ޕެންޑިންގް ސާމްޕަލްތަކާއެކު އަންގާރަ ދުވަހު 1501 މީހަކު ޕޮޒިޓިވް
މާލެ ސަރަހައްދުން 1229، އަތޮޅުތެރޭގެ ރަށްތަކުން 265 އަދި ހިންގަމުންދާ ރިސޯޓުތަކުން 07 މީހަކު ޕޮޒިޓިވްވެފައިވޭ
މާލެސިޓީ، ބަލި ކޮންޓްރޯލް ކުރުމަށް ކުރިއަށް އޮތްތަނުގައި ވެސް ގިނަ ފިޔަވަޅުތަކެއް އަޅާނެ ކަމަށް އެޗްޕީއޭއިން މައުލޫމާތުދޭ
ޕެންޑިންގް ސާމްޕަލްތަކާއެކު އަންގާރަ ދުވަހު 1501 މީހަކު ޕޮޒިޓިވްވެފައިވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އަންގާރަ ދުވަހުގެ ރޭ ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވިދާޅުވީ އަންގާރަ ދުވަހު ރަޖިސްޓަރީ ކުރެވިފައިވާ ޖުމްލަ ކޭސްތަކުގެ އަދަދަކީ 1501 ކަމަށެވެ. އޭގެ ތެރެއިން މާލެ ސަރަހައްދުން 1229 މީހުން، އަތޮޅުތެރޭގެ ރަށްތަކުން 265 މީހަކު އަދި ހިންގަމުންދާ ރިސޯޓުތަކުން 07 މީހަކު ޕޮޒިޓިވްވެފައިވާ ކަމަށް މަބްރޫކް ވިދާޅުވިއެވެ.
މީގެ އިތުރުން މަބްރޫކް ވިދާޅުވީ ހޯމަ ދުވަހުގެ އިރުއޮއްސި 6:00ން އަންގާރަ ދުވަހުގެ އިރުއޮއްސި 6:00ށް 662 މީހަކު ޕޮޒިޓިވްވެފައިވާ ކަމަށެވެ. އަދި ފާއިތުވި 24 ގަޑިއިރުގެ ތެރޭގައި 6208 ސާމްޕަލެއް ނަގާފައިވެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކަށް ބަލާއިރު 247 މީހަކު ހޮސްޕިޓަލްގައި ދަނީ ފަރުވާ ދެމުންނެވެ. އަދި އެކްޓިވް ކޭސްތަކުގެ ޖުމްލަ އަދަދު ވަނީ 11،629ށް އަރާފައެވެ.
މިހާތަނަށް ރާއްޖެއިން 38،520 މީހަކު ވަނީ ޕޮޒިޓިވްވެފައިވާއިރު، ބަލިން ރަނގަޅުވެފައިވަނީ 26،795 މީހެކެވެ.
ރާއްޖެއަށް ކުރިމަތިވި ކޮވިޑް-19ގެ ހަތަރު ވަނަ ރާޅާއެކު، ކޮންމެ ދުވަހަކު ވެސް ދަނީ ގިނަ ބަޔަކު ޕޮޒިޓިވްމުންނެވެ. ކޮންޓްރޯލް ކުރުމަށް ގިނަ ފިޔަވަޅުތައް އަޅަމުންދާއިރު، ކާފިއުގެ ވަގުތަށް މިހާރު ވަނީ ބަދަލު ގެނެސްފައެވެ. އެގޮތުން މިމަހުގެ 12ވާ ބުދަ ދުވަހުގެ ހަވީރު 4:00ން ފަތިހު 4:00ށް ކާފިއު ހިންގުމަށް ނިންމާފައިވެއެވެ. މީގެ އިތުރުން މިސްކިތްތަކުގައި ޖަމާއަތުގައި ނަމާދުކުރުން ހުއްޓާލުމަށް ވެސް އަންގާފައިވެއެވެ. ކާބޯތަކެތީގެ ޚިދުމަތްދޭ ތަންތަނުގެ އެތެރޭގައި ތިބެގެން ކެއިން ބުއިމުގެ ޚިދުމަތް ދިނުން ހުއްޓާލުމަށް ވެސް އަންގާފައިވެއެވެ. ނަމަވެސް ފުލުހުންގެ ޚާއްސަ ހުއްދައިގެ ދަށުން ޑެލިވަރީގެ ޚިދުމަށް ކުރިއަށް ގެންދެވޭނެ ކަމަށް އެޗްޕީއޭއިން ބުނެއެވެ. ޑެލިވަރީގެ ޚިދުމަތް ދިނުމަށް ނިންމާފައި ވަނީ ކޮންމެ ދުވަހެއްގެ ވެސް މެންދަމު 12 އާ ހަމައަށެވެ.
