ބަޔާން މިއުނިކުން ޖަރުމަން ލީގުގެ ޗެމްޕިއަންކަން ޖެހިޖެހިގެން ނުވަވަނަ ފަހަރަށް ހޯދައިފިއެވެ.

ބަޔާނަށް ލީގު ޗެމްޕިއަންކަން ކަށަވަރުވީ ހޮނިހިރު ދުވަހުގެރޭ ބޮރޫޝިއާ ޑޯޓްމުންޑް އަތުން ދެވަނައިގައި އާރްބީ ލައިޕްޒީގް 3-2 ގެ ނަތީޖާއަކުން ބަލިވުމާ ގުޅިގެންނެވެ. އަދި އޭގެ ފަހުން ހޮނިހިރު ދުވަހުގެރޭ ކުޅުނު މެޗުން ބަޔާނުން ވަނީ ބޮރޫޝިއާ މޮންޗެންގްލަޑްބަކް އަތުން 6-0 ގެ ތަފާތު ބޮޑު ނަތީޖާއަކުން މޮޅުވެފައެވެ.

ބާކީ ދެ މެޗު އޮއްވައި ބަޔާނުން ލީގު ކަށަވަރުކުރީ ކުޅުނު 32 މެޗުން 74 ޕޮއިންޓް ހޯދައިގެންނެވެ. ދެވަނައިގައި އޮތް ލައިޕްޒީގަށް 32 މެޗުން ލިބިފައިވަނީ 64 ޕޮއިންޓެވެ. އެހެންކަމުން ބަޔާން އެއްވަނައިގައި އޮތީ 10 ޕޮއިންޓުގެ ލީޑަކާއެކުއެވެ.

އަމިއްލަ ދަނޑުގައި ކުޅުނު މެޗުގައި ބަޔާނުން މޮޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ހަތަރު ލަނޑުގެ ލީޑެއް ނަގާފައެވެ. މި ލަނޑުތައް ބަޔާނަށް ކާމިޔާބުކޮށްދިނީ ދެ ލަނޑު ޖެހި ރޮބަޓް ލެވަންޑޯސްކީ އާއި ތޯމަސް މުލާ އަދި ކިންގްސްލީ ކޯމަނެވެ. އަދި މެޗުގެ ދެވަނަ ހާފުގައި ލިބުނު ޕެނަލްޓީއަކުން ލެވަންޑޯސްކީ ވަނީ އިތުރު ލަނޑެއް ޖަހައި، މެޗުގައި ހެޓްރިކް ހަދާފައެވެ. ދެން މި ހާފުގައި ބަޔާނުން ޖެހި އަނެއް ލަނޑު ކާމިޔާބުކޮށްދިނީ ލެރޯއި ސާނޭއެވެ. މި މެޗުގައި ބަޔާނުން ތަފާތު މޮޅު ކުޅުމެއް ދެއްކި ނަމަވެސް، އެ ތީމުން މެޗު ނިންމާލީ އެއް ކުޅުންތެރިއަކު މަދުކޮށެވެ. އެއީ ދެވަނަ ހާފުގައި އެ ޓީމުގެ ޓަންގީ ނިއާންޒޯއަށް ސީދާ ރަތް ކާޑެއް ދެއްކުމާ ގުޅިގެންނެވެ.

މޮންޗެންގްލަޑްބަކާ ދެކޮޅަށް ކުޅުނު މެޗުގައި ލެވަންޑޯސްކީ ހެޓްރިކް ހެދިއިރު، މިއީ މި ސީޒަނުގެ ލީގުގައި އޭނާ ކާމިޔާބުކުރި 39 ވަނަ ލަނޑެވެ. އެއާއެކު ޖަރުމަނު ލީގުގެ އެއް ސީޒަނެއްގައި އެންމެ ގިނަ ލަނޑު ޖަހައިގެން ގާޑް މުލާ ހަދާފައިވާ ރިކޯޑާ ހަމަކުރަން ލެވަންޑޯސްކީއަށް ދެން އޮތް ދެ މެޗުން ބޭނުންވަނީ އެންމެ ލަނޑެކެވެ.

ޖެހިޖެހިގެން ނުވަވަނަ ފަހަރަށް ޖަރުމަން ލީގުގެ ޗެމްޕިއަންކަން ބަޔާން ހޯދިއިރު، އެޓީމުން މިހާރު ވަނީ ލީގު ޗެމްޕިއަންކަން ޖުމްލަ 30 ފަހަރު ހޯދާފައެވެ. ބަޔާނަކީ ޖަރުމަން ލީގުގެ އެންމެ ކާމިޔާބު ޓީމެވެ.

މީގެ އިތުރުން ޖަރުމަން ލީގުގެ ޗެމްޕިއަންކަން ޖެހިޖެހިގެން ނުވަވަނަ ފަހަރަށް ހޯދައި ބަޔާނުން ވަނީ އިޓަލީގެ ޔުވެންޓަސްއިން ގާއިމުކޮށްފައިވާ ޔޫރަޕުގެ ރިކޯޑަކާ ހަމަކޮށްފައެވެ. ޔޫރަޕުގެ ބޮޑު ފަސް ލީގުގެ ތެރެއިން ޖެހިޖެހިގެން ނުވަ ފަަހަރު ލީގުގެ ޗެމްޕިއަންކަން ހޯދުމުގެ ރިކޯޑު މީގެ ކުރިން އޮތީ ޔުވެންޓަސް އަތުގައި އެކަންޏެވެ. ބަޔާނަކީ އެ ރެކޯޑް ގާއިމުކުރި ދެވަނަ ޓީމެވެ.