އިންޑިޔާގައި ތައުލީމުދޭ ތަންތަނަށް ބުރުގާ އަޅައިގެން ނުވަދެވޭ އުސޫލަށް އަމަލުކުރަން ފެށުމާއެކު އެޤައުމުގެ ދެކުނު ސްޓޭޓެއް ކަމުގައިވާ ކަރުނާޓަކާގައި ހިނގަމުންދާ މުޒާހަރާތައް ހޫނުވެ އެސްޓޭޓްގެ ސްކޫލްތަކާއި ކޮލެޖްތައް މިދިޔަ ހަފްތާގައި ވަގުތީ ގޮތުން ބަންދުކުރުމަށްފަހު ބައެއް ސްކޫލްތައް ހުޅުވައިފިއެވެ.

ސްކޫލްތަކަށް ކުދިން ވަންނަމުންދިޔައިރު ފުލުހުން ދިޔައީ އެސަރަހައްދުގެ ސަލާމަތީ ކަންކަން ބަލަހައްޓަމުންނެވެ. އުދުޕީގައި ހުރި ސަރުކާރުން ހިންގާ އަންހެން ކުދިންނަށް ކިޔަވައިދޭ ސްކޫލަށް ކުދިން ވަންނަމުން ދިޔައީ ބުރުގާ އަޅައިގެންނެވެ.

ޕްރައިމަރީ އާއި ހައި ސްކޫލްތައް އަލުން ހުޅުވާއިރު ކަމާބެހޭ އިދާރާތަކުން ވަނީ އެތަންތަނާއި 200 މީޓަރު ކައިރީގައި ފަސް މީހުންނަށް ވުރެ ގިނައިން ނުތިބެވޭ ގޮތް ހަދާފައެވެ. ސްކޫލްތައް ހުޅުވާލިނަމަވެސް ކޮލެޖްތައް ހުރީ އަދިވެސް ބަންދުކޮށްފައެވެ.

މިދިޔަ ހަފްތާގައި ކޯޓުން ވަނީ ކިޔަވާކުދިން އެއްވެސް ދީނަކާ ގުޅޭގޮތުން ހެދުން އަޅައިގެން ނުދިޔުމަށް އެދިފައެވެ. އެއީ ހިންދީން އަޅާ ސްކާފު ކަމުގައިވިޔަސް މުސްލިމުން އަޅާ ބުރުގާ ކަމުގައި ވިޔަސް އިތުރު އެންގުމެއް އެންގުމުގެ ކުރިން އެގޮތަށް އަމަލުކުރުމަށް ވަނީ އެދިފައެވެ.

ބުރުގާ އަޅައިގެން ސްކޫލްތަކަށް ނުވަދެވޭ މައްސަލައިގައި އެއީ ހައްޤެއްކަމަށް ބުނެ ދަރިވަރުންތަކެއް ވަނީ ކަރުނާޓަކާގެ ހައިކޯޓަށް ޕެޓިޝަނެއް ހުށަހަޅާފައެވެ. މިޕެޓިޝަންގެ އަޑުއެހުމެއް ހޯމަ ދުވަހު ބާއްވާފައިވާއިރު މި ޕެޓިޝަންގައި ލޯޔަރެއްގެ ގޮތުގައި މަސައްކަތްކުރަމުން އަންނަ ޑެވަޑަދް ކަމަޓް ބުނީ ސްކޫލަށް ވަނީއްސުރެވެސް އެކުދިން ދަނީ ބުރުގާ އަޅައިގެންކަމަށެވެ. އާންމު ގޮތެއްގައި ހުއްދަ ހޯދަނީ ސްކޫލް ޔުނީފޯމާ އެއް ކުލައަކުން ބުރުގާ އެޅުމަށްކަމަށް ލޯޔަރު ބުންޏެވެ.

މިދިޔަ ހަފްތާގައި ބައެއް ސްކޫލްތަކުން ވަނީ ބުރުގާ އަޅައިގެން ތިބި ކުދިން ސްކޫލަށް ވެއްދުމަށް ދެކޮޅު ހަދާފައެވެ. ސަބަބެއް ކަމަށް ބުނެފައިވަނީ އެއީ އިންޑިޔާގެ އެޑިޔުކޭޝަން މިނިސްޓްރީގެ ނިންމުންކަމަށެވެ.

އެއާއެކު ދަރިވަރުންނާއި ބެލެނިވެރިން ވަނީ އެނިންމުމާއި ދެކޮޅަށް މުޒާހަރާކުރަން ފަށާފައެވެ.

ބުރުގާގެ މައްސަލައިގައި ފާއިތުވި ދުވަސްތަކުގައި ވަނީ މަޝްރަހު ހޫނުވެފައެވެ. ވަކިން ޚާއްސަކޮށް ހިންދޫންގެ މެޖޯރިޓީ އޮންނަ ސަރަހައްދުތަކުގައި މައްސަލަ ވަނީ ހޫނުވެފައެވެ.

ވެރިކަން ކުރާ ބީޖޭޕީއަށް ބޮޑު ތާއީދެއް ހިންދީންގެ މެޖޯރިޓީ އޮންނަ ސިޓީތަކުގައި އޮވެއެވެ. އިންޑިޔާގެ އާބާދީގެ 80 އިންސައްތަ އަކީ ހިންދީންނެވެ. މުސްލިމުންގެ އާބާދީ އަކީ 13 އިންސައްތައެވެ. މޯދީ ވެރިކަމާއި ހަވާލުވެވަޑައިގެންނެވި ފަހުން އިންޑިޔާގެ މުސްލިމުންނަށް އަންނަނީ އެކިގޮތްގޮތަކުން ދަތިކޮށް ހިންދީންގެ ހައްދު ފަހަނައަޅާފައިވާ މީހުން ރުއްސުމަށް އެކި ޒާތުގެ ކަންކަން ކުރައްވަމުންނެވެ.