ފަލަސްޠީނަށް ނިސްބަތްވާ އަލްމަޚާޠާ މަޚުރީފާއަކީ ސަޢުދީ އަރަބިއްޔާގެ ރަސްގެފާނު، ސަލްމާން ބިން ޢަބްދުޢަޒީޒު ދެއްވާ ހިލޭ ޙައްޖު ދަތުރުތަކުގެ ތެރެއިން ފުރުޞަތު ލިބިފައިވާ މުސްލިމު އުޚުތެކެވެ.
2006 ވަނަ އަހަރު ޣައްޒާގައި ކުރި ހަނގުރާމައިގެ ތެރޭގައި، އަލްމަޚާޠާގެ ފިރިހެން ދަރިފުޅު ވަނީ މަރާލާފައެވެ. އޭގެ ފަހުން ފާއިތުވީ 17 އަހަރު ދުވަސް، އަލްމަޚާޠާ ހޭދަ ކުރީ، ޙައްޖުގެ މަތިވެރިކަން އަޅުކަން އަދާ ކުރުމަށް މައްކާއަށް ދެވޭނެ ދުވަހެއްގެ އިންތިޒާރުގައެވެ.
މަގޭ ދަރިފުޅާ. މަންމަ މިއަދު މިއައީ، މި އަހަރު ޙައްޖުގެ އަޅުކަމަށް ފުރާ ވާހަކަ ބުނަން. 17 އަހަރު އިންތިޒާރު ކުރެވިއްޖެ. ވަރަށް ވޭނުގަ އުޅެވިއްޖެ. ﷲގެ އިރާދަފުޅުން މި ދެވެނީ ކަޢުބަތުﷲ ގެފުޅަށް. ގެފުޅަށް ގޮސް އެތަން ދެކިލަން. ﷲ އަށް ޙަމްދުހުރި. ގެފުޅަށް ޒިޔާރަތްކޮށްލުމުގެ ފުރުޞަތު، މި މަންމައަށް ހޯދާދިނީ، ތި ދަރިފުޅު ފުރާނައިން ވި ޤުރުބާނީއިން.އަލްމަޚާޠާ މަޚުރީފާ؛ ފަލަސްޠީނުގެ ރައްޔިތެއް
ޔަހޫދީ އިޒްރޭލުން ފަލަސްޠީނުގެ ރައްޔިތުންނަށް ދެމުންދާ އަނިޔާތަކުގެ ޝިކާރައަކަށް ވެފައިވާ މީހުންނަށް ނުވަތަ ހަމަނުޖެހުންތަކުގެ އަސަރު ފޯރާފައިވާ މީހުންގެ ތެރެއިން ބަޔަކަށް، އެއްވެސް ފީ އެއް ދެއްކުމަކާ ނުލާ ޙައްޖުގެ އަޅުކަން އަދާ ކުރުމުގެ ފުރުޞަތު، ސަލްމާން ރަސްގެފާނު ހޯއްދަވާ ދެއްވައެވެ. ސަލްމާން ރަސްގެފާނު އެކަން އެގޮތަށް ކުރައްވަމުން ގެންދަވާތާ 10 ވަރަކަށް އަހަރަށް ވުރެ ގިނަ ދުވަސް ވެފައި ވާ އިރު، ކޮންމެ އަހަރަކުވެސް ފަލަސްޠީނުން 1000 މީހަކަށް އެ ފުރުޞަތު ދެއްވައެވެ.
މަސްހުނި އިޙުސާސްތަކެއް ކުރެވެނީ. އުފާވޭ، ދެރަވެސްވޭ. އަހަރަމެންގެ ދަރިން މަރާ، ނުވިތާކަށް އެ ދަރިންގެ ހަށިތައްވެސް އިޒްރޭލުން ހިފަހައްޓައިގެން އުޅޭތީ ވަރަށް ދެރަވޭ. އެ ދަރިންގެ މަސްގަނޑުވެސް ނުފެނޭ. އެ ދަރިން ވީ ތަނެއްވެސް ނޭނގެ. ދަރިންގެ ޙައްޤުގަ އަހަރަމެންނަށް މިކަހަލަ ފުރުޞަތެއް ލިބުނީތީ އުފާވެސް ކުރަން. އަހަރަމެންނަށް މި ފުރުޞަތު ދިނީ ސަޢުދީ އަރަބިއްޔާއިން. ރަސްގެފާނާއި، ސަޢުދީ ރައްޔިތުންނާއި ސަރުކާރަށް ޝުކުރު އަދާ ކުރަން.ޢުއްމު ބިލާލް؛ އިޒްރޭލުން މަރާލި ފަލަސްޠީނު މީހެއްގެ މަންމަ
ދުނިޔޭގެ އެކިކަންކޮޅުތަކަށް ފެތުރިފައިވާ މުސްލިމު ޙަޟާރަތުން ޙައްޖުގެ އަޅުކަމަށް ކުރާ ޑިމާންޑާއެކު، ފަލަސްޠީނުގެ ރައްޔިތުން، ހައްޖުގެ އަޅުކަން އަދާ ކުރުމުގެ ނިޔަތުގައި މައްކާއަށް ދިއުމަށް އެތައް އަހަރެއް ވަންދެން އިންތިޒާރު ކުރެއެވެ.
ބަޔާންވެސް ކޮށްދޭން ނޭނގޭ ކަހަލަ އުފަލެއް އިޙުސާސް ކުރެވެނީ. ވަރަށް އުފާވެފަ އަހަރެން މި އިނީ. އަހަންނަކީ، ޝަހީދެއްގެ ފަޚުރުވެރި މައެއް. ކަޢުބަތުﷲ ގެފުޅަށް ދެވޭނެ މަގު ތަނަވަސް މި ވީ ދަރިފުޅާ ހެދި... މި ދުވަހަށް އިންތިޒާރު ކުރާތާ 17 އަހަރު މިވީ. ކަޢުބަތުﷲ ގެފުޅަށް ޒިޔާރަތް ކުރެވޭނެ ދުވަހެއްގެ ހުވަފެންތައް ދެކެން. ކަޢުބަތުﷲ ގެފުޅަށް ޒިޠާރަތް ކުރެވޭތީ އަހަރެން އުފާ ކުރަން. ސަލާމަތުން އެތަނަށް ގޮސް، ގެފުޅު ދެކިލުން ޢުއްމީދަކީ.އަލްމަޚާޠާ މަޚުރީފާ؛ ފަލަސްޠީނުގެ ރައްޔިތެއް
ފަލަސްޠީނުގެ އޮފިޝަލުން ވިދާޅުވާ ގޮތުގައި ޙައްޖުވުމުގެ ފުރުޞަތު ލިބޭ މީހުން ހޮވަނީ، ހުޅަނގު އައްސޭރި، ޣައްޒާ އަދި ޤުދުސްއިން އެއް ހަމައެއްގައެވެ.
ފަލަސްޠީނުގެ ރައްޔިތުން ދެކޭ ގޮތުގައި ސަޢުދީ އަރަބިއްޔާއިން ތަނަވަސްކޮށްދޭ މި ފުރުޞަތަކީ، ފަލަސްޠީނު ރައްޔިތުންގެ އަގު ވަޒަން ކުރާ ކަމުގެ ރަމްޒެކެވެ.
މުޅި ދުނިޔެ އިނދަޖައްސާލި ކޮވިޑް-19ގެ ބަލިމަޑުކަމާ ގުޅިގެން އެޅި ހަރުކަށި ހުރިހާ ފިޔަވަޅެއް އުވާލުމަށްފަހު މުސްލިމުންނާ ބައްދަލުކުރާ ފުރަތަމަ ޙައްޖު ދުވަހަށް ސަޢުދީއިން ދަނީ ވީ އެންމެ ފުރިހަމައަކަށް ތައްޔާރު ވަމުންނެވެ. 1444 ވަނަ އަހަރުގެ ޙައްޖުގެ އަޅުކަމުގައި 2.6 މިލިއަނެއްހާ މުސްލިމުން ބައިވެރިވާ ކަމަށް މަޢުލޫމާތު ލިބެއެވެ. މިއަހަރުގެ ޙައްޖު ދުވަސް ނުވަތަ އަރަފާތު ދުވަހަކީ ޖޫން 27 ވާ އަންގާރަ ދުވަހެވެ.
