މާލެ ސަރަހައްދުގައި ގާއިމް ކޮށްފައިވާ ކޮވިޑް-19ށް ޓެސްޓު ކުރުމަށް ސާމްޕަލް ނަގާ ސެންޓަރުތަކުން ސާމްޕަލް ނަގައިދޭ ގަޑިތަކަށް ބަދަލު ގެނަސްފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ބުނެފިއެވެ.

އެޗްޕީއޭއިން ބުނީ މާލޭ ސާމްޕަލް ކަލެކްޝަން ސެންޓަރުން ސާމްޕަލް ނެގޭނީ ބުރާސްފަތި ދުވަހުން ހޮނިހިރު ދުވަހަށް ހެނދުނު 10:00ން މެންދުރު 01:00ށް ކަމަށެވެ. އަދި މެންދުރު ފަހު 03:30ން ހަވީރު 05:15ށް ސާމްޕަލް ނެގޭއިރު ރޭގަނޑު 07:30ން 09:00ށް ސާމްޕަލް ނެގުމަށް ވަނީ ނިންމާފައެވެ. މި ސެންޓަރުން ހުކުރު ދުވަހު ސާމްޕަލް ނަގައިދޭނީ މެންދުރު ފަހު 03:30ން ހަވީރު 05:15ށް އަދި ރޭގަނޑު 07:30ން 09:00ށެވެ.

ހުޅުމާލޭގައި ހުންނަ ފްލޫ ކްލިނިކުން ސާމްޕަލް ނަގައިދިނުމަށް ހަމަޖެހިފައިވަނީ ކޮންމެ ދުވަހެއްގެ ވެސް މެންދުރު ފަހު 03:30ން ހަވީރު 05:15ށް އަދި ރޭގަނޑު 07:30ން 09:00ށެވެ. މީގެ އިތުރުން ވިލިމާލެ ފްލޫ ކްލިނިކުން ކޮންމެ ދުވަހެއްގެ ވެސް މެންދުރު 03:00ން 04:30ށް ސާމްޕަލް ނެގުމަށް ވަނީ ހަމަޖެހިފައެވެ.

ރާއްޖެއަށް ކޮވިޑް-19ގެ ހަތަރު ވަނަ ރާޅެއް އަރާފައިވާއިރު މެއި މަސް ފެށުނު ފަހުން ދުވާލެއްގެ މައްޗަށް ރާއްޖޭގައި ކޮވިޑް ޖެހޭ މީހުންގެ އަދަދު އަންނަނީ ރިކޯޑް މިންވަރަކަށް އިތުރުވަމުންނެވެ. އެގޮތުން މެއި މަހުގެ 1 ވަނަ ދުވަހު 402 މީހުން ބައްޔަށް ޕޮޒިޓިވްވިއިރު މެއި މަހުގެ 2 ވަނަ ދުވަހު އެއަދަދު ހުރީ 508 ގައެވެ. މެއި މަހުގެ 3 ވަނަ ދުވަހު 585 މީހުންނަށް ކޮވިޑް ޖެހުނުއިރު މެއި މަހުގެ 4 ވަނަ ދުވަހު އެއަދަދު ވަނީ 601ށް އަރާފައެވެ.

މެއި މަހުގެ 5 ވަނަ ދުވަހު 734 މީހުންނަށް ކޮވިޑް ޖެހިގެން ރިޕޯޓްކުރިއިރު މެއި މަހުގެ 6 ވަނަ ދުވަހު 703 މީހުންނަށް ވަނީ ކޮވިޑް ޖެހިފައެވެ. މެއި މަހުގެ 7 ވަނަ ދުވަހު 766 މީހުންނަށް ވަނީ ކޮވިޑް ޖެހިގެން ރިޕޯޓްކޮށްފައެވެ.

މިއަދަދުތައް މައްޗަށް ގޮސް ރާއްޖޭގެ ހާލަތު ގޯސްވަމުންދާއިރު ކިތަންމެ ކުޑަނަމަވެސް އަލާމާތެއް ފެނިއްޖެ ނަމަ ސާމްޕަލް ނަގައި ޓެސްޓު ކުރުމަށް ސިއްހީ ޚިދުމަތްތެރިން ދަނީ ތަކުރާރުކޮށް އިލްތިމާސް ކުރަމުންނެވެ،