ބަޔަކު ކަމެއް ދޭނެ ކަމަށް، ނުވަތަ ހަވާލު ކުރާނެ ކަމަށް ނުހުންނަވާނެ ކަމަށް ކުރީގެ ޓުއަރިޒަމް މިނިސްޓަރު އަލީ ވަހީދު (ބަލަކް) ވިދާޅުވެއްޖެއެވެ.
ބަލަކް މިހެން ވިދާޅުވީ އޭނާ އިސްކޮށް ހުންނަވައި، އުފެއްދެވި އެޓޯލްސް ފުޓުބޯޅަ ކުލަބު ރަސްމީކޮށް ލޯންޗު ކުރެއްވުމަށްފަހު ނޫސްވެރިންނާ ވާހަކަފުޅުދައްކަމުންނެވެ. އެގޮތުން ދިވެހި ފުޓުބޯޅަ އަޑިއަޅާލާފައިވާ ވަގުތެއްގައި، ފުޓުބޯޅައިގެ މައި އިދާރާ ހިންގުމުގެ ވިސްނުންފުޅު ނުގެންގުޅުއްވައި، ފުޓުބޯޅަ ކުލަބެއް އުފައްދަވަން ނިންމެވީ ކީއްވެތޯ ނޫސްވެރިން ވަނީ ސުވާލު ދަންނަވާފައެވެ. އެ ސުވާލުގެ ޖަވާބުގައި ބަލަކް ވިދާޅުވީ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަކީ ދިވެހި ފުޓުބޯޅަ ކޮމިއުނިޓީގެ އެއްޗެއް ކަމަށެވެ. އެ އިދާރާގެ ރައީސްކަމުގައި ހުންނަވާނީ ފުޓުބޯޅަ ކޮމިއުނިޓީން ބޭނުންވާ ބޭފުޅެއްކަން ފާހަގަކުރައްވައި ބަަލަކް ވިދާޅުވީ، ބަޔަކާ ހަނގުރާމަކުރައްވައި ހައިޖާނު ހައްދަވައިގެން އެފްއޭއެމްގެ ރައީސްކަމަށް ވަޑައިގަތުމަށް ބޭނުންފުޅު ނުވާކަމަށެވެ. ނަމަވެސް ފުޓުބޯޅަ ކޮމިއުނިޓީގައި އުޅުއްވާ ބޭޭފުޅުން ބޭނުންފުޅުވާނަމަ، ކިޓު މެނޭޖަރެއްގެ ގޮތުގައި ވިޔަސް މަސައްކަތް ކުރައްވާނެ ކަމަށް ބަލަކް ވަނީ ވިދާޅުވެފައެވެ.
ދިވެހިރާއްޖޭގެ ފުޓުބޯޅަ ކޮމިއުނިޓީއަށް އެކަން އަޅުގަނޑަށް ކުރެވޭނެ ކަމަށް ގަބޫލުކުރާނަމަ، އެތަނުގެ ކިޓު މެނޭޖަރުކަން ވެސް އަޅުގަނޑު ކުރާނަން، އެއީ ގައުމީ ކަމަކަށް ވެއްޖިއްޔާ. އެތާ ފާޚާނާ ސާފުކުރަން އަންނަން ބުނެފިނަމަ، އެކަންވެސް ކޮށްދޭނަން. ކޮންމެހެން ބަޔަކު ކަމެއް ދޭނެ ކަމަށް، ހަވާލު ކުރާނެ ކަމަށް އަޅުގަނޑަކީ މަޑު ކުރާނެ މީހެއް ނޫން. ހުއްޓި ނުހުރެވޭނެ. އަޅުގަނޑުމެން މި ނައްޓާލީ.އަލީ ވަހީދު (ބަލަކް)
އެޓޯލްސް ފުޓުބޯޅަ ކުލަބުގެ ހެޑް ކޯޗުގެ ގޮތުގައި ފެނިގެންދާނެ ބަލަކް ވިދާޅުވީ، އެފްއޭއެމްގެ ރައީސް ބައްސާމް އަދީލް ޖަލީލަކީވެސް ވަރަށް ގާތް ރަހުމަތްތެރިއެއް ކަމަށާއި، އޮންނަނީ ރަނގަޅު ގުޅުމެއް ކަމަށެވެ. ހަމައެއާއެކު ފުޓުބޯޅައިގެ ކަންކަން ރަނގަޅު ކުރުމަށް "ސޭވް އެފްއޭއެމް"ގެ ނަމުގައި ކެމްޕެއިނެއް ފަށައިގެން އުޅުއްވާ ބޭފުޅުންނާވެސް ވަރަށް ގާތް ގުޅުމެއް އޮންނަ ކަމަށް ވަނީ ވިދާޅުވެފައެވެ.
އެޓޯލްސް ފުޓުބޯޅަ ކުލަބާއެކު ބަލަކް ވަނީ ގިނަ ލަނޑު ދަނޑިތަކެއް ކަނޑައަޅުއްވައި، އެކަން ހާސިލް ކުރުމަށް ވަކި މުއްދަތުތަކެއް ކަނޑައަޅުއްވާފައެެވެ. އިނގިރޭސިވިލާތުގެ ސްޕޯޑިން ލަންޑަނުގެ ކޯޗަކަށް މަސައްކަތްކުރެއްވި ދުވަސްވަރު ލިބިވަޑައިގެން ތަޖުރިބާއާއެކު، ބަލަކްގެ އަމާޒަކީ ދިވެހި ފުޓުބޯޅައިގެވެސް އައު ޖީލެއް ބިނާކުރެއްވުމެވެ.