ބޭރުގެ މާހިރުން ބޭނުންކޮށްގެން ޙަމަލާގެ ތަހުޤީޤު ކުރިއަށް ގެންދަން ފެނޭ: އަސްލަމް
މި ޙަމަލާއާ ގުޅިގެން މަޖިލީހުގެ ކުއްލި ޖަލްސާއެއް ވެސް ފަށާފައިވޭ
މަޖިލީހުގެ 241 ކޮމިޓީގެ މުޤައްރިރު މުޙައްމަދު އަސްލަމް މަޖިލީހުގެ ރައީސް ނަޝީދާއެކު
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އަމާޒުކޮށް ދިން ޙަމަލާއާ ގުޅޭ ތަހުގީގަށް ބޭރުގެ މާހިރުންގެ އެހީ ހޯދަން ފެންނަކަމަށް ރައްޔިތުންގެ މަޖިލީހުގެ 241 ކޮމިޓީން ބުނެފިއެވެ.
މި ޙަމަލާއާ ގުޅިގެން ބުރާސްފަތި ދުވަހުގެރޭ ވަނީ ކޮމިޓީގެ ސިއްރު ބައްދަލުވުމެއް ކުރިއަށް ގެންގޮސްފައެވެ. މި ބައްދަލުވުމާއި ގުޅޭ މައުލޫމާތު ރާއްޖެއެމްވީއަށް ދެއްވަމުން މަޖިލީހުގެ 241 ކޮމިޓީގެ މުޤައްރިރު ހިތަދޫ އުތުރު ދާއިރާގެ މެމްބަރ މުޙައްމަދު އަސްލަމް ވިދާޅުވީ، މި މައްސަލަ ސީރިއަސް މައްސަލައެއްގެ ގޮތުގައި ބެލުމަށް ފުލުހުންނަށް ހުށައަޅަން ނިންމާފައިވާ ކަމަށެވެ. އަދި ބޭރުގެ ތަޖުރިބާކާރުން ބޭނުންކޮށްގެން ތަހުޤީޤު ކުރިއަށް ގެންދިއުމަށް ފެންނަކަމަށް ވެސް ވިދާޅުވިއެވެ. އަސްލަމް ވިދާޅުވީ، މިއީ ކޮމިޓީގެ ހުރިހާ މެމްބަރުންވެސް ހަރުކަށި އިބާރާތުން ކުށްވެރިކުރާ އަމަލެއް ކަމަށެވެ.
މިފަދަ މައްސަލަތައް ތަކުރާރުވިޔަ ނުދިނުމަށް ޚާއްސަ ސަމާލުކަން ދޭންޖެހޭކަން ފާހަގަ ކުރައްވައި އަސްލަމް ވިދާޅުވީ، ސަރުކާރުންވެސް އެކަމަށްޓަކައި ގިނަ މަސައްކަތްތަކެއް ކުރަމުންދާ ކަމަށެވެ. އަދި މިފަދަ ޙަމަލާތަކާއި ގުޅިގެން އެކަންކަމުގައި ހިމެނޭ މީހުންނަށް ޤާނޫނީ ގޮތުން އަދަބު ނުދެވި ދިއުމުގެ ކަންބޮޑުވުން އަސްލަމް ފާހަގަ ކުރެއްވިއެވެ.
އޭގެ އިތުރުން، މި ޙާލަތުގައި ހުރިހާ ސިޔާސީ ޕާޓީންވެސް ގުޅިގެން މަސައްކަތް ކުރަމުންދާ މަންޒަރު ފެންނަމުންދާކަމަށް އަސްލަމް ވިދާޅުވިއެވެ.
މި ޙަމަލާއާ ގުޅިގެން މަޖިލީހުގެ ކުއްލި ޖަލްސާއެއް ވެސް ފަށާފައިވާއިރު، ވަކި ގޮތެއް ނިމެންދެން ޖަލްސާ ކުރިއަށްދާނެ ކަމަށް މަޖިލީހުގެ ނާއިބްރައީސް އީވާ އަބްދުﷲ ވިދާޅުވެފައިވެއެވެ.
