ދަރިއަކު ބަލާ ބޮޑު ކުރުމަކީ ހީވެސް ނުކުރާ ކަހަލަ ކަންކަމާއި ހާލަތްތަކާއި ކުރިމަތި ކުރުވާ ކަމެކެވެ. ދަރިންނަކީ މާތް ﷲ ގެ ޙަޟްރަތުން ދެއްވާފައިވާ އަމާނާތަކަށް ވާ ހިނދު، އެ ދަރިންނާ މެދު ފަރުވާތެރިވާންޖެހެއެވެ. ވަކިން ހާއްސަކޮށް، އެ ދަރިންގެ ފުރާނައާ ގުޅިފައިވާ ސިއްޙަތާ މެދު ހާއްސަ ސަމާލު ކަމެއް ދޭން ޖެހެއެވެ.
ޅަފަތުގެ ދުވަސްވަރަކީ ބާރު ދުވެއްޔެއްގައި ކުއްޖާ ހެދިބޮޑުވަމުން އަންނަ ދުވަސްވަރަކަށް ވާ އިރު، ސިއްހީ ގޮތުން ސަމާލުކަން ދޭންޖެހޭ ކަންތައްތައް ވެސް ގިނައެވެ. ހީވެސް ނުކޮށް ހުއްޓާ، ކޮންމެ ފަދަ ކަމެއްވެސް ވެދާނެއެވެ. ނަމަވެސް، ކޮންމެ ފަހަރަކީ، ވަގުތުން ވަގުތަށް، ކުޑަ ކުދިންގެ ޑޮކްޓަރަކާ ހިސާބަށް ދެވޭނެ ވަޤުތަކަށްވެސް އޮންނަނީ ނުވެފައެވެ. ނަތީޖާއެއްގެ ގޮތުން، ބަވަނަވެފައިވާ އަދުގެ ދުނިޔޭގައި މައިންގެ އެންމެ ގާތް އެކުވެރިއަކަށް ވެފައި އޮންނަނީ އިންޓަރނެޓްއެވެ. ނަމަވެސް، އެގޮތަށް ލިބޭ މަޢުލޫމާތަކީ ގިނަ ފަހަރަށް، އެންމެ ސައްހަ މައުލޫމާތު ކަމަށް އޮންނަނީ ނުވެފައެވެ.
އެކަން ބަރޯސާ ވަނީ ސުވާލު ކުރާ އެޕްލެކޭޝަންއަކަށް. ކޮންމެ ކޮންމެ މީހަކަށް ޖަވާބު ދެވޭ ގޮތަށް ހުންނަ އެޕްލިކޭޝަންތަކުގެ ނުރައްކާ ބޮޑު. ސުވާލު ކުރާ މީހާގެ ޢާއިލާ އެ ބަރޯސާވަނީ އިތުބާރު ކުރާނެ އަސާސެއް ނެތް މަސްދަރަކުން އަންނަ މަޢުލުމާތަށް. އެކަމުގެ ނޭދެވޭ އަސަރު، ދަރިންނަށް ފޯރުން އެކަށީގެންވޭ. އެއާ ޚިލާފަށް، އިތުބާރު ހިފޭ މަސްދަރުތަކުން އަންނަ މަޢުލޫމާތު ލިބޭ އެޕްލިކޭޝަންއާއެކު ޢާއިލާއަށްވެސް ހަމަޖެހުން ލިބޭނެ. ސައެންސްގެ ގޮތުން ބަލާއިރުވެސް ދަރިންނަށް ފައިދާ ކުރާ މަޢުލޫމާތު ލިބޭ ކަމުގެ ހިތްހަމަޖެހުން ލިބޭނެ.ޑރ ފިރާޒް ރާބިއާ؛ ކުޑަކުދިންގެ ޑޮކްޓަރ
އިންޓަރނެޓުން ލިބެން ހުންނަ ސައްހަކަން ބޮޑު، ގިނަ މައުލޫމާތަކީ އިނގިރޭސި ބަހުން، ހުޅަނގުގެ އާދަކާދައަށް ފެތޭ ގޮތަށް ލިޔެފައި ހުންނަ ލިޔެކިއުންތަކެއް ކަމީ، މައިންނަށް ކުރިމަތިލާންޖެހޭ އިތުރު ތަކުލީފަކަށް އޮންނަނީ ވެފައެވެ. ޢަރަބި ދުނިޔޭގެ މައިންނަށް މިކަމުގައި ހައްލެއް ހޯދާދިން އެކަކީ ޢުރުދުންއަށް ނިސްބަތްވާ، 2 ދަރިންގެ މަންމަ، ދީނާ ޢަބްދުލްމަޖީދުއެވެ. ދަރިންގެ ސިއްހީ ކަންކަމާއި، ޒަމާނީ އުސޫލުތަކާ އެއްގޮތަށް ދަރިން ބަލާނެ އުސޫލުތައް ދެނެގަތުމުގައި ދީނާއަކީވެސް ގިނަ ގޮންޖެހުންތަކެއް ހުރަސް ކުރި މައެކެވެ.
ކުޑަކުދިންގެ ސިއްހީ ކަންކަމާ ބެހޭ އެންމެ ސައްހަ މަޢުލޫމާތު ނެޓުން ލިބެން ނުހުންނާތީ، ޢަރަބި ދުނިޔޭގަ، ގިނަ ފަހަރަށް އެކަކު އަނެކަކު ގާތު މި އަހަނީ... ޑޮކްޓަރުންނާއި ސްޕެޝަލިސްޓުން ގާތު އެހުމުގެ ބަދަލުގަ. ގިނަ ފަހަރަށް އެގޮތަށް ފޯރުކޮށްދެވޭ މަޢުލޫމާތަކީ އެންމެ ސައްހަ މަޢުލޫމާތަށްވެސް އޮންނަނީ ނުވެފަ. އެކަމަކު އަސަރު، އެ އާއިލާއެއްގެ މުސްތަޤުބަލާއި ސިއްހަތަށް ކުރޭ.ދީނާ ޢަބްދުލްމަޖީދު؛ 360މަމްސްގެ ފައުންޑަރ
އެގޮތުގައި މާ ގިނަ ދުވަސްތަކެއް ހޭދަ ކުރާކަށް ދީނާގެ ހިތެއް ނުރުހުނެވެ. އިސާހިތަކު، "360މަމްސް" ގެނަމުގައި، ޢަރަބި ބަހުން، ވެބްސައިޓްއަކާއި އެޕްލިކޭޝަނެއް ލޯންޗްކުރިއެވެ. މަޤްޞަދަކަށް ވީ ކުޑަކުދިންގެ ޖިސްމާނީ އަދި ނަފްސާނީ ސިއްހަތުގެ އިތުރުން، ޒަމާނީ އުސޫލުތަކާ އެއްގޮތަށް ދަރިން ބަލާނެ ގޮތުގެ ސައްހަ މައުލޫމާތު، ސީދާ ޢަރަބި ބަހުން ފޯރުކޮށްދިނުމެވެ.
360މަމްސްއަކީ ދަރިންގެ ޖިސްމާނީ އަދި ނަފްސާނީ ސިއްޙަތާ ބެހޭ، އަދި އެންމެ ޒަމާނީ ހޯދުންތަކާ އެއްގޮތަށް ދަރިން ބަލާނެ އިރުޝާދާއި، އެންމެ ސައްހަ މަޢުލޫމާތު ހޯދުމަށް، މަންމައިންނާއި ބައްޕައިންނަށް އެހީވެދޭ ޕްލެޓްފޯމެއް.ދީނާ ޢަބްދުލްމަޖީދު؛ 360މަމްސްގެ ފައުންޑަރ
ދީނާގެ "360މަމްސް" ނެޓްވޯކްގައި 300 އަށް ވުރެ ގިނަ ތަޖުރިބާކާރުންނާއި ޑޮކްޓަރުންވެސް ހަރަކާތްތެރިވެއެވެ. ބެލެނިވެރިންގެ ހިތްތަކުގައި އުފެދޭ ސުވާލުތަކަށް ޖަވާބު ދިނުމުގައި އެ ޓީމުންވެސް ހަރަކާތްތެރި ދައުރެއް އަދާ ކުރެއެވެ.
2017 ވަނަ އަހަރުން ފެށިގެން ލައިވްކޮށްފައިވާ "360މަމްސް" ވެބްސައިޓަށް މަހެއްގެ މައްޗަށް ވަންނަ މީހުންގެ ޢަދަދު 5 ލައްކައާ ގާތް ކުރެއެވެ. 2020 ވަނަ އަހަރު ލޯންޗްކުރި އެޕްލިކޭޝަނަށް އިޝްތިރާކު ދެއްކި މީހުންގެ ޢަދަދު 60000 އަށް އަރައެވެ.
"360މަމްސް" ޤަވައިދުން ބޭނުން ކުރަމުން އަންނަ އެކަކީ ބާނާ ބަތާއިނީއެވެ. 2 ދަރިންގެ މަންމަ، ބާނާއަށްވެސް "360މަމްސް"ގެ ސަބަބުން ލިބޭ ލުއި ފަސޭހަކަން ބޮޑެވެ.
360މަމްސްގެ ސަބަބުން ވަރަށް ވަޤުތު ސަލާމަތްވޭ. ހައްޓަށްވެސް ލުއި. ކޮންމެ ފަހަރަކު ޑޮކްޓަރަށް ދައްކަން ގޮސް، އެތަނުގައި ގިނަ ވަޤުތުތަކެއް ހޭދަ ކުރާކަށް ނުޖެހޭ ވަކި ސުވާލެއް ކުރާކަށް. އެޕްލިކޭޝަން ހުޅުވާލާފަ ވަރަށް ފަސޭހައިން ސުވާލު ކޮށްލެވޭ. ނޫނީ އެހެން މީހަކު އެ ސުވާލުކޮށް، ޖަވާބު ދީފަ ހުރިތޯ ސާޗްވެސް ކޮށްލެވޭ. ވަރަށް ބޮޑަށް ވަޤުތު ސަލާމަތް ކުރެވޭ.ބާނާ ބަތާއިނީ؛ 2 ދަރިންގެ މަންމައެއް
ވާނުވާ ނޭނގިގެން އުޅެން ޖެހޭ ޖެހުމަށްވެސް ހައްލު ލިބެއެވެ.
360މަމްސްގެ ސަބަބުން މަށަށް ވަރަށް ފައިދާ ކުރޭ. އެންމެ ފުރަތަމަ، ކުޑަކުދިންނާ ބެހޭ މާ ގިނަ މަޢުލޫމާތެއް މަށަކަށް ނޭނގޭ. ނޭނގޭ ގިނަ ކަންތައްތަކެއް ހުރި. މަށަކީ ޤަވައިދުން އެޕްލިކޭޝަން ބޭނުން ކުރާ މީހެއް. މީހުންގެ ސުވާލުތައް ކިއާ، އެމީހުންގެ ތަޖުރިބާތަކުން ކަންކަން ދަސްކުރާ މީހެއް. ބައެއް ފަހަރު، ސުވާލެއް ކޮށްލަންވެސް މަށަކަށް ނޭނގޭ. ނޫނީ ސުވާލެއް ކުރަންވެސް ހިތަށް ނާރަފާނެ. އެކަމަކު، މި އެޕްލިކޭޝަންގެ އެހީގަ، އަހަރެންގެ ދަރިންގެ ކަންކަން ކުރާނެ ގޮތްތައް އެބަ އެނގިގެން ދޭ.ބާނާ ބަތާއިނީ؛ 2 ދަރިންގެ މަންމައެއް
"360މަމްސް" ފަރުމާ ކޮށްފައި ވަނީ ބައެއް ޚިދުމަތްތައް، އެއްވެސް އަގަކާ ނުލާ ހޯދޭ ގޮތަށެވެ. ވަށާ ޖެހޭ ޚިދުމަތެއް ހޯދުމަށް، ކަނޑައަޅާފައިވާ ވަކި އަގެއް، އިޝްތިރާކުގެ ގޮތުގައި ދައްކަން ޖެހެއެވެ.
