ދެވަނަ ފިޔަވަހީގެ ގޯއްޗާއި ފްލެޓަށް އެދި ހުށަހެޅި ފޯމުތައް ބާތިލް ނުކުރައްވާނެ ކަމަށް އިންތިޚާބީ ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

ހޮނިހިރު ދުވަހު ހުޅުމާލޭ ފުރަތަމަ ފިޔަވަހީގެ ރައްޔިތުންނާ ބައްދަލު ކުރައްވައި އިންތިޚާބީ ރައީސް ވިދާޅުވީ ދެވަނަ ބުރުގައި ގޯއްޗާއި ފްލެޓް ލިބޭ މީހުންގެ ފައިނަލް ލިސްޓު އާންމުކޮށް، ރައްޔިތުންނަށް ގެދޮރުގެ ޔަގީންކަން ލިބޭ ހިސާބަށް ގެންގޮސްފިނަމަ އެ ގެންދިޔަ ހިސާބަކުން މަސައްކަތް ފައްޓަވާނެ ކަމަށެވެ.

ގެދޮރުވެރިކަމުގެ އެއްވެސް މަޝްރޫއެއް ނުހުއްޓުވާނެކަން ފާހަގަކުރައްވައި އިންތިޚާބީ ރައީސް ވިދާޅުވީ އައު ސަރުކާރުގެ ވެސް އެންމެ މުހިންމު އެއް މަޝްރޫއަކީ ގެދޮރުވެރިކުރުވުމުގެ މަޝްރޫއު ކަމަށެވެ. އެގޮތުން ގެދޮރަށް އެދި ހުށަހަޅާފައިވާ އެއްވެސް ފޯމެއް އަލުން ހުށަހަޅަންޖެހޭ ގޮތަކަށް ކަންތައްނުކުރާނެ ކަމުގެ ޔަގީންކަން އިންތިޚާބީ ރައީސް ދެއްވިއެވެ. ނަމަވެސް ކަންކަން ބައްޓަންކުރަން ބޭނުންވަނީ މިހާރަށް ވުރެ ގިނަ ރައްޔިތުންނަށް ފައިދާ ވާގޮތަށް އިންސާފުވެރިކޮށް ކަމަށް އިންތިޚާބީ ރައީސް ވިދާޅުވިއެވެ.

މީގެ އިތުރުން އިންތިޚާބީ ރައީސް ވިދާޅުވީ އެމަނިކުފާނުގެ ސަރުކާރުގައި މާލޭ ސަރަހައްދުން އެކަނި 65،000 ރައްޔިތުންނަށް ބޯހިޔާވަހިކަން ފޯރުކޮށްދޭނެ ކަމަށެވެ.

އެގޮތުން ފުށިދިއްގަރު ފަޅުގެ މަޝްރޫއު ފުރަތަމަ ދެތިން މަސްތެރޭގައި އަމަލީ ފަށާނެ ކަމަށް އިންތިޚާބީ ރައީސް ވިދާޅުވިއެވެ. އެއީ އެމަނިކުފާނުގެ ސަރުކާރުގައި ހިންގާނެ އެންމެ ބޮޑު އެއް މަޝްރޫއު ކަމަށް އިންތިޚާބީ ރައީސް ވިދާޅުވިއެވެ.

ރައީސް އިބްރާހިމް މުހައްމަދު ސާލިހުގެ މިދައުރުގައި ގެދޮރުވެރިޔާއާއި ބިންވެރިޔާ މަޝްރޫއުގެ ދެވަނަ ބުރުގައި ހުށަހެޅި ފޯމުތައް އިވެލުއޭޓްކޮށް، ދާއިމީ ލިސްޓު ނެރުމަށް ކުރަންޖެހޭ މަސައްކަތް ކުރަމުންދާ ކަމަށް ހައުސިންގ މިނިސްޓްރީން ވަނީ ބުނެފައެވެ. ގިނަ ބަޔަކު ފޯމް ހުށަހަޅާފައިވާތީ، ފޯމްތައް އިވެލުއޭޓް ކުރުމަށް ވަގުތު ބޭނުންވާނެ ކަމަށާއި، މިދައުރުގެ ތެރޭގައި އެމަސައްކަތް ނިންމޭނެ ކަމަށް ލަފާނުކުރެވޭ ކަމަށް ވެސް މިނިސްޓްރީން ބުނެފައިވެއެވެ.

ބިންވެރިޔާ ސްކީމުގެ ދެވަނަ ފިޔަވަހިން ބަންޑާރަ ގޯއްޗަށް އެދި 19،347 ފޯމާއި، ގެދޮރުވެރިޔާ ސްކީމުގެ ދެވަނަ ފިޔަވަހިން ފުލެޓަށް އެދި 21،247 ފޯމް ހުށަހަޅާފައިވެއެވެ.