ކޮވިޑް-19: އެންމެ ފަހުގެ

ކޮވިޑް-19އާ ގުޅިގެން މާލެސިޓީ “ލޮކް ޑައުން” ގެ މުއްދަތު އިތުރުކުރުމާ ގުޅިގެން އެޗް.ޕީ.އޭއިން ވަކި ގޮތަކަށް އަންގަންދެން ކުރިޔަށް އޮތް ސައުވީސް ގަޑިއިރަށް މޯލްޑިވިއަންގެ އެތެރޭގެ އުދުހުންތައް މެދުކަނޑާލައިފި.

މާލެ ސަރަހައްދުގެ ގޭބީސީތަކުގައި އުފެދޭކުނި ގޭގެ ތިރިއަށް ބާލާނެ ގަޑިއަކީ މެންދުރު 12:00 އިން 2:00 ށް ކަމަށް ވެމްކޯއިން ބުނެފި އެވެ. މީގެއިތުރުން މޮނިޓަރިންގ ހާލަތުގައި ހުރި ގޭގެއިން ކުނި ބޭރަށް ނުނެރުމަށާއި އެކަމަށް ހާއްސަ ޓީމަކުން ގޮސް އެފަދަ ގޭގެއިން ކުނި ނަގާނެ ކަމަށް ވެމްކޯ އިން އެކަމާއި ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވަނީ ބުނެފަ އެވެ.

މާލެ ލޮކްޑައުންކޮށްފައިވާ ހާލަތުގައި ހިދުމަތް ދިނުމަށް މޯލްޑިވްސް ޕޮލިސް ސާވިސްއިން ގާއިމުކުރި ކޯލް ސެންޓަރުގެ ހިދުމަތް ފުޅާކުރުމުގެ މަސައްކަތް ކުރަމުންދާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.

އެކަމާއި ގުޅިގެން ސީޕީ ކުރެއްވި ޓްވީޓެއްގައި ވިދާޅުވެފައިވަނީ ވިޔަފާރިތަކުންނާއި އާންމު ރައްޔިތުންގެ ފަރާތުން އެހީތެރިކަމަށް އެދި ކޯލް ސެންޓަރަށް އަންނަ ކޯލްތަކަށް އެއްފަހަރާ ޖަވާބު ދެވޭ އަދަދާއި ހިދުމަތުގެ ފެންވަރު ރަނގަޅު ކުރުމަށް މަސައްކަތް ކުރަމުން އަންނަ ކަމަށެވެ. އަދި އެ ހިދުމަތަށް ފަސޭހައިން އެދެވޭނެ އޮންލައިންޕޯޓަލްއެއް ތަޢާރަފްކޮށްފައިވާ ކަމަށާއި އެ ޕޯޓަލް މެދުވެރިކޮށް ޚިދުމަތް ހޯދުމަށް ސީޕީ ވަނީ އެދިވަޑައިގަންފަ އެވެ.

ލޮކްޑައުންއާ ގުޅިގެން ހިދުމަތް މެދުކަނޑާލުމަށް ފަހު އެސްޓީއޯގެ އީސްޓޯރުގެ ހިދުމަތް އަލުން މިއަދު ފަށައިފި އެވެ.ރެއިން ފެށިގެން އެ ހިދުމަތް މެދުކަނޑާލީ 24 ގަޑިއިރަށް މާލެ ސަރަހައްދު ލޮކްޑައުން ކުރުމުން ޑެލިވަރީ ކުރުމަށް ނަގަން ޖެހޭ ހާއްސަ ހުއްދަ ނެގުމަށެވެ. މި ހުއްދަ މިހާރު ލިބިފައިވާ ކަމަށާއި މިހާރު އީސްޓޯރުގެ ހިދުމަތް އާއްމުންނަށް ލިބޭނެ ކަމަށް އެސްޓީއޯއިން ބުނެ އެވެ

މާލޭގައި ދިރިއުޅެމުންދާ މީހެއް ކޮވިޑް-19 އަށް ޕޮޒިޓިވް ވުމާއި ގުޅިގެން އޭޑީކޭ އިން ގޭގެއަށް ޒިޔާރަތްކޮށްގެން ދެމުން ގެންދިޔަ ޚިދުމަތްތައް މެދުކަނޑާލައިފިއެވެ.

އެކަމާއި ގުޅިގެން އޭޑީކޭއިން ކޮށްފައިވާ ޓްވީޓެއްގައި ބުނެފައިވަނީ ހޯމް ކޮންސަލްޓޭޝަން، ހޯމް ސާމްޕަލް ކަލެކްޝަން އަދި އޭޑީކޭ އެޓް ހޯމްގެ ޚިދުމަތްތައް ވަގުތީގޮތުން މެދުކަނޑާލާފައި ވާކަމަށެވެ. އެހެންނަމަވެސް އޮންލައިން ކޮންސަލްޓޭޝަންގެ ޚިދުމަތް ކުރިއެކޭ އެއްގޮތަށް ލިބެމުންދާނެކަމަށް އޭޑީކޭއިން ބުނެއެވެ.

ކޮވިޑް-19 އަށް މާލޭގައި ދިރިއުޅޭ ރައްޔިތަކު ޕޮޒިޓިވްވުމާއި ގުޅިގެން އައިޖީއެމްއެޗްގެ ބައެއް ޚިދުމަތްތައް ދެ ދުވަހުގެ މުއްދަތަށް މެދުކަނޑާލާފައި ވީނަމަވެސް އެހޮސްޕިޓަލުން މާބަނޑު މީހުންނަށް ދެމުންގެންދާ ޚިދުމަތްތަކަށް ބުރު ނާރާ ކުރިޔަށްދާނެކަމަށް އެ ހޮސްޕިޓަލުން ބުނެފި އެވެ.

އައިޖީއެމްއެޗްގެ އަންހެނުންގެ ހާއްސަ ޑޮކްޓަރު ޑރ. އަސީލް ޖަލީލް ކުރެއްވި ޓުވީޓެއްގައި ވިދާޅުވީ މި ހާލަތުގައި މާބަނޑު އަންހެނުންގެ ފަރުވާގެ ކަންކަން ކުރިއަށް ގެންދަން ހާއްސަ ޕްލޭނެއް އެކުލަވާލައި އެ ޕްލޭނާ އެއްގޮތަށް އަމަލުކުރަން ފަށާފައިވާ ކަމަށެވެ. އަދި މާބަނޑު މީހުން ހޮސްޕިޓަލަށް ވަނުމަށް ފަސޭހަ އިންތިޒާމްތަކެއް ހަމަޖައްސަމުން އަންނަ ކަމަށް ޑރ. ވިދާޅުވިއެވެ.

ޑރ. އަސީލް އިތުރަށް ވިދާޅުވީ އޭޕްރީލް މަހުން ފެށިގެން ޖޫން މަހާ ހަމައަށް އައިޖީއެމްއެޗްގައި ވިހަން ނަން ނޯޓު ކޮށްފައިވާ މީހުންގެ މައުލޫމާތު މިހާރު ހޯދާފައިވާ ކަމަށެވެ. މީގެ އިތުރުން އެޕޮއިންޓްމަންޓް ހައްދާފައި ތިބި މާބަނޑު މީހުންނަށް އައިޖީއެމްއެޗުން ފޯނުން ގުޅައިގެން އެޕޮއިންޓްމަންޓްގެ ކަންކަން ކުރިއަށް ގެންދާނެކަމަށްވެސް ޑރ. އަސީލް ވިދާޅުވި އެވެ. އަދި އައިޖީއެމްއެޗުން ދެމުންގެންދާ އިމަރޖެންސީ ޚިދުމަތް މެދުނުކެނޑި ކުރިޔަށްދާނެ ކަމަށްވެސް ޑރ އަސީލް ވިދާޅުވި އެވެ.

ކޮވިޑް-19 މާލޭގައި ދިރިއުޅޭ ރައްޔިތެއްގެ ގައިން ފެނުމާއެކު އިންދިރާ ގާންދީ މެމޯރިއަލް ހޮސްޕިޓަލު (އައިޖީއެމްއެޗް) ން ދެމުން ގެންދިޔަ ބައެއް ޚިދުމަތްތައް ބުރާސްފަތި އަދި ހޮނިހިރު ދުވަހު ނުދޭނެކަަމަށް އައިޖީއެމްއެޗުން ބުނެފި އެވެ.

އައިޖީއެމްއެޗުން އެކަމާއި ގުޅޭގޮތުން ނެރެފައިވާ ބަޔާނެއްގައި ބުނެފައިވަނީ މި ދެ ދުވަހު ހޮސްޕިޓަލުން ދެމުން ގެންދާ ހޮސްޕިޓަލްގެ ސްޕެޝަލިސްޓް އޯޕީޑީ އަދި އެހެނިހެން ކްލިނިކަލް ޚިދުމަތްތައް ބަންދުވާނެކަމަށެވެ. އެހެންނަމަވެސް އައިޕީޑީ އަދި އިމަރޖެންސީ ޚިދުމަތްތައް އެހެން ދުވަސްތަކެކޭ އެއްގޮތަށް ދެމުން ގެންދާނެކަމަށް އެހޮސްޕިޓަލުން ބުނެއެވެ.

އަދި އައިޖީއެމްއެޗުން ދެމުންގެންދާ ޚިދުމަތްތަކާއި ގުޅޭގޮތުން އާދިއްތަ ދުވަހުން ފެށިގެން އަމަލުކުރާނެ ގޮތެއް ހޮނިހިރު ދުވަހު ހާމަކުރާނެކަމަށް އައިޖީއެމްއެޗުން ބުނެއެވެ.

ކޮވިޑް-19 އަށް މާލޭގައި ދިރިއުޅެމުންދާ ރައްޔިތަކު ޕޮޒިޓިވްވެފައިވާއިރު މާލެ ހިމެނޭ ސަރަހައްދު ވަނީ 24 ގަޑިއިރު ވަންދެން ލޮކްޑައުންކޮށްފަ އެވެ. އެހެންކަމުން ކޮންމެހެން ދޭންޖެހޭ ޚިދުމަތްތައް ނޫނީ ތަންތަނުން މިހާރު ދެމުންނެއް ނުގެންދެއެވެ. ނަމަވެސް ޒަރޫރީ ޚިދުމަތްތައް ފޯރުކޮށްދޭނެ ގޮތްތައް ކަމާބެހޭ ފަރާތްތަކުން އަންނަނީ ހަމަޖައްސަމުންނެވެ.

ކޮވިޑް-19 އެންމެ ފުރަތަމަ ފެނުނު ޗައިނާއިން އިއްޔެ ވައިރަސް ޖެހިގެން ރިޕޯޓްކޮށްފައިވަނީ 46 މީހުންނަށެވެ.

ޗައިނާގެ ނޭޝަނަލް ހެލްތު އޮތޯރިޓީން ހާމަކުރާ ގޮތުގައި ބުދަ ދުވަހު އެގައުމުގައި ވައިރަސް ޖެހިގެން ރިޕޯޓްކޮށްފައިވާ މީހުންގެ ތެރެއިން 34 މީހުންނަކީ އެގައުމަށް އެތެރެވި މީހުންނެވެ. އަންގާރަ ދުވަހު އެގައުމަށް އެތެރެވެފައިވާ މީހުންގެ ތެރެއިން 36 މީހަކަށް ވައިރަސް ޖެހިގެން ވަނީ ރިޕޯޓްކޮށްފަ އެވެ.

ކޮވިޑް-19 މިވަގުތު އެންމެ ހަލުވި މިނުގައި ދުނިޔޭގައި ފެތުރެމުން އަންނަ އެމެރިކާގައި ފާއިތުވި 24 ގަޑިއިރު މަރުވި މީހުންގެ އަދަދު 2600 ށް ވުރެ މައްޗަށް ގޮސްފައިވާކަމަށް ތަފާސްހިސާބުތަކުން ދައްކައިފިއެވެ.

ކޮވިޑް-19 ޖެހޭ މީހުންނާއި މަރުވާ މީހުންގެ އަދަދުތައް ހާމަކުރަމުންދާ ޖޯންސް ހޮޕްސްކިން ޔުނިވަރސިޓީން ހާމަކުރާ ގޮތުގައި ފާއިތުވި 24 ގަޑިއިރު ތެރޭގައި އެމެރިކާއިން މިވައިރަސް ޖެހިގެން މަރުވި މީހުންގެ އަދަދު 2600 ށް ވުރެ މައްޗެވެ. އަދި މިއީ މިހާތަނަށް އެމެރިކާގައި މިވައިރަސް ޖެހިގެން އެންމެ ގިނައިން މީހުން މަރުވި ދުވަސްކަންވެސް ފާހަގަކޮށްލެވެ އެވެ.

މޯލްޑިވް ގޭސް އިން އެމަރޖެންސީ ގޭސް ޑެލިވަރ ކުރާ ގަޑިތައް ހާމަކޮށްފި އެވެ. މޯލްޑިވް ގޭސް އިން ބުނީ ހެނދުނު 9 ން ރޭގަނޑު 8:30 ށް މި ޚިދުމަތް ދެމުން ގެންދާނެކަމަށެވެ. އަދި ރައްކާތެރިކަމުގެ ފިޔަވަޅެއްގެ ގޮތުން ގޭސް ފުޅި ގެންދާނީ ގޭގެ ދޮރާހަމައަށް ކަމަށް މޯލްޑިވް ގޭސް އިން ބުނެއެވެ. ޑެލިވަރ ކުރުމަށް އޯޑަރ ކުރާނީ އޮންލައިންކޮށް ނުވަތަ އެސްއެމްއެސް މެދުވެރިކޮށް ކަމަށް މޯލްޑިވް ގޭސް އިން ބުނެއެވެ.

އެޗްޕީއޭއިން ކުރި ޓްވީޓެއްގައި ބުނީ، ކޮވިޑް-19 އަށް ޝައްކު ކުރެވޭ އަލާމާތްތަކެއް ހުރި 14 މީހަކު ހުޅުލޭ އައިސޮލޭޝަން ފެސިލިޓީއަށް ބަދަލުކުރުމުގެ މަސައްކަތް ކުރެވެމުންދާ ކަމަށް.

އަދި މި 14 މީހުންނަކީ މިއަދު މާލެއިން ޕޮޒިޓިވްވި މީހާގެ ކޮންޓެކްޓުންކަމަށް ބުނެފައިވޭ

މުއްދަތެއް ނެތް ގޮތަށް ފަސްކޮށްފައިވާ އޭއެފްސީ ކަޕާއި އޭއެފްސީ ޗެމްޕިއަންސް ލީގުގެ މެޗުތައް، ސަޕޯޓަރުން ނުވައްދައި ކުރިއަށް ގެންދިއުމުގެ ޚިޔާލު ގެންގުޅޭ ކަމަށް އޭޝިއަން ފުޓްބޯލް ކޮންފެޑެރޭޝަން (އޭއެފްސީ) އިން ބުނެފި އެވެ.

އޭއެފްސީގެ ޖެނެރަލް ސެކްރެޓަރީ ވިންޑްސޯ ޖޯން އޭއެފްޕީ އަށް ދެއްވި އިންޓަވިއުއެއްގައި ވިދާޅުވީ އޭއެފްސީ ކަޕާއި އޭއެފްސީ ޗެމްޕިއަންސް ލީގުގެ މެޗުތައް މިއަހަރު ބޭއްވޭނެ ކަމަށާއި އެކަން ކުރެވޭނެ ގޮތްތައް ބަލަމުން އަންނަ ކަމަށެވެ. އެގޮތުން މެޗުތައް އަލުން ފަށާއި ސަޕޯޓަރުން ނުވައްދައި މެޗުތައް ކުރިއަށް ގެންދިޔުމަށް މިހާރު މަޝްވަރާ ކުރަމުން އަންނަ ކަމަށްވެސް ވިދާޅުވި އެވެ.

ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، މާލެ ސަރަޙައްދުގައި އިއުލާނު ކޮށްފައިވާ ލޮކްޑައުން ގެ ކަންކަން ބަލައި ތަންފީޒު ކުރުމުގައި ހަރަކާތްތެރިވާނީ 200 ފުލުހުން ކަމަށް. އެ ފަރާތްތަކުން މާލެ، ހުޅުމާލެ، ވިލިނގިލި، ތިލަފުށި އަދި ގުޅީފަޅުގެ ކަންކަން ބަލަހައްޓާނީ އެ ފުލުހުންކަމަށް ވިދާޅުވި

ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، ފްރަންޓް ލައިންގައި ހަރަކާތްތެރިވާ ފުލުހުންވެސް ގެއަށް ނުގޮސް މަސައްކަތް ކުރެވޭނެ އިންތިޒާމްތައް ހަމަޖައްސަވާނެ ކަމަށް.

ފުލުހުން މަސައްކަތް ކުރަނީ ފުލުހުންގެ އެލަރޓް ލެވެލް ސްޓޭޓަސް 2 (އޮރެންޖް) ގައި.

ކޮމިޝަނަރ އޮފް ޕޮލިސް މުހައްމަދު ހަމީދު އާއި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ބައިވެރިވެވަޑައިގަތް ނޫސްވެރިންގެ ބައްދަލުވުމުގައި ޝަމާލް ވިދާޅުވީ، މައިގަނޑު ފޯކަސްއެއް ކޮވިޑް އޮޕަރޭޝަނަށް އޮތް ނަމަވެސް މައިގަނޑު ޒިންމާތައް އަދާކުރުމަށް (ޤައުމުގެ ސަލާމަތާއި ދިފާއަށް) އަދި ސެކިއުރިޓީ އޮޕަރޭޝަންތަކަށްވެސް ސަމާލުކަން ކުޑަނުވާނެ ކަމަށް، އަދި އެއްވެސް ބަޔަކު މި ޙާލަތުގެ ނާޖާއިޒް ފައިދާ ނަންގައިވައިގެން ނުވާނެ ކަމަށް، މިސާލެއްގެ ގޮތުން ބުދަ ދުވަހު ޤަސްތުގައި އދ މަހިބަދޫގައި އޮތް ސީއެމްބިއުލާންސަކާއި، ފުލުހުންގެ ވެހިކަލްއަކާއި ކައުންސިލްގެ ވެހިކަލް ހިމެނޭ ގޮތަށް 7 ވެހިކަލްއެއް އަންދާލި ހާދިސާ ކޮމިޝަނަރ އޮފް ޕޮލިސްވެސް ފާހަގަކުރެއްވި.

ކޮވިޑް-19 އާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު އާއި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ބައިވެރިވެވަޑައިގެންނެވި ނޫސްވެރިންގެ ބައްދަލުވުމުގައި އެ ފަރާތްތަކުން ވިދާޅުވީ، ޤައުމީ ސަލާމަތަށްޓަކައި ކުރަންޖެހޭ ހުރިހާ މަސައްކަތެއްވެސް ފުލުހުންނާއި ސިފައިން ގުޅިގެން ކުރަމުންދާ ކަމަށް.

އެގޮތުން ސިފައިންވެސް އެލަރޓް ސްޓޭޓަށް ބްލޫ 1 އަށް ގެނެވިފައިވާއިރު، މިއީ ކާރިސާތަކާއި ގުޅިގެން ނެރޭ އެލަރޓެއްކަމަށް ވިދާޅުވި، އަދި ސިފައިން ރައްކާތެރި ކުރުމަށްޓަކައި އަޅަންޖެހޭ ފިޔަވަޅުތަކާ ގުޅޭ ފޯސް ޕްޓޮޓެކްޝަން ޕޮލިސީއާއި، ފޯސް ސަސްޓެއިން ޕޮލިސީ އަދި ފޯސް އިކޮނޮމައިޒޭޝަން ޕޮލިސީއެއް ޤާއިމުކޮށްފައިވާކަމަށް.

ކޮރޯނާވައިރަސް (ކޮވިޑް-19) އަށް ޕޮޒިޓިވްވި ޔުވެންޓަސްގެ މިޑްފީލްޑަރު ބްލައިސް މަޓުއިޑީ އާއި ޑިފެންޑަރު ޑެނިއަލީ ރުގާނީ ރަނގަޅުވެއްޖެ އެވެ.

މި ދެ ކުޅުންތެރިން އެއްކޮށް ރަނގަޅުވެފައިވާ ކަން ޔުވެންޓަސްއިން ވަނީ ހާމަކޮށްދީފައެވެ. މީގެ ތެރެއިން ރުގާނީ އަކީ އިޓަލީން ކޮވިޑް-19 އަށް ޕޮޒިޓިވްވި އެންމެ ފުރަތަމަ ފުޓްބޯޅަ ކުޅުންތެރިޔާއެވެ. އެގޮތުން މިދިޔަ މާޗު މަހުގެ 12 ވަނަ ދުވަހު ރުގާނީ ކޮވިޑް-19 އަށް ޕޮޒިޓިވްވިއިރު، މަޓުއިޑީ ވައިރަހަށް ޕޮޒިޓިވްވީ މާޗު މަހުގެ 18 ވަނަ ދުވަހު އެވެ.

މާލޭގައި ލޮކްޑައުން ކޮށްފައި އޮންނަ ގަޑީގައި ބޭރު ތެރޭގައި އުޅޭނަމަ 14 ދުވަސް ވަންދެން އެމީހަކު ކަރަންޓީން ކުރާނެ ކަމަށް ފުލުހުން ބުނެފިއެވެ.

ޒަރޫރީ ބޭނުމެއްގައި ނޫނީ މާލެ ނައުމަށާއި، އެދެވިގެންވާނަމަ އެންމެ ކައިރި ރަށަކަށް އުޅަނދުތައް ބަނދަރު ކުރުމަށް ފުލުހުން އެދިވަޑައިގެންފި.

ކުންފުނިތަކާއި ވާހަކަ ދެއްކިގެން ކަންކަން ކުރެވޭނެ އިންތިޒާމް ދަނީ ރާވަމުން: ޕޮލިސް