އާދަޔާ ޚިލާފަށް ފަލަވެ ހަށިގަނޑުގެ ބަރުދަން، އިސްކޮޅާއި ރޫފައަށް އެކަށޭނަ މިންވަރަށް ވުރެ އެތައް ގުނައެއް އިތުރުވުން ނުވަތަ އޮބީސިޓީއަކީ އެކަމުގެ ތަކުލީފުތައް، ދުނިޔޭގެ އެކި ކަންކޮޅުތަކުން އެތައް ބަޔަކު އުފުލަމުން ދާ ކަމެކެވެ. އޮބީސިޓީއަކީ މީހެއްގެ އަމިއްލަ އިޚުތިޔާރުގައި ޚިޔާރު ކުރާނެ ކަމެއް ނޫނެވެ. އަމިއްލަ އިޚުތިޔާރަކާ ނުލާ އާދަޔާ ޚިލާފަށް ފަލަވެ، ބަރުވުމުގެ މައްސަލައާ ބައެއް މީހުންނަށް ކުރިމަތިލާން އޮންނަނީ މަޖުބޫރުވެފައެވެ. ހަށިގަނޑުގައި އެކުލެވޭ ޖީންތަކާއި އެނޫންވެސް އެފަދަ ކަންކަމުގެ ހިއްސާ އެކަމުގައި އޮވެއެވެ.

ޖަރުމަނުވިލާތުގެ މިއުނިކްއަށް އުފަން އިރީނާ އަރންސްޓްބެއަޣަރ، ދާދި ފަހަކާ ޖެހެންދެން އޭނާގެ މުޅި އުމުރު ހުސްކުރަމުން ދިޔައީ އާދަޔާ ޚިލާފަށް ފަލަ، ބަރުހެލި މީހެއްގެ ގޮތުގައެވެ. ކޮންމެ ކަހަލަ ޑައެޓެއް ކުރި ކަމުގައި ވީ ނަމަވެސް، އިރީނާގެ އަތުގައި ނަސީބު ހިފާ ގޮތެއް ނުވިއެވެ. ނަމަވެސް، 2022 ވަނަ އަހަރު ވެގެން ދިޔައީ އެކަން ބަދަލު ކޮށްލި އަހަރަކަށެވެ. އާދަޔާ ޚިލާފަށް ފަލަވުމުގެ ބަލި ނުވަތަ އޮބީސިޓީއާ ދެކޮޅަށް ބޭނުން ކުރާ ޑްރަގެއް ކަމަށް ވާ އޯޒެމްޕިކްއަށް، އިރީނާގެ ސަބަބުން އާ ޢުއްމީދެއް ގެނެސްދިނެވެ.

ހަކުރު ބަލީގެ ވައްތަރެއް ކަމަށް ވާ ޓައިޕް-ޓޫ ޑައެބީޓިޒް ހުންނަ މީހުންގެ ފަރުވާއަށްވެސް ބޭނުން ކުރާ އޯޒެމްޕިކްއަކީ އިންޖެކްޝަންއެކެވެ. އޯޒެމްޕިކްގެ ފަރުވާގެ ދަތުރުގައި އިރީނާގެ ހަށިގަނޑުން 18 ކިލޯގްރާމް ލުއިކޮށްލެވުނެވެ.

އިރީނާ އޯޒެމްޕިކް ބޭނުން ކުރީ 7 މަސް ދުވަހުގެ މުއްދަތަށެވެ. އޯޒެމްޕިކް ބޭނުން ކުރަން ފެށި ފުރަތަމަ ހަފުތާގެ ތެރޭގައި، އަސަރު ފެންނަން ފެށިއެވެ. އިރީނާ ކިޔައިދިން ގޮތުގައި، އެ ޑްރަގްގެ ސަބަބުން، ބަނޑުހައިވާ ކަމުގެ އިޙުސާސް ކުޑަކޮށްދޭން ފެށިއެވެ. އަދި ބަނޑު ފުރިފައި ހުންނަ ކަމުގެ އިޙުސާސްވެސް ކޮށްދެއެވެ.

ހަށިގަނޑުގެ ބަރުދަނުގައި މިހާރު 60 ކިލޯގްރާމް ހުރި އިރީނާ، އޯޒެމްޕިކް ބޭނުން ކުރުން ހުއްޓާލީ މީގެ 3 މަސް ދުވަސް ކުރިންނެވެ. އިރީނާގެ މިހާރުގެ މަސައްކަތަކީ، ހަށިގަނޑު އެ ހުރި ބަރުދަނުގައި ހިފަހައްޓާލުމެވެ. ހަށިގަނޑުގެ ބަރުދަން ލުއި ކުރުމަށް އިރީނާ ހޯދި އޯޒެމްޕިކްގެ ފަރުވާއަކީ އޭނާގެ އަތުގައި އޮތް އިންޝުއަރަންސް ސްކީމުން ކަވަރުކޮށްދިން ފަރުވާއެއް ނޫނެވެ. އަމިއްލަ ޖީބުން ޚަރަދު ކުރަން މަޖުބޫރުވިއެއް ކަމަކު، އެއީ ހަމަ އެންމެ އެކަށީގެންވާ 'އިންވެސްޓްމަންޓް' އެއް ކަމަށް އިރީނާ ޤަބޫލު ކުރެއެވެ.

ބަރުދަން ލުއި ކުރުމަށް ބޭނުން ކުރާ ޑްރަގެއް ކަމަށް ވާ އޯޒެމްޕިކްއާ އެއްގޮތަށް، މިހިނގާ ޖުލައި މަހުގެ ފަހުކޮޅުން ފެށިގެން ޖަރުމަނުވިލާތުގައި ލިބެން ފަށާނެއެވެ. އެ ބޭހަށްވެސް ގިނަ ބައެއްގެ ޑިމާންޑް އޮންނާނެ ކަމަށް ޖަރުމަނުވިލާތުގެ ޑޮކްޓަރުން ޤަބޫލު ކުރެއެވެ. ނަމަވެސް، އިންޝުއަރަންސް ސްކީމްތަކަށް ބަލާއިރު، ޖަރުމަނުވިލާތުގެ 90 ޕަސެންޓް ޕޭޝަންޓުންނަށް، އެ ފަރުވާއަށްވެސް ޚަރަދު ކުރަން މަޖުބޫރުވާނީ އަމިއްލަ ޖީބުންނެވެ.

އޮބީސިޓީ ނުވަތަ އާދަޔާ ހިލާފަށް ފަލަވުމަކީ ހަމަ އެކަނި އެމީހެއްގެ ބަރުދަނަށް ބަލައިގެން ނިންމަން ވީ ކަމެއް ނޫން ކަމަށާ، އެއީ އެމީހެއްގެ މުޅި ސިއްހަތުގެ މުރާޖައާ އަކަށް ބަލައިގެން ކަނޑައަޅަންވީ ކަމެއް ކަމަށް، 2020 އަނަ އަހަރު ކެނެޑާގައި އަލަށް އެކުލަވާލި ކްލިނިކަލް ގައިޑްލައިންސްގައި ވަނީ ބަޔާންކޮށްފައެވެ. މިއާއެކު އާދަޔާ ހިފާލަށް ފަލަވާ މީހުންނަށް ހަމައެކަނި ޑައެޓް ކުރުމާ، ކަސްރަތު ކުރަން އިރުޝާދު ދިނުމުގެ އިތުރަށް، އެހެން ގޮތް ގޮތުން އެހީތެރިކަން ފޯރުކޮށްދިނުމަށްވެސް މި ގައިޑްލައިންގައި ވަނީ ޑޮކްޓަރުންނަށް ގޮވާލާފައެވެ.

އާދަޔާ ހިލާފަށް ފަލަވާން ދިމާވި އަސްލު މައްސަލައަކީ ކޮބައިކަން ދެނެގަނެ، ވަށާ ޖެހޭ ގޮތެއްގައި ދުޅަހެޔޮ ސިއްހަތެއް ކަށަވަރު ކުރުމަށް ސަމާލުކަން ދިނުން މުހިންމެވެ. އާދަޔާ ޚިލާފަށް ފަލަވުމަކީ، ޒިންމާދަރުކަން ކުޑަވެ، އަމިއްލަ ނަފުސުގެ މައްޗަށް ބާރު ނުފޯރުވުމުގެ ސަބަބުން މެދުވެރިވާ ހާލަތެއް ކަމުގައި ސިފަކުރެވެމުން އަންނަ އިރު، މިކަމުގެ ނަތީޖާއެއްގެ ގޮތުން އާދަޔާ ހިލާފަށް ފަލަ މީހުންނަށް މުޖުތަމަޢުގެ ތެރޭގައި ލަދާއި ބަދުނާމާއި ފުރައްސާރައާ ކުރިމަތިލާން ޖެހެއެވެ. އެކި ކަހަލަ ތަފާތު ކުރުންތަކާ ކުރިމަތިލާން ޖެހެއެވެ.

އާދަޔާ ހިލާފަށް ފަލަ މީހުންނަކީ، ދާއިމީ އެހެން ބަލިތަކާއެކު ދިރިއުޅޭ އެހެން މީހުން ފަދައިން އެއްބާރުލުން ބޭނުންވާ ބައެކެވެ. ހަމައެކަނި "މަދުން ކެއުމަށާ ގިނައިން ހެލިފެލިވެއުޅުމަށް" އިރުޝާދު ދިނުމުގެ ބަދަލުގައި، ނަފްސާނީ އަދި ޖިސްމާނީ ގޮތުން ފޯރުކޮށްދޭންޖެހޭ އެހީތައް ޙައްޤު ބައެކެވެ.