ހޯމަ ދުވަހަށް ތާވަލުކޮށްފައިވަނީ ރައްޔިތުންގެ މަޖިލީހުގެ ރައީސް ކަމުގެ މަގާމުން، ނަޝީދު ވަކިކުރުމަށް އާދީއްތަ ދުވަހުގެ ޖަލްސާއަށް އެޖެންޑާ ކުރުމަށް ފަހު، އެ ދުވަހު ވެސް އީވާ ސަލާމް ފޮނުއްވުމުގެ ސަބަބުން މައްސަލަ ކުރިއަށް ގެންދެވިފައި ނުވުމުންނެވެ.

އާދިއްތަ ދުވަހު މަޖިލީހަށް ފޮނުއްވި ސިޓީގައި އީވާ ވިދާޅުވެފައިވަނީ ޑެންގީ ހުމަށް ޕޮޒިޓިވްވެވަޑައިގެންފައިވާ ކަމަށެވެ. ނަމަވެސް ނަޝީދު ވަކިކުރުމުގެ މައްސަލަ އެޖެންޑާ ކުރި ދުވަހަށް އީވާ ސަލާމް ހުށަހަޅުއްވާފައި ވަނީ ޑެންގީ ހުމަށް ޕޮސިޓިވްވެވަޑައިގެން ހުންނަވާ ވެސް އޮކްޓޯބަރު މަހުގެ 24 ވަނަ ދުވަހުގެ ވެސް ރިޔާސަތު ބެލެހެއްޓެވުމަށް ފަހުގައެވެ.

އަދި މިކަމުގެ ސަބަބުން ނަޝީދު ވަކިކުރުމުގެ މައްސަލަ ކުރިއަށް ނުދާތީ، އެމްޑީޕީގެ ފަރާތުން އާދިއްތަ ދުވަހު މި މައްސަލަ ވަނީ ސުޕްރީމް ކޯޓަށް ހުށަހަޅާފައެވެ.

ނަޝީދު މަޖިލީހުގެ ރައީސްކަމުން ވަކިކުރުމަށް އެމަނިކުފާނަށް ނޯޓިސް ފޮނުވާފައިވަނީ 12 އޮކްޓޯބަރުގައެވެ. 49 މެންބަރުންގެ ސޮޔާއެކު، ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވަނީ ވެސް އޮކްޓޯބަރު މަހުގައެވެ.