ކޮންމެ ދުވަހަކުވެސް ފަތިސް ނަމާދަށް ބަންގި ގޮވުމުގެ ކުރިން، ޢުމުރުން 84 އަހަރުގެ ޞާލިޙް އަބޫ ހަލާވީ، ހިބްރޫންގެ އިބްރާހީމީ މިސްކިތާ ދިމާއަށް މިޞްރާބު ޖަހައެވެ.
އަބޫ ހަލާވީ ބުނާ ގޮތުގައި އޭނާގެ އެންމެ ޒުވާން ދުވަސްވަރުން ފަށައިގެންވެސް އޭނާ ދަނީ ހަމަ އެ މިސްކިތަށެވެ. މިއަދު އޭނާ ދަނީ، އެ އާދަ، އޭނާގެ ކާފަ ދަރިންގެ ކިބައިގައި އަށަގެންނެވުމުގެ މަސައްކަތް ކުރަމުންނެވެ. މިސްކިތަށް ދަނީ ކާފަ ދަރިންވެސް ގޮވައިގެންނެވެ.
އަހަރެން ވަރަށް ޅައިރުއްސުރެ، އަހަރެންގެ މައިންބަފައިންނާއި މާމަކާފަމެންނާއެކީ، ދުވާލުގެ ފަރުޟު ފަސް ނަމާދު ކުރަން އަންނަނީ މި މިސްކިތަށް. މިތަނަށް އަންނަން ހުންނަނީ އާދަވެފަ. މިހާރުވެސް މި އަންނަނީ މިތަނަށް. އަހަރެންގެ ކާފަދަރިންނަށްވެސް ހިތްވަރު ދެން މިތަނަށް އަންނަން މަށާ އެކީގަ. ވަކިން ހާއްސަކޮށް ހުކުރު ދުވަސްދުވަހު.ޞާލިޙް އަބޫ ހަލާވީ؛ ހިބްރޫންގެ ރަށްވެއްސެއް
އެ ސަރަޙައްދުގެ އާންމުން ބުނާ ގޮތުގައި، އިބްރާހީމީ މިސްކިތް ފަޅުކޮށް އޮންނަތާ އަހަރުތަކެއް ވެއްޖެއެވެ. އެހެން ކަމުން، މިސްކިތަށް ދިރުން ގެނެސް، ރޫޙު ޢާލާ ކުރުމުގެ މަސައްކަތް ފެށީއެވެ.
ވީހާވެސް ގިނަ ޢަދަދެއްގެ ބަޔަކު މިސްކިތަށް އަންނާނެކަން ކަށަވަރު ކުރުމަށް ހިބްރޫންގެ ޢާއިލާތަކުން ދަނީ، އަޅުކަމަށް އަންނަ މީހުންނަށް ހާއްސަކޮށްގެން އެކި ކަހަލަ ފޮނިކާތަކެއްޗާއި، ބުއިންތަކާއި ސޫޕްތައް ފޯރުކޮށްދެމުންނެވެ.
މިފަހަކަށް އައިސް މީހުން އެބަ އާދޭ އިބްރާހިމީ މިސްކިތަށް. ވަކިން ހާއްސަކޮށް ފަތިސް ނަމާދުގެ ޖަމާއަތަށް އެބަ އާދޭ. މާތް ﷲގެ މަގުގައި ހޭދަ ކުރުމުގެ ގޮތުން، ހިބްރޫންގެ ބައެއް ޢާއިލާތަކުން މިތަނަށް އެބަ ގެނޭ ކާބޯތަކެއްޗާއި ފޮނިކާއެއްޗިހިވެސް.ޞާލިޙް އަބޫ ހަލާވީ؛ ހިބްރޫންގެ ރަށްވެއްސެއް
މިއަދު އިބްރާހީމި މިސްކިތުގައި ނަމާދު ކުރާ މީހުންގެ ޢަދަދު، ހާހުން ގުނާލެވެއެވެ.
1994 ވަނަ އަހަރުގެ ޤަޠުލުއާންމަށްފަހު، ދެން ޖެހިގެން އައި އަހަރުތަކުގަ އިބްރާހީމީ މިސްކިތަށް ނަމާދަށް އަރާ މީހުންގެ ޢަދަދު ވަރަށް މަދުވެގެން ދިޔަ. ބައެއް ދުވަސްދުވަސް ދިޔަ، ވިއްސަކަށް މީހުންވެސް ޖަމާޢަތުގަ ހަމަ ނުވާ ދުވަސްދުވަސް. އޭރު 6 މަހެއްހާ ދުވަހަށް މިސްކިތް ބަންދުވެސް ކުރި. 6 މަހަށް މިސްކިތް ބަންދުކޮށްފަ ދެން ހުޅުވިފަހުން، އެތައް އަހަރަކަށް މިސްކިތް އޮތީ ފަޅަށް. ހިބްރޫންގެ ޢާއިލާތަކުން މަސައްކަތްކޮށްގެން މިސްކިތުގެ ރޫޙު މިވަނީ ދިރުވާފަ. ﷲ އަށް ޙަމްދު ހުރި. މިއަދު، އިބްރާހީމީ މިސްކިތުގެ ޖަމާޢަތަށް މީހުން އެބަ އާދޭ ހާހުން.ވިސާމް އަލް-ކުރުދް؛ ފިހާރައެއް ހިންގާ މީހެއް
ހިބްރޫންއަކީ އިޒްރޭލުން ވެރިވެގެންފައިވާ ހުޅަނގު އައްސޭރީގައި ވާ، ފަލަސްޠީނުގެ އެންމެ ބޮޑު ސިޓީއެވެ. އާބާދީގައި ގާތްގަނޑަކަށް 2 ލައްކަ މީހުން އުޅެއެވެ. ސިޓީގެ އެންމެ ސަރަޙައްދުގައި އިޒްރޭލުގެ 1000 އެއްހާ މީހުން ވަޒަންވެރިވެގެން އުޅެއެވެ.
އިބްރާހިމީ މިސްކިތަކީ މުސްލިމުންނާއި ޔަޙޫދީންނާ ދެމެދު، ދީނީ ދެބަސްވުންތައް ހިނގާ މައިދާނެކެވެ. މުސްލިމުންނަށް އެއީ އިބްރާހިމީ މިސްކިތެވެ. ޔަޙޫދީންނަށް އެއީ އެމީހުންގެ ދީނީ ޤަބޫލުކުރުންތަކާ ގުޅިފައިވާ މަޤުބަރާއެކެވެ.
އިބްރާހިމީ މިސްކިތަކީ 1994 ވަނަ އަހަރު، އިޒްރޭލަށް ނިސްބަތްވާ ބަރޫޗް ގޯލްސްޓީން، ވަރުގަދަ ޤަޠުލުއާންމެއް ހިންގި މިސްކިތެކެވެ. މިސްކިތުގައި އަޅުކަމަށް ތިބި މީހުންނަށް އަމާޒުކޮށް، މެޝިން ބަޑި ބޭނުންކޮށްގެން ދިން ހަމަލާގައި، ފަލަސްޠީނުގެ 29 މީހަކު ވަނީ ޝަހީދު ކޮށްލާފައެވެ. ގިނަ ޢަދަދެއްގެ ބަޔަކު ޒަޚަމްވިއެވެ. މާ ލަސްތަކެއް ނުވެ، އިޒްރޭލުގެ ޔަހޫދީ ބާރުތަކުން، އިބްރާހިމީ މިސްކިތް ދެބައިކުރިއެވެ. މުސްލިމުންނަށް ފަޅިއެއް، އަދި ޔަހޫދީންނަށް ފަޅިއެއް ވާ ގޮތަށެވެ.
ފަލަސްޠީނުގެ ރައްޔިތުން ބުނާ ގޮތުގައި، މުސްލިމުން އެ މިސްކިތަށް ވަނުމަށް، އިޒްރޭލުގެ ކަމާ ފަރާތްތަކުން އާންމު ގޮތެއްގައި ހުރަސް އަޅައެވެ. މިސްކިތާ ހަމައަށް މުސްލިމުންނަށް ދެވެނީވެސް އިޒްރޭލުގެ އަސްކަރީ ޗެކްޕޮއިންޓްތައް ހުރަސްކޮށްފައެވެ.
