ސެލެބްރިޓީ ރޭސް ފައިނަލް ޝޯވ މިރޭ 10:00 ގައި

މިއަހަރުގެ ރަމަޟާންމަހަށް ޚާއްސަކޮށް ރާއްޖެޓީވީން ގެނެސްދެމުންދާ ރިއަލިޓީ ޝޯވ "ޕްރިސްޓަރ އޮއިލް ސެލެބްރިޓީ ރޭސް" ގެ ފައިނަލް ޝޯވ ހުކުރު ދުވަހުގެރޭ 10:00ށް ޝެޑިއުލްކޮށްފިއެވެ.

މި ޕްރޮގްރާމް ދެއްކުމަށް ކުރިން ތާވަލުކޮށްފައި އޮތީ 13 މެއި 2021 ވީ ބުރާސްފަތި ދުވަހުގެރޭ 11:00 ގައެވެ. ނަމަވެސް މިހާރު ޕޮރޮގްރާމް ވަނީ ހުކުރު ދުވަހުގެރޭ (މިރޭ) 10:00ށް ރީޝެޑިއުލް ކުރެވިފައެވެ. ރާއްޖެޓީވީ އާއި އެސް ޕްރޮޑަކްޝަން ގުޅިގެން ކުރިއަށް ގެންދާ މި ޝޯވ ގެ ޝޫޓިންގ ކުރިއަށް ދިޔައިރު، ޝޯވ ގައި ހަރަކާތްތެރިވި ފަރާތްތަކާއި ކްރޫއަށް ސޭފްޓީ އެންޑް ރެސްކިއު ސަޕޯޓު ދިނުމުގެ ގޮތުން އެމްއެންޑީއެފްގެ ޓީމަކުން ޝޫޓިން ކުރިއަށްދިޔަ ސަރަޙައްދުގައި ވަނީ ބޮޑު ހަރަކާތެއް ހިންގައިދީފައެވެ.

މި ޝޯވ ޑައިރެކްޓްކޮށް އަދި ހުށަހަޅައިދެނީ މަޝްހޫރު ފިލްމީތަރި އަލީ ސީޒަންއާއި، ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމެވެ.

މި ޝޯވ އިން އެއްވަނައަށް އަންނަ ޓީމަކަށް ގްރޭންޑް ޕްރައިޒް ގޮތުގައި ޖީއެން ސައިކަލަކާއި، ސްކޫޕީ ސައިކަލެއް ހުށަހަޅާފައިވެއެވެ. ރާއްޖޭގައި މިހާތަނަށް ހެލިކޮޕްޓަރ ބޭނުންކޮށްގެން އުފެއްދި އެންމެ ބޮޑު ރިއަލިޓީ ޝޯވ އަށް ބެލުންތެރިންގެ އާދަޔާ ޚިލާފު ތަރުހީބެއް ދަނީ ލިބެމުންނެވެ.

ސެލެބްރިޓީ ރޭސްއަކީ ސަރވައިވަލް ޝޯވއެއްގެ ގޮތުގައި ރާއްޖޭގައި ކުރިއަށްގެންދާ ފުރަތަމަ ޝޯވ އެވެ. ދ. އަތޮޅުގެ 11 ފަޅު ރަށެއްގައި ޝޫޓުކޮށްފައިވާ މި ޝޯވ އިން ރާއްޖޭގެ މަޝްހޫރު ފިލްމީ ފަންނާނުންގެ އާދަޔާ ޚިލާފު މޮޅު ހުނަރުތަކެއް ދަނީ ފެންނަމުންނެވެ. މިގޮތުން ފިލްމީ ދާއިރާގެ ދުވަސްވީ ފަންނާނުންނާއެކު، މިފަހުން އާންމުންގެ މެދުގައި ބޮޑު މަގުބޫލުކަމެއް ހޯދާފައިވާ ޓިކްޓޮކް ތަރިންވެސް ހިމެނެއެވެ.