އިމަރޖެންސީ ހާލަތުގައި ބޭނުން ކުރަން ޗައިނާގެ ވެކްސިނަށް ހުއްދަ ދީފި
މި ވެކްސިނަކީ 79 އިންސައްތަ ކާމިޔާބު ވެކްސިނެއް
ސިނޮފަރމް ކޮވިޑް ވެކްސިން
އިމަރޖެންސީ ހާލަތުގައި ބޭނުން ކުރަން ޗައިނާގެ ސިނޮފަރމް ވެކްސިނަށް ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން ހުއްދަ ދީފިއެވެ.
ޑަބްލިއުއެޗްއޯއިން ސިނޮފަރމް ވެކްސިނަށް ހުއްދަ ދިންއިރު ދުނިޔޭގެ އެކި ކަންކޮޅުތަކުން މިލިއަނަކަށް ވުރެ ގިނަ މީހުން ވަނީ މި ވެކްސިން ޖަހާފައެވެ.
ޑަބްލިއުއެޗްއޯއިން މިހާތަނަށް އިމަރޖެންސީ ހާލަތުގައި ބޭނުން ކުރުމަށް ހުއްދަ ދީފައިވަނީ ފައިޒާ ވެކްސިނާއި އެސްޓްރަޒެކެނާ ވެކްސިނާއި ޖޯންސަން އެންޑް ޖޯންސަން ވެކްސިންގެ އިތުރުން މޮޑާނާ ވެކްސިނަށެވެ.
ޗައިނާގެ ސިނޮފަރމް ވެކްސިނަށް ވެސް މި ހުއްދަ ދިންއިރު މީގެ ކުރިން ދުނިޔޭގެ އެކި ގައުމުތަކުން ވަނީ މި ވެކްސިން ބޭނުން ކުރުމުގެ ހުއްދަ ދީފައެވެ. އޭގެ ތެރޭގައި އެފްރިކާއާ ލެޓިން އެމެރިކާގެ ގައުމުތަކުގެ އިތުރުން އޭޝިއާގެ ގައުމުތައް ވެސް ހިމެނެއެވެ.
ޑަބްލިއުއެޗްއޯއިން ހުކުރު ދުވަހު ނެރުނު ބަޔާނެއްގައި ބުނީ ޗައިނާގެ ސިނޮފަރމް ވެކްސިނަކީ ރައްކާތެރި ވެކްސިނެއް ކަމަށް ތަހުލީލުތަކުން ދައްކާ ކަމަށެވެ. މި ތަހުލީލު ތަކުން ކޮވިޑާއި ދެކޮޅަށް ވެކްސިން މަސައްކަތް ކުރާކަން ހާމަވާކަމަށް ޑަބްލިއުއެޗްއޯއިން ބުނެއެވެ.
ރިޕޯޓްތައް ބުނާ ގޮތުން ސިނޮފަރމް ވެކްސިނަކީ 79 އިންސައްތަ ކާމިޔާބު ވެކްސިނެކެވެ. މި ވެކްސިނަކީ ތިން ހަފުތާގެ ދުރުމިނުގައި ދެ ޑޯޒް ޖެހޭ ވެކްސިނެކެވެ.
