"ސެލެބްރިޓީ ރޭސް" ގެ ޗެމްޕިއަން ޓީމަކަށް ނާއްކޮއާއި ޖުމާ
ނާއްކޮއާއި ޖުމާއަށް ގްރޭންޑް ޕްރައިޒް ގޮތުގައި ޖީއެން ސައިކަލަކާއި ސްކޫޕީ ސައިކަލެއް
ސެލެބްރިޓީ ރޭސް ސީޒަން 1 ގެ ޗެމްޕިއަން ޓީމް
މިއަހަރުގެ ރަމަޟާންމަހަށް ޚާއްސަކޮށްގެން ރާއްޖެޓީވީން ގެނެސްދީފައިވާ ރިއަލިޓީ ޝޯވ "ޕްރިސްޓަރ އޮއިލް ސެލެބްރިޓީ ރޭސް" ގެ ފުރަތަމަ ސީޒަނުގެ ޗެމްޕިއަން ޓީމަކަށް ނާޝިދާ މުހައްމަދު (ނާއްކޮ) އާއި، އިސްމާއިލް ޖުމައިހު (ޖުމާ) ހޮވިއްޖެއެވެ.
މި ޝޯވގައި ބައިވެރިވެފައިވާ ފަންނާނުންނަކީ، މުހައްމަދު މަނިކު، ޖުމާ، ޝަރާ، ނާޝިދާ މުހައްމަދު (ނާއްކޮ)، އަހްމަދު އީސާ (އާނަންދު)، ޖާދުﷲ، ޝިފާ އަދި އާޝާއެވެ. އެގޮތުން ސީޒަން 1 ގެ ޗެމްޕިއަން ޓީމަކަށް ނާއްކޮ އަދި ޖުމާ ހޮވިފައިވާއިރު، ނާއްކޮއާއި ޖުމާއަށް ގްރޭންޑް ޕްރައިޒް ގޮތުގައި ޖީއެން ސައިކަލަކާއި، ސްކޫޕީ ސައިކަލެއްގެ އިތުރުން، 11،000 ރުފިޔާ ވަނީ ލިބިފައެވެ.
މި ސީޒަނުގެ ރަނަރ އަޕް ޓީމަކަށް ޖާދު އާއި ޝަރާ ހޮވިފައިވާއިރު، 3 ވަނަ ޓީމަކަށް ހޮވިފައިވަނީ އާނަންދު އަދި ޝިފާގެ ޓީމެވެ. އަދި މި ޝޯވގެ ތެރެއިން އަނިޔާވި މަނިކުއާއި އޭނަގެ ޕާޓްނަރ އާޝާ ވަނީ މި ސީޒަނުގެ 4 ވަނައަށް ހޮވިފައެވެ.
މަނިކުއާއި އާޝާއަށް 4 ވަނަ ލިބިފައިވީނަމަވެސް، މި ސީޒަނުގެ "ބެލުންތެރިންގެ މެދުގައި އެންމެ މަގްބޫލު ޓީމް" އަކަށް ހޮވިފައިވަނީ މަނިކާއި އާޝާގެ ޓީމެވެ. މި ޓީމަށް އިނާމެއްގެ ގޮތުން 10،000 ރުފިޔާ ދީފައިވާއިރު، އެކި ވަނަތަކަށް އައި ޓީމުތަކަށްވެސް ތަފާތު އެކި އިނާމުތައް ދީފައިވެއެވެ.
ސެލެބްރިޓީ ރޭހަކީ ސަރވައިވަލް ޝޯވއެއްގެ ގޮތުގައި ރާއްޖޭގައި ކުރިއަށްގެންދިޔަ ފުރަތަމަ ޝޯވ އެވެ. ދ. އަތޮޅުގެ 11 ފަޅު ރަށެއްގައި ޝޫޓުކޮށްފައިވާ މި ޝޯވ އިން ރާއްޖޭގެ މަޝްހޫރު ފިލްމީ ފަންނާނުންގެ އާދަޔާ ޚިލާފު މޮޅު ހުނަރުތަކެއް ވަނީ ފެނިފައެވެ. މި ޝޯވ ޑައިރެކްޓްކޮށް އަދި ހުށަހަޅައިދީފައިވަނީ މަޝްހޫރު ފިލްމީތަރި އަލީ ސީޒަންއާއި، ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމެވެ.
ބެލުންތެރިންގެ މެދުގައި ބޮޑު މަގްބޫލުކަމެއް ލިބިގެން ދިޔަ މި ޝޯވ ފޭސްބުކް މެދުވެރިކޮށްވެސް 3 ލައްކައަށްވުރެ ގިނަ މީހުން ބަލާފައިވާއިރު، އަންނަ އަހަރުވެސް މި ޝޯވގެ އިތުރު ސީޒަނެއް ގެނެސްދިނުމަށް މަސައްކަތް ކުރައްވާނެ ކަމަށް ޝޯވ ގެ ޑައިރެކްޓަރުން ކަމަށްވާ އާމިރާއި ސީޒަން މައުލޫމާތު ދެއްވައެވެ.
