މަޖިލިސް އޮތީ ކެނެރީގޭ ދެބެއިން ވެގެން ހިސޯރުކޮށްފައި ކަމަށް، މާފަންނު ހުޅަނގު ދާއިރާގެ މެމްބަރު މުހައްމަދު ފަލާހް ވިދާޅުވެއްޖެއެވެ.
އާދިއްތަ ދުވަހު ރާއްޖެ ޓީވީން ގެނެސްދިން ލައިވް ކަވަރޭޖްގައި ވާހަކަފުޅުދައްކަވަމުން ފަލާހް ވަނީ، މަޖިލީހުގެ ރައީސް މުހައްމަދު ނަޝީދާއި މަޖިލީހުގެ ނައިބު ރައީސް އީވާ އަބްދުﷲއަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން މިހާރު މަޖިލީހުން ފެންނަނީ އެ ދެބެއިންގެ ކުޅިގަނޑެއް ކަަމަށް ފަލާހް ވިދާޅުވިއެވެ. ފަލާހް ވިދާޅުވީ އެ ދެ ބޭފުޅުން މަސައްކަތް ކުރައްވަނީ އެއް ބޭފުޅަކު އަނެއް ބޭފުޅަކު ހިމާޔަތްކުރައްވަން ކަމަށާއި، ނަމަވެސް އެ ވޯޓަށް އެ ބޭފުޅުންނަށް ނުފިއްލެވޭނެ ކަމަށެވެ. އަދި އެ މައްސަލަ ކާމިޔާބުކުރައްވާނެ ކަމަށާއި، ފަސްދޮޅަހަކަށް މެމްބަރުންގެ ވޯޓު އެމްޑީޕީއާ އެއްކޮޅަށް ލިބޭނެކަމަށް ލަފާކުރެއްވޭ ކަމަށްވެސް ފަލާހް ވަނީ ވިދާޅުވެފައެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މަޖިލީހުގެ ރައީސްކަމުގެ މަގާމުން ވަކިކުރުމުގެ މައްސަލަ މާދަމާއަށްވެސް ވަނީ އެޖެންޑާ ކޮށްފައެވެ.
ރައްޔިތުންގެ މަޖިލީހުގެ ރައީސްކަމުގެ މަގާމުން، ނަޝީދު ވަކިކުރުމަށް އާދީއްތަ ދުވަހުގެ ޖަލްސާއަށްވެސް އެޖެންޑާކުރިއެވެ. ނަމަވެސް މަޖިލީހުގެ ރައީސްކަމުގެ މަގާމުން ނަޝީދު ވަކިކުރުމުގެ މައްސަލަ އެޖެންޑާކޮށްފައި ވަނިކޮށް، ނައިބު ރައީސް އީވާ އަބްދުﷲ ވަނީ ސަލާމް ފޮނުއްވާފައެވެ. މަޖިލީހަށް ފޮނުއްވި ސިޓީފުޅުގައި އީވާ ވިދާޅުވެފައިވަނީ ޑެންގީ ހުމަށް ޕޮޒިޓިވްވެފައި ވާކަމަށެވެ. ނަމަވެސް ނަޝީދު ވަކިކުރުމުގެ މައްސަލަ އެޖެންޑާކުރި ދުވަހަށް އީވާ ސަލާމް ހުށަހަޅުއްވާފައި މި ވަނީ، ޑެންގީހުމަށް ޕޮޒިޓިވްވެފައި ހުންނަވައިގެންވެސް އޮކްޓޯބަރު މަހުގެ 24 ވަނަ ދުވަހުގެ ރިޔާސަތު ބެލެހެއްޓެވުމަށް ފަހުގައެވެ.
