ފާއިތުވި މަސް ދުވަހު ރާއްޖެއިން ކޮވިޑް-19ށް ޕޮޒިޓިވްވީ 7 މީހުންކަމަށް, ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ހާމަވެއްޖެއެވެ.

އެޗްޕީއޭއިން އާންމުކުރި ޖުލައި 1ން އޮގަސްޓް 5ގެ ނިޔަލަށް ރާއްޖޭގައި ކޮވިޑްގެ ހާލަތާގުޅޭ ތަފާސްހިސާބަށް ބަލާއިރު، އެމުއްދަތުގައި މާލެއިން 5 މީހުން ޕޮޒިޓިވްވިއިރު އަތޮޅުތަކުން އެއްވެސް މީހަކު ކޮވިޑަށް ޕޮޒިޓިވްވެފައެއްނުވެއެވެ. އަދި އެހެނިހެން ހިސާބުތަކުން 2 މީހުން ކޮވިޑަށް ޕޮޒިޓިވްވެފައިވެއެވެ. މިމުއްދަތުގައި އެއްވެސް މީހަކަށް ހޮސްޕިޓަލުތަކުގައި އެޑްމިޓްކޮށްގެން ފަރުވާ ދީފައެއްނުވެއެވެ.

އެޗްޕީއޭއިން ޖޫން 11ން ޖުލައި 1އަށް އާންމުކުރި ތަފާސްހިސާބަށް ބަލާއިރު އެމުއްދަތުގައި ރާއްޖޭގައި ކޮވިޑް ޖެހިފައިވަނީ 4 މީހުންނަށެވެ.

މިއަދަދުތަކާއެކު، މިހާރު ރާއްޖޭގައި ކޮވިޑް ޖެހިފައިވާ މީހުންގެ ޖުމްލަ އަދަދަކީ 186،694ވެ. އަދި 316 މީހަކު ވަނީ މިބަލީގައި ނިޔާވެފައެވެ.

ވެކްސިންގެ ތަފާސްހިސާބުތަކަށް ބަލާއިރު، އޮގަސްޓް މަހުގެ 9 ވަނަ ދުވަހުގެ ނިޔަލަށް 399،431 މީހުން ކޮވިޑް ވެކްސިންގެ ފުރަތަމަ ޑޯޒް ޖަހާފައިވެއެވެ. އަދި 385،281 މީހުން ދެވަނަ ޑޯޒް ޖަހާފައިވާއިރު، 167،765 މީހުން ވަނީ ބޫސްޓަރ ފުރަތަމަ ޑޯޒް ޖަހާފައެވެ. ބޫސްޓަރ ދެވަނަ ޑޯޒް ޖަހާފައިވަނީ 1586 މީހުންނެވެ.