ޑޮކްޓަރުން ހޯދުމަށް އިންޑިއާގައި ކޮށްފައިވާ އިއުލާނަކީ ކޮވިޑް-19ން ބޭރުން ވެފައިވާ އެއްބަސްވުމެއްގެ ދަށުން ކޮށްފައިވާ އިއުލާނެއް
9 މެއި 2021 | އާދީއްތަ 02:24ވޮލަންޓިއަރ ކުރަން ހުޅުވާލާފައި ވަނީ އެގޮތަށް ބޭނުންވާ ބައެއް ޑޮކްޓަރުން ތިބުމުން
ރައީސް އޮފީހުގެ ތަރުޖަމާން މަބްރޫކް އަޒީޒް
ރާއްޖޭގައި މަސައްކަތްކުރާނެ ޑޮކްޓަރުން ހޯދުމަށް އިންޑިއާގެ ނޫހެއްގަގައި ކޮށްފައިވާ އިއުލާނަކީ ކޮވިޑް-19 ހާލަތުން ބޭރުން ހެލްތު މިނިސްޓްރީއާ އެ ގައުމާ ދެމެދު ވެފައިވާ އެއްބަސްވުމެއްގެ ދަށުން ކޮށްފައިވާ އިއުލާނެއް ކަމަށް ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.
ރާއްޖޭގައި ކޮވިޑް-19ގެ ހާލަތާ ގުޅިގެން ދިވެހި ޑޮކްޓަރުންނަށް ވޮލަންޓިއަރ ކުރުމުގެ ފުރުސަތު ހުޅުވާލާފައިވާއިރު، އިންޑިއާގެ ނޫހެއްގައި ރާއްޖޭގައި މަސައްކަތްކުރާނެ ޑޮކްޓަރުން ހޯދުމަށް ކޮށްފައިވާ އިއުލާނަކާާ ގުޅިގެން ސޯޝަލް މީޑިއާގައި އާންމުކޮށް ކަންބޮޑުވުން ފާޅުކޮށްފައިވެއެވެ. އަދި އެއީ ދިވެހި ޑޮކްޓަރުންނަށް ދޭ ދެރައެއް ކަމަށާއި، ދިވެހި ޑޮކްޓަރުންނަށް ފުރުސަތު ގެއްލުވާލުން ކަމަށް ބުނެ ކަންބޮޑުވުންފާޅުކޮށްފައިވެއެވެ.
ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި، އެކަމާ ގުޅިގެން މަބްރޫކް ވިދާޅުވީ އެ އިއުލާނަކީ މި އަހަރުގެ މާޗް 15ގައި ކޮވިޑް-19އިން ބޭރުން އާންމުކޮށް ކުރިއަށްގެންދާ ހޮސްޕިޓަލް އޮޕަރޭޝަންތަކަށް ހެލްތު މިނިސްޓްރީން ހަދާފައިވާ އެގްރީމަންޓަކާ ގުޅިގެން ކޮށްފައިވާ އިއުލާނެއް ކަމަށެވެ. މަބްރޫކް ވިދާޅުވީ އެއި އެއްވެސް ވަރަކަށް ކޮވިޑް-19އާ ގުޅިގެން ކުރާ މަސައްކަތްތަކާ ގުޅުންހުރި ކަމެއް ނޫން ކަމަށެވެ.
އޭނާ ވިދާޅުވީ އެގޮތަށް އިއުލާންކޮށްފައި ވަނީ އެ ސްލޮޓްތަކަށް ދިވެހި ޑޮކްޓަރުން ހޯދަން މަސައްކަތްކުރުމަށް ފަހުގައި ކަމަށެވެ. އެގޮތުން ފެބްރުއަރީ 3ވަނަ ދުވަހުން ފެށިގެން ދިވެހި ޑޮކްޓަރުން ހޯދުމަށް މަސައްކަތްކޮށް ލިބުނު ޑޮކްޓަރުންނަށް ވަޒީފާ ވެސް ދީފައިވާނެ ކަމަށާއި، އިންޑިއާއިން ޑޮކްޓަރުން އެ ހޯދަނީ ބާކީ ހުރި ސްލޮޓްތަކަށް ކަމަށް ވިދާޅުވިއެވެ. އަދި މިހާރު ވެސް ދިވެހި ޑޮކްޓަރުންނަށް ވަޒީފާ ދިނުމުގެ މަސައްކަތްކުރަމުން އަންނަ ކަމަށް ވިދާޅުވިއެވެ.
މަބްރޫކް ވިދާޅުވީ ކޮވިޑް-19އާ ގުޅިގެން ޑޮކްޓަރުން އިތުރުކުރުމަށް ކުރާ މަސައްކަތުގައި ވޮލަންޓިއަރ ކުރަން ހުޅުވާލާފައި ވަނީ އެގޮތަށް ބޭނުންވާ ބައެއް ޑޮކްޓަރުން ތިބުމުން ކަމަށެވެ. އެގޮތުން އެކި ތަންތަނުގައި ދާއިމީ ވަޒީފާގައި ތިބެ އިތުރު ވަގުތުތަކުގައި ވޮލަންޓިއަރ ކުރަން ބޭނުންވާ ޑޮކްޓަރުން އެބަތިބި ކަމަށާއި، ބޭނުމަކީ އެފަދަ ޑޮކްޓަރުންނަށް އެ ފުރުސަތު ހުޅުވާދިނުން ކަމަށް މަބްރޫކް ވިދާޅުވިއެވެ.
ކޮވިޑް-19ގެ ހާލަތާ ގުޅިގެން ރެސްޕޮންސް ޓީމްތަކުގައި މަސައްކަތްކުރުމަށް، އެންމެ ފުރަތަމަ ރާއްޖެއިން ކޮވިޑް-19 ފެނި ތައްޔާރުވަމުން ދިޔަ އިރު ވެސް ވޮލަންޓިއަރކުރުމުގެ ފުރުސަތު ހުޅުވާލާފައިވެއެވެ. އަދި އޭރު ރާއްޖެއިން ބޭރުގައި ތިބި މެޑިކަލް ސްޓޫޑަންޓުން ވެސް ރާއްޖެ އައިސް ވޮލަންޓިއަރކޮށްދީފައިވެއެވެ.
