ބުރާސްފަތި ދުވަހު 703 މީހުން ކޮވިޑަށް ޕޮޒިޓިވް ވެއްޖެ
މާލެ ސަރަހައްދުން 526 މީހުން ވަނީ ޕޮޒިޓިވްވެފައި
މާލޭގެ މަގުމަތީގައި މީހުން ދުއްވަން ނުކުމެ އުޅެނިކޮށް
ފާއިތުވެދިޔަ 24 ގަޑިއިރުގެ ތެރޭގައި 703 މީހުން ކޮވިޑަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން އެންމެ ފަހުން ނެރުނު ތަފާސްހިސާބުތަކަށް ބަލާއިރު ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން 3،574 މީހުން ކޮވިޑަށް ޓެސްޓު ކޮށްފައިވާއިރު، އޭގެ ތެރެއިން 703 މީހުން ވަނީ ބައްޔަށް ޕޮޒިޓިވްވެފައެވެ. އަދި އޭގެ ތެރެއިން 526 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. އަތޮޅު ތެރެއިން 167 މީހަކު ޕޮޒިޓިވްވެފައިވާއިރު، ސިނާއީ ރަށްރަށުން 3 މީހަކު ވަނީ ޕޮޒިޓިވްވެފައެވެ.
އިތުރު 703 މީހުން ކޮވިޑަށް ޕޮޒިޓިވްވުމާއިއެކު ރާއްޖެއިން ޕޮޒިޓިވްވި މީހުންގެ އަދަދު މިވަނީ 33،368 ށް އަރާފައެވެ. އަދި އެކްޓިވް ކޭސްތަކުގެ އަދަދު 7،607ށް އަރާފައިވާއިރު، ހޮސްޕިޓަލްގައި އެޑްމިޓްކޮށްގެން 203 މީހަކަށް އަންނަނީ ފަރުވާ ދެމުންނެވެ. މީގެ އިތުރުން މި ބަލިން 25،675 މީހުން ފަސޭހަވެފައިވާއިރު، 77 މީހަކު ވަނީ ނިޔާވެފައެވެ.
ރާއްޖޭގެ ކޭސްތަކުގެ އަދަދު މިހާ މައްޗަށް ގޮސްފައިވާއިރު، ރާއްޖޭގައި އިންޑިއާގައި ފެތުރެމުންދާ ކޮވިޑް-19 ވޭރިއަންޓް އުޅުން އެކަށީގެންވާ ކަމަށް އެޗްޕީއޭއިން ބުނެފައިވެއެވެ. އޭގެ ސަބަބުން ރާއްޖެ އަންނަ އެންމެން ވެސް ވަކި ފިޔަވަޅުތަކެއްގެ ތެރެއިން ރާއްޖެ އެތެރެވެވޭ ގޮތަށް ހަރުކަށި ފިޔަވަޅުތަކެއް އަޅާފައިވާއިރު، އެއް ރަށުން އަނެއް ރަށަށް ދަތުރުކުރުން ވެސް ވަނީ މަނާކޮށްފައެވެ.
މާލެ ސަރަހައްދުގައި ވެސް ފިޔަވަޅުތައް ވަރުގަދަކޮށް، ސްކޫލްތަކާއި އޮފީސްތައް ބަންދުކޮށްފައިވާއިރު، ރޭގަނޑު 9ން ފެށިގެން ފަތިހު 4ށް ކާފިއު ވެސް ވަނީ އިއުލާން ކޮށްފައެވެ.
