އެމެރިކާ އާއެކު މިހާރުން މިހާރަށްވެސް ގައިދީން ބަދަލުކުރުމަށް އިރާނުން އޮތީ ތައްޔާރަށްކަމަށް އިރާނުގެ ފޮރިން މިނިސްޓަރ ހުސެން އާމިރް އަބްދުﷲހިއަން ވިދާޅުވެއްޖެއެވެ.
ޖަރމަނީގައި ހުންނަވާ ވާހަކަފުޅު ދައްކަވަމުން އިރާނުގެ ފޮރިން މިނިސްޓަރ ވިދާޅުވީ 2015 ވަނަ އަހަރު އެކުލަވާލާފައިވާ އީރާނުން ނިއުކްލިއާ އެއްބަސްވުމަށް އަލުން އަމަލުކުރަން ފެށުމާއި ގުޅޭގޮތުން ކުރިޔަށްދާ މަޝްވަރާތައް ފެއިލްވެއްޖެނަމަ އެކަމުގެ ޒިންމާ ނަގަން ޖެހޭނީ ހުޅަނގުން ކަމަށެވެ. އެއީ އިރާނުން މިކަމުގައި ރަނގަޅު އެއްބަސްވުމަކާއި ހަމައަށް އައުމަށް ތައްޔާރަށް އޮތުމުން ކަމަށް ވިދާޅުވިއެވެ.
ހުސެން އާމިރު އިތުރަށް ވިދާޅުވީ އިރާނުން ގަބޫލުކުރާ ގޮތުގައި ގައިދީން ބަދަލުކުރުމަކީ ނިޔުކުލިއަރ އެއްބަސްވުމާއި ގުޅުން ހުރި ކަމެއްނޫނެވެ. އެކަމަކީ އިންސާނިއްޔަތާ ގުޅުންހުރި ކަމެއްކަމަށް ވިދާޅުވިއެވެ. އެހެންކަމުން މިހާރުން މިހާރަށްވެސް އެކަން ކުރެވޭނެކަމަށް ވިދާޅުވިއެވެ.
އޮސްޓްރޭލިއާގެ ވިއެނާގައި ކުރިޔަށްދާ މަޝްވަރާތަކުގައި އިރާނާއެކު މިއެއްބަސްވުމުގައި ސޮއިކޮށްފައިވާ ގައުމުތަކުން ބައިވެރިވާއިރު އެމެރިކާއިންވެސް އަންނަނީ ނުސީދާކޮށް މިވާހަކަތަކުގައި ބައިވެރިވަމުންނެވެ.
އިރާނުން ސީދާ ގޮތެއްގައި މިމައްސަލައިގައި އެމެރިކާ އާ ވާހަކަދައްކަފާނެތޯ ކުރެވުނު ސުވާލަށް ޖަވާބު ދެއްވަމުން ހުސައިން އާމިރު ވިދަޅުވީ އެކަމުގައި އެމެރިކާގެ އޮތީ ރަނގަޅު ނިޔަތެއްކަން ސާބިތުވާ ވަރުގެ ކަންތައްތަކެއް އެމެރިކާ ފުށުން ބޭނުންވާކަމަށެވެ. އެގޮތުން އެމެރިކާއިން ފްރީޒްކޮށްފައިވާ އިރާނުގެ އެސެޓްތައް އަންފްރީޒްކުރުން ފަދަ ކަމެއް ފެންނަން ބޭނުންވާކަމަށް ވިދާޅުވިއެވެ.
އިރާނުގެ ނިޔުކުލިއަރ އެއްބަސްވުމުގެ މައްސަލައިގައި މިހާރު ވަނީ ނަތީޖާއަކާއި ހަމައަށް އައުމާ ވަރަށް ކައިރީގައި ކަމަށް ދެ ފަރާތުގެ އޮފިޝަލުންވެސް ގެންދަވަނީ ވިދާޅުވަމުންނެވެ. މުހިންމު ކަންކަމުގައި ވަނީ ގާތްގަނޑަކަށް އެއްބަސްވުމަކާ ހަމައަށް އާދެވިފައެވެ.
އެމެރިކާ އާއި ހުޅަނގުގެ ގައުމުތަކުން 2015 ވަނަ އަހަރު އީރާނާ އެކުގައި ގާއިމުކުރި ނިއުކްލިއާ އެއްބަސްވުމުގެ ދަށުން އީރާނުން ވަނީ އެ ގައުމުގެ ނިއުކްލިއާ ކާރުހާނާތަކުގައި ޔޫރޭނިއަމް ފައްކާކުރާ މިންވަރު ދަށްކޮށްފައެވެ. އެއީ، އީރާނާ ދެކޮޅަށް އިގްތިސާދީ ގޮތުން އަޅާފައިވާ ދަތިކުރުމުގެ ފިޔަވަޅުތަކަށް ލުއިތައް ދިނުމުގެ ބަދަލެއްގެ ގޮތުންނެވެ.
ނަމަވެސް އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ވެރިކަމުގައި 2018 ވަނަ އަހަރު އެމެރިކާ ވަނީ މި ނިއުކްލިއާ މުއާހަދާ އިން ވަކިވެ، އިގްތިސާދީ ގޮތުން އީރާނަށް ދަތިކުރުމުގެ އައު ފިޔަވަޅުތަކެއް އަޅާފައެވެ. އޭގެ ބަދަލުގައި އީރާނުން ވަނީ އެ ގައުމުގައި ޔޫރޭނިއަމް ފައްކާކުރާ މިންވަރު އިތުރު ކޮށްފައެވެ. އެހެންކަމުން އެއްބަސްވުމަކާއި ހަމައަށް ވީހާވެސް އަވަހަށް އައުމަށް ހުޅަނގާއި އެމެރިކާއިން ބޭނުންވެއެވެ. ނަމަވެސް އޭގެ ބަދަލެއްގެ ގޮތުން އިރާނާއި ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް އުވާލުމަށް އިރާނުން ބޭނުންވެއެވެ.
