ރާއްޖެޓީވީން ގެނެސްދޭ ރިއަލިޓީ ޝޯވް ސެލެބްރިޓީ ރޭސްގެ ދެވަނަ ސީޒަން ލޯންޗުކޮށްފިއެވެ.

ބެލުންތެރިންގެ މެދުގައި ބޮޑު މަޤްބޫލުކަމެއް ލިބިގެންދިޔަ ސެލެބްރިޓީ ރޭސްގެ ފުރަތަމަ ސީޒަން ދައްކާފައިވަނީ މިދިޔަ އަހަރުގެ ރަމަޟާން މަހުއެވެ.

ޓައިޓަލް ސްޕޮންސަރ ގެ ގޮތުގައި ޕެޓްރޯލް އޮފިސީ ހަމަޖައްސައިގެން މިއަހަރު ކުރިއަށް ގެންދާ "ޕެޓްރޯލް އޮފިސީ ސެލެބްރިޓީ ރޭސް ސީޒަން 2" ލޯންޗު ކޮށްފައިވަނީ ހުކުރު ދުވަހުގެ ރޭގައެވެ. ޖުމުލަ 11 ފަންނާނުންނާއެކު މި އަހަރު ކުރިއަށްގެންދާ މި ރިއަލިޓީ ޝޯވް އަކީ މިދިޔަ އަހަރު ގެނެސްދިން ޝޯވ އަށްވުރެ ފެންވަރު ރަނގަޅުކޮށް ގެނެސްދިނުމަށް ހަމަޖެހިފައިވާ ޝޯވް އެކެވެ. މިއަހަރުވެސް މި ޝޯވް ދެއްކުމަށް ހަމަޖެހިފައިވަނީ ރަމަޟާން މަހުން ފެށިގެންނެވެ.

ޖުމުލަ 7 އެޕިސޯޑުގެ މައްޗަށް ކުރިއަށް ގެންދާ މި ޝޯވް ކާމިޔާބު ކުރާ ފަރާތަކަށް އިނާމެއްގެ ގޮތުގައި އެއްލައްކަ ރުފިޔާ ވަނީ ހުށައަޅާފައެވެ.

މިއަހަރުގެ ޝޯވް ގައި ރާއްޖޭގެ މަޝްހޫރު ފިލްމީ ތަރިންގެ އިތުރުން، މޮޑެލިންގ ދާއިރާއިން މަޝްހޫރު ފަރާތްތަކާއި، ޓީވީ ޝޯވް ހުށައަޅައިދޭ ފަރާތްތައްވެސް ބައިވެރިވެއެވެ. އެގޮތުން ރިޝްމީ، އައްޒަ، ފުބޫ، ރޯމަން، ދޮނާ، އިފްނާޒް އަދި ފަރީލާގެ އިތުރުން، މޮޑެލިންގ ދާއިރާގައި ޙަރަކާތްތެރިވާ ނޫރު އަދި ޓީވީ ޝޯވް ހުށައެޅުންތެރިންގެ ތެރެއިން ޝަބާ އަދި ސުހާ އާއި، ކޮރިއޯގްރަފީގެ ދާއިރާއިން މަޤްބޫލު ރިޗާރޑު މިފަހަރުގެ ސީޒަންގައި ފެނިގެންދާނެއެވެ.

އެމްއެންޑީއެފްގެ އެހީތެރިކަމާއެކު ރާއްޖެޓީވީން އުފައްދާ ރިއަލިޓީ ޝޯވް ޕެޓްރޯލް އޮފިސީ ސެލެބްރިޓީ ރޭސް ސީޒަން 2 ގެ މެއިން ހޯސްޓެއްގެ ގޮތުގައި ފެނިގެންދާނީ ރާއްޖެޓީވީގެ ޕްރޮގްރާމް ހެޑް އަދި ރާއްޖޭގެ މަޤްބޫލު ޕްރެޒެންޓަރެއް ކަމަށްވާ އާމިރު ސަލީމެވެ. އަދި ކޯ ހޯސްޓެއްގެ ގޮތުގައި އެމްއެންޑީއެފްގެ ބޭކަނބަލެއްކަމަށްވާ ހައްވާ ނަޖްލާ ފެނިގެންދާނެއެވެ.

މި ޝޯވްގެ މެއިން ހޯސްޓުގެ އިތުރުން، ޝޯވްގެ ޑައިރެކްޓަރ އާމިރު ސަލީމް ވިދާޅުވާ ގޮތުގައި މިފަހަރުގެ ސީޒަންއަކީ ހުރިހާ ގޮތަކުންވެސް ތަފާތު ސީޒަނަކަށް ވެގެންދާނެއެވެ.

ލ އަތޮޅު ބަރެސްދޫ އަދި އެ ސަރަޙައްދުގެ ބައެއް ފަޅު ރަށްރަށާއި މީހުން ދިރިއުޅޭ ބައެއް ރަށްރަށުގައި މި ޝޯވްގެ ޓާސްކުތައް ވަނީ ކުރިއަށް ގެންގޮސްފައެވެ. ޝޯވްގެ ޝޫޓިންގ މިހާރު އެއްކޮށް ނިންމާލާފައިވާއިރު، މި ޝޯވް އިން އެއްވަނައަށް އަންނަ ފަރާތެއް ކަނޑައެޅިގެންދާނީ ބެލުންތެރިންގެ އެސްއެމްއެސް ވެސް ހިމެނިގެންނެވެ.

ސެލެބްރިޓީ ރޭސް ސީޒަން 2 ގެ ޓައިޓަލް ސްޕޮންސަރ އަކީ ޕެޓްރޯލް އޮފިސީއެވެ. ކޯ ސްޕޮންސަރ ޕްލަސްގެ ގޮތުގައި މިފްކޯ އަދި މެޑްޓެކް ހިމެނޭއިރު، ކޯ ސްޕޮންސަރުންގެ ގޮތުގައި ސީ ގިއަރ، ބޭގްސް އެންޑް ސޯލްސް، މެކްސްކޮމް ޓެކްނޮލޮޖީސް، ރަން ފައުނު ބައިވެރިވެއެވެ. އޮފިޝަލް ޑްރިންކް ޕާޓްނަރ ގެ ގޮތުގައި ހެޕީ މާކެޓްގެ ރައުޗް އަދި އޮފިޝަލް ކޭޓަރިންގ ޕާޓްނަރ ގެ ގޮތުގައި އޮކްސިޖަން ހިމެނޭއިރު، އޮފިޝަލް ޕްރިންޓިންގ ޕާޓްނަރ ގެ ގޮތުގައި އެމްސެވަން ޕްރިންޓް ހިމެނެއެވެ.

ޕެޓްރޯލް އޮފިސީ ސެލެބްރިޓީ ރޭސް ސީޒަން 2 ގެ ފުރަތަމަ ޓްރެއިލަރ ވެސް ވަނީ ހުކުރު ދުވަހުގެ ރޭ އާންމުކޮށްފައެވެ.

ސެލެބްރިޓީ ރޭހަކީ ސަރވައިވަލް ޝޯވއެއްގެ ގޮތުގައި ރާއްޖޭގައި ކުރިއަށްގެންދިޔަ ފުރަތަމަ ޝޯވ އެވެ. މި ޝޯވް ގެ ފުރަތަމަ ސީޒަން ކުރިއަށް ގެންދިޔައީ ދ. އަތޮޅުގެ 11 ފަޅު ރަށެއްގައެވެ.

ބެލުންތެރިންގެ މެދުގައި ބޮޑު މަގްބޫލުކަމެއް ލިބިގެން ދިޔަ މި ޝޯވ ގެ ފުރަތަމަ ސީޒަންވެސް ފޭސްބުކް މެދުވެރިކޮށް 3 ލައްކައަށްވުރެ ގިނަ މީހުން ބަލާފައިވެއެވެ.