އިންޑިއާގައި ކޮވިޑް ޖެހުނު މީހުންގެ އަދަދު 20 މިލިއަނުން މައްޗަށް
24 ގަޑިއިރުތެރޭގައި 357،220 މީހުން ކޮވިޑަށް ޕޮޒިޓިވްވެފައިވޭ
އިންޑިއާގެ ހޮސްޕިޓަލެއްގެ އެނދުތައް ފުރިފައި
އިންޑިއާގައި ކޮވިޑް ޖެހުނު މީހުންގެ ޖުމްލަ އަދަދު 20 މިލިއަނަށްވުރެ މަތިވެއްޖެއެވެ.
އަންގާރަ ދުވަހު އިންޑިއާގެ ހެލްތު މިނިސްޓްރީން އާންމުކޮށްފައިވާ ތަފާސް ހިސާބުތަކަށް ބަލާއިރު، 24 ގަޑިއިރުތެރޭގައި 357،220 (ތިންލައްކަ ފަންސާސްހަތްހާސް ދުއިސައްތަވިހި) މީހުން ކޮވިޑަށް ޕޮޒިޓިވްވެފައިވެއެވެ.
ވޭތިވެދިޔަ 24 ގަޑިއިރު ތެރޭގައި އިންޑިއާއިން މި ބަލީގައި 3،449 މީހުން މަރުވެފައިވެއެވެ. އެއާއެކު މި ބަލީގައި މަރުވި މީހުންގެ ޖުމްލަ އަދަދު މި ވަނީ 222،408 އަރާފައެވެ.
އިންޑިއާގައި ކޮވިޑް ޖެހުނު މީހުން 20 މިލިއަނަށް އަރާފައި ވާއިރު، މިއީ އެމެރިކާއަށްފަހު މި އަދަދަށް މީހުން ޕޮޒިޓިވްވި ދެވަނަ ގައުމެވެ. އިންޑިއާއިން ކޮވިޑް ބައްޔަށް ޕޮޒިޓިވްވި މީހުންގެ އަދަދު 10 މިލިއަނަށް އަރާފައި މި ވަނީ، އެ ގައުމުގައި ކޮވިޑް ފެތުރެން ފެށިތާ 10 މަސްދުވަހުގެ ތެރޭގައެވެ. އެއަށްފަހު އިތުރު 10 މިލިއަން މީހުން ޕޮޒިޓިވްވެފައި މިވަނީ އެންމެ ހަތަރު މަސްދުވަހުގެ ތެރޭގައެވެ.
އިންޑިއާގެ ކޮވިޑްގެ ދެވަނަ ރާޅުގެ ސަބަބުން އެގައުމުގެ ސިއްޙީ ނިޒާމުވަނީ އެއްކޮށް ބޮއްސުންލާފައެވެ. އެގޮތުން ގާތްގަނޑަކަށް ހުރިހާ ހޮސްޕިޓަލެއްހެން ފުރި، ހޮސްޕިޓަލުތަކުން އޮކްސިޖަން ލިބުމުގެ ދަތިކަން ވަނީ ވަރަށް ބޮޑަށް ކުރިމަތިވެފައެވެ.
