ސެލެބްރިޓީ ރޭސްގެ ފުރަތަ ޝޯ މިރޭ 11:00 ގައި

މިއަހަރުގެ ރަމަޟާންމަހަށް ހާއްސަކޮށް ރާއްޖެޓީވީން ގެނެސްދޭ ހާއްސަ ޕްރޮގްރާމް، "ޕްރިސްޓަރ އޮއިލް ސެލެބްރިޓީ ރޭސް"ގެ ފުރަތަމަ އެޕިސޯޑް މިރޭ 11:00 ގައި ގެނެސްދޭނެއެވެ.

ޕްރިސްޓަރ އޮއިލް ސެލެބްރިޓީ ރޭހުގައި މަޝްހޫރު 8 ފިލްމީ ތަރިން ފެނިގެންދާނެއެވެ. މި ޝޯ ހުށަހަޅައިދޭނީ ރާއްޖޭގެ ފިލްމީ އިންޑަސްޓްރީއަށް އިންގިލާބީ ބަދަލެއް ގެނައި މަޝްހޫރު ފިލްމީތަރި އަލީ ސީޒަނެވެ. މި ޝޯ ހުށަހަޅައިދިނުމުގައި ސީޒަނާއެކު ބައިވެރިވާނީ ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރް ސަލީމެވެ. މި ޝޯ ގެނެސްދޭނީ ކޮންމެ ބުރާސްފަތި ދުވަހެއްގެ ރެއެވެ.

މި ޝޯގައި ބައިވެރިވާ ފަންނާނުންނަކީ، މުހައްމަދު މަނިކު، ޖުމާ، ޝެރާ، ނާޝިދާ މުހައްމަދު (ނާއްކޮ)، އަހްމަދު އީސާ (އާނަންދު)، ޖާދުﷲ، ޝިފާ އަދި އާޝާއެވެ.

ރާއްޖެޓީވީގެ ޑެޕިއުޓީ ސީއޯއޯ ނާޒްމީ ސައީދު ވިދާޅުވީ، ޕްރިސްޓަރ އޮއިލް ސެލެބްރިޓީ ރޭސްއަކީ ރާއްޖޭގެ މީޑިއާއަކުން މިހާތަނަށް ގެނެސްދޭނެ އެންމެ ވަރުގަދަ ޝޯކަމަށެވެ. އަދި މި ޝޯގައި ބައިވެރިވި ފަންނާނުންނަށް ނާޒްމީ ވަނީ މަރުހަބާ ދަންނަވާފައެވެ.

މި ޝޯ ހުށަހަޅައިދޭ އަލީ ސީޒަން ބުނީ މި ޝޯއަކީ މިހާތަނަށް ރާއްޖޭގައި އުފައްދާފައި ނެތް ގޮތަކަށް އުފައްދާ ޝޯވއެއް ކަމަށާއި، މި ޝޯ ހޯސްޓު ކުރުމަށް ބޭނުންވީ ރާއްޖެ ޓީވީއާއި އެސް ޕްރޮޑަކްޝަން ގުޅިގެން އުފައްދާ ޝޯވއަކަށްވުމުން ކަމަށެވެ. މިއީ ޗެލެންޖިންގ ޝޯވއެއްކަމަށާއި، މިއީ ރާއްޖޭގެ ޓީވީ ޗެނަލަކުން އުފައްދާ އެންމެ މަސައްކަތް ބުރަ ޝޯވއަށް ވެގެންދާނެ ކަމަށްވެސް ސީޒަން ބުންޏެވެ. މި ޝޯވއާއިމެދު ވަރަށް ބޮޑު އުންމީދެއް އެބައޮތް ކަމަށް ސީޒަން ވަނީ ބުނެފައެވެ.

މި ޝޯގައި ބައިވެރިވާ ފަންނާނުން ބުނީ މިޝޯވއާއިމެދު ކުރެވޭ އުންމީދު ވަރަށް ބޮޑު ކަމަށާއި، މިއީ އައު ތަޖުރިބާއެއް ކަމަށެވެ. އަދި ޕްރިސްޓަރ އޮއިލް ސެލެބްރިޓީ ރޭސް ކާމިޔާބު ކުރުމަށް ކެތް މަދުވެފައިވާ ކަމަށް ފަންނާނުން ވަނީ ބުނެފައެވެ.

ޕްރިސްޓަރ އޮއިލްގެ ހޮސްޓް އަދި ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯރޑިނޭޝަން އާމިރް ސަލީމް ވިދާޅުވީ ޕްރިސްޓަރ އޮއިލް ސެލެބްރިޓީ ރޭސް މި ޝޯއަކީ ރޯދަމަހު ދެއްކުމަށް ރާއްޖެ ޓީވީން އެސް ޕްރޮޑަކްޝަންސް އާއި ގުޅިގެން އުފައްދާ ރިއަލިޓީ ޝޯއެއް ކަމަށާއި، މި ޝޯގެ ޝޫޓިންގތައް ކުރިޔަށް ގެންގޮސްފައި ވަނީ 11 ފަޅު ރަށެއްގައި ކަމަށެވެ. އަދި މި ޝޯ ކުރިޔަށްދާނީ ސަވައިވަލް ޝޯއެއްގެ ގޮތުގައިކަމަށް އާމިރް ވިދާޅުވިއެވެ. އާމިރް އިތުރަށް ވިދާޅުވީ މި ޝޯވއަކީ މި ކޮންސެޕްޓަށް އުފައްދާ ފުރަތަމަ ޝޯ ކަމަށާއި އެހެންކަމުން މި ޝޯ ބެލުންތެރިންނަށް ކަމުދާނެ ކަމަށް އުންމީދު ކުރާ ކަމަށެވެ. މީގެ އިތުރުން އާމިރް ވަނީ ރާއްޖެޓީވީގެ ނަމުގައި މި ޝޯގެ ސްޕޮންސަރުންނަށް ޝުކުރުއަދާ ކުރައްވާފައެވެ.

މި ޝޯގެ ޓައިޓަލް ސްޕޮންސަރަކީ މެރިން ޕަވަރގެ ޕްރިސްޓޯ އޮއިލްއެވެ. ކޯ ސްޕޮންސަރުންނަކީ އޫރިދޫ މޯލްޑިވްސް، ސީގިޔަރ، ސުޒުކީ މޮޓޯ ސައިކަލް އަދި މިފްކޯގެ ފަސްމީރެވެ. ޕްރިންޓިންގ ޕާޓްނަރަކީ އެމްސެވަން ޕްރިންޓެވެ. އަދި އެސޯސިއޭޓިވް ޕާޓްނަރަކީ އެސް ޕްރޮޑަކްޝަންއެވެ.