"ޓައުޓޭ" ދުރަށް ދިޔައަސް، ރާއްޖޭގެ މަތީގައި ބާރުގަދަ އައު ކޮޅިގަނޑެއް އުފެދުމުގެ ނުރައްކާ ބޮޑުވަނީ
"ޓައުޓޭ" މިވަގުތު ހުރީ ހއ. ތުރާކުނުގެ އުތުރުން ގާތްގަނޑަކަށް 400 މޭލު ދުރުގައި
ރާއްޖޭގެ ހުރިހާ ހިސާބަކަށް މިހާރުދަނީ ވިއްސާރަކުރަމުން
ރާއްޖޭގެ ހުޅަނގު އުތުރުން، އިރުދެކުނު އަރަބިކަނޑުގައި އުފެދިފައިވާ ތޫފާން "ޓައުޓޭ" ރާއްޖެއާއި ދުރަށް ދަތުރުކުރަމުންދާއިރު، ރާއްޖޭގެ ދެކުނުގައި ބާރުގަދަ ކޮޅިގަނޑެއް އުފެދުމުގެ ނުރައްކާ ބޮޑުވަމުންދާކަމަށް މޫސުމާބެހޭ ގައުމީ އިދާރާއިން ބުނެފިއެވެ.
މޫސުމާއި ގުޅޭ އެންމެފަހުގެ މައުލޫމާތު ހިއްސާކުރައްވަމުން މޫސުމާބެހޭ ގައުމީ އިދާރާގެ އެސިސްޓެންޓް މީޓިރޮލޮޖިސްޓް ހުސައިން ވަހީދު ވަނީ ރާއްޖޭގެ ހުޅަނގު އުތުރުން، އިރުދެކުނު އަރަބިކަނޑުގައި އުފެދިފައިވާ ތޫފާން "ޓައުޓޭ"ގެ ސަބަބުން ރާއްޖޭގެ ސަރަހައްދަށް މިހާރު ކުރަމުންދާ އަސަރު ހޮނިހިރު ދުވަހުގެ ރެއިން ފެށިގެން ކުޑަވާނެކަމަށް ވިދާޅުވެފައެވެ. ވަހީދު ވިދާޅުވީ ތޫފާން "ޓައުޓޭ" މިވަގުތު ހުރީ ހއ. ތުރާކުނުގެ އުތުރުން ގާތްގަނޑަކަށް 400 މޭލު ދުރުގައި ކަމަށެވެ. "ޓައުޓޭ" ރާއްޖެއާއި ދުރަށް ދަތުރުކުރަމުންދާއިރު ތޫފާނުގެ ނުސީދާ އަސަރު ކުރިއަށް އޮތް ދެތިން ދުވަހެއް ވަންދެން ކުރަމުންދާނެ ކަމަށް ވިދާޅުވިއެވެ. ހަމައެޔާއެކު ރާއްޖޭގެ ދެކުނުން އައްޑޫ ސިޓީ ސަރަހައްދުގައި ބާރުގަދަ ކޮޅިގަނޑެއް އުފެދުމުގެ ނުރައްކާ ބޮޑުވަމުން އަންނަކަމަށް ވެސް ވަހީދު ވިދާޅުވިއެވެ.
ހުޅަނގު މޫސުމުގެ ވިއްސާރަ އިތުރަށް ގޯސްވާނެކަމަށް ލަފާކޮށްފައިވާއިރު، ކުރިއަށް އޮތް ދެ ތިން ދުވަހުވެސް ވިއްސާރަކޮށް މޫސުން ގޯސްވާނެކަމަށް މޫސުމާބެހޭ އިދާރާއިން ވަނީ ލަފާކޮށްފައެވެ. އަދި ދެތިން ދުވަހަށްފަހު ވިއްސާރަ ކޮންމެވެސް ވަރަކަށް އަލިވިނަމަވެސް ވައިގެ ބާރުމިން މަޑުނުވެ ގަދަވާނެކަމަށް ވަނީ ލަފާކޮށްފައެވެ. މި ސަބަބައްޓަކައި ކަނޑުތައް ގަދަވާނެކަމަށް ލަފާކުރެވޭއިރު، ދަތުރު ނުކުރެވޭވަރަށް ކަނޑު ގަދަވާނެކަމަށް ވެސް ހުސައިން ވަހީދު ވިދާޅުވިއެވެ. ދިޔަވަރު ބޮޑުވާ ވަގުތުތަކުގައި އުދައެރުން އެކަށީގެންވާތީ އެކަމަށް ސަމާލުވުމަށާއި، ޒަރޫރީ ދަތުރެއް ނޫނީ ނުކުރުމަށް އޭނާ ވަނީ އިލުތިމާސްކުރައްވާފައެވެ.
ރާއްޖޭގެ ހުޅަނގު އުތުރުން، އިރުދެކުނު އަރަބިކަނޑުގައި އުފެދިފައިވާ ތޫފާން "ޓައުޓޭ" ރާއްޖެއާއި ދުރަށް ދަތުރުކުރަމުންދާއިރު، މި ތޫފާނުގެ ބާރު އިތުރުވަމުންދާކަމަށް ވަނީ މައުލޫމާތު ލިބިފައެވެ. މިއީ މި ސަރަހައްދުގައި މިއަހަރު އުފެދުނު ފުރަތަމަ ތޫފާނެވެ. މި ތޫފާނުގެ އަސަރު އެންމެ ބޮޑަށް ކުރާނެކަމަށް ބެލެވެނީ އިންޑިޔާގެ ހުޅަނގު ބިތުގެ ސަރަހައްދަށާއި ޕާކިސްތާނަށް ކަމަށް ބައިނަލްއަގްވާމީ މީޓިއޮރޮލޮޖިސްޓުން ވަނީ ލަފާ ކޮށްފައެވެ.
ކޮޅިގަނޑު ބާރުގަދަ ތޫފާނާކަށް ބަދަލުވެގެންދާން ދިމާވާ މައިގަނޑު ސަބަބަކީ މިސަރަހައްދުގެ ތިމާވެށީގެ ހާލަތެވެ. ކަނޑުގެ ފިނި ހޫނުމިނަށް ބަލާއިރު މިސަރަހައްދުގެ ކަނޑުގެ ފަށަލައަކީ މިވަގުތު މުޅި ދުނިޔޭގައިވެސް އެންމެ ހޫނުމިން މަތި ފަށަލައެވެ. މިސަރަހައްދުގެ ހޫނުމިން ހުރީ 30 އާއި 32 ޑިގްރީ ސެލްސިއަސްގައެވެ.
ތޫފާންތައް ބާރުގަދަކުރުމަށް ބޭނުންވަނީ ހޫނުމިން މަތި ފެނެވެ. އާންމު ގޮތެއްގައި 26.5 ޑިގްރީ ސެލްސިއަސްއަށްވުރެ ހޫނުމިން މަތި ނަމަ ތޫފާނެއް އުފެދުމުގެ ފުރުސަތު ފަހިވެއެވެ. ވައިގެ ބާރުމިން ކުއްލިއަކަށް އިތުރުވެގެންދަނީ ހޫނުވެފައިވާ ކަނޑުގެ ފަށަލައިގެ ސަބަބުންނެވެ.
