ކޮވިޑް-19 ގެ ހާލަތުގައި ރާއްޖޭގެ ފަތުރުވެރިކަމުގެ ސިނާއަތް އިނދަޖެހުނު ނަމަވެސް މިހާރު ފަތުރުވެރިކަމުގެ ސިނާއަތް މި އަންނަނީ ކުރިއަރަމުންނެވެ. މިދިޔަ އަހަރުވެސް ފަތުރުވެރިކަމުގެ ސިނާއަތުގައި އެތައް ގިނަގުނަ ކާމިޔާބީތަކެއް ރާއްޖެ ވަނީ ހޯދާފައެވެ. އެގޮތުން އެތައް އެވޯޑުތަކެއް ހާސިލްކޮށްފައިވާއިރު ފަތުރުވެރިން ރާއްޖެ ގެނައުމަށްޓަކައި ކަނޑައެޅި ޓާގެޓުތައް ވެސް ވަނީ ހާސިލުވެފައެވެ.

ރާއްޖެ އަންނަ ފަތުރުވެރިންގެ އަދަދު އެއް ދުވަހުން އަނެއް ދުވަހަށް އިތުރުވަމުންދާއިރު، ފަތުރުވެރިން ރާއްޖޭގައި ހޭދަކުރާ ދުވަސްތައްވެސް ދަނީ އިތުރުވަމުންނެވެ. ފަތުރުވެރިންގެ ބެޑް ނައިޓްސް އިތުރުވެފައިވާއިރު، ރާއްޖޭގެ ފަތުރުވެރިކަން މިވަނީ މުޅިން އައު މާކެޓުތަކަށްވެސް ފުޅާވެގެންގޮސްފައެވެ.

ކޮވިޑުގެ ކުރިން ރާއްޖެއަށް އެންމެ ގިނައިން ފަތުރުވެރިން އައިސްފައިވާ މާކެޓަކީ ޗައިނާއެވެ. ކޮވިޑް-19ގެ ބަލިމަޑުކަމާ ގުޅިގެން ޗައިނާއިން ރާއްޖެއަށް ފަތުރުވެރިން އައުން އޮތީ ފާއިތުވި ތިން އަހަރު ދުވަހު ވެސް ހުއްޓިފައެވެ. އެހެންނަމަވެސް ތިން އަހަރުގެ މެދުކެނޑުމަކަށްފަހު ޗައިނާގެ ފަތުރުވެރިން ވަނީ ރާއްޖެ އައިސްފައެވެ. ސަރުކާރުން ޗައިނާ ފަތުރުވެރިންނަށް މަރުހަބާ ކިޔާފައިވަނީ ވަރަށް ތަފާތު ގޮތަކަށެވެ.

ބޮޑު މެދުކެނޑުމަކަށްފަހު ރާއްޖެއަށް އެންމެ ފުރަތަމަ ޗައިނާ ފަތުރުވެރިންނާއެކު އައި ބޯޓަކީ، ޗައިނާގެ ވެރިރަށް ބެއިޖިންގގެ ކެޕިޓަލް އެއަރލައިންސްގެ ބޯޓެވެ. އެ ބޯޓުން 198 ފަތުރުވެރިން ވަނީ އައިސްފައެވެ. ބެއިޖިންގ ކެޕިޓަލް އެއަރލައިން ރާއްޖެއަށް އައުމާ ގުޅިގެން މޯލްޑިވްސް އެއަރޕޯޓްސް ކޮންޕެނީ ލިމިޓެޑް (އެމްއޭސީއެލް) އިން ވަނީ އެކަން ފާހަގަކުރުމުގެ ގޮތުން ޚާއްސަ ހަރަކާތެއް ބާއްވާފައެވެ. މި ހަރަކާތުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމާއި އެމްއެމްޕީއާރްސީގެ މެނޭޖިންގ ޑިރެކްޓަރު ތޮއްޔިބު ބައިވެރިވެވަޑައިގެންނެވިއެވެ.

ޗައިނާ ފަތުރުވެރިންނަށް ރާއްޖެއިން މަރުހަބާ ކީ ރަތް ކުލައިގެ ފިނިފެން މަލުންނެވެ. އަދި ސަޤާފީ ހަރަކާތްތަކާއެކު އެމީހުންނަށް ޚާއްސަ ގިފްޓު ޕެކެއް ވެސް ވަނީ ދީފައެވެ. ކޮންމެ ފަތުރުވެރިޔަކަށް ފިނިފެންމަލެއް ވަނީ ދީފައެވެ. އެމީހުންނަށް ފިނިފެންމާ ދޭން ތިބި ދިވެހިން ތިބީ ރަތް ކުލައިގެ ދިވެހި ލިބާހާއި ދިގު ހެދުމުގައެވެ. ޗައިނާ ފަތުރުވެރިންގެ މޫނުމަތިން ވެސް ފެނިގެން ދިޔައީ އުފާވެރިކަމެވެ. ހިނިތުންވުމެވެ. ތިން އަހަރު ދުވަހުގެ މެދުކެނޑުމަކަށްފަހު ޗައިނާ ފަތުރުވެރިން ރާއްޖެ އައުމުން، އެ މީހުންނަށް ރާއްޖެއިން މަރުހަބާ ކީ ގޮތް ހަނދާނުން ފޮހެލަން ދަތިވާނެކަން ޔަޤީނެވެ.  

މުޅި ދުނިޔެއަށް ރާއްޖޭގެ ފަތުރުވެރިކަން އިޝްތިހާރުވެގެން ގޮސްފައިވާއިރު، ރާއްޖެއަކީ މިހާރު ހަމައެކަނި ލަގްޒަރީ ޑެސްޓިނޭޝަނެއް ނޫނެވެ. ރާއްޖޭގެ ވަން އައިލެންޑް ވަން ރިސޯޓް ކޮންސެޕްޓް ބޮޑު ތަރުހީބެއް ހޯދައިފައިވާއިރު، ރާއްޖެއަކީ މިހާރު ހުރިހާ ފަންތިއަކާއި ގިންތިއެއްގެ ފަތުރުވެރިންނަށް ޚިދުމަތްދެވޭނެ މަންޒިލަކަށް މިވަނީ ވެފައެވެ. ޗައިނާގެ މާކެޓާއެކު ރާއްޖޭގެ ފަތުރުވެރިކަން އިތުރު ހަރުފަތަކަށް ގެންދެވޭނެކަމުގެ އުންމީދު މިވަނީ ބޮޑުވެފައެވެ.