އޯލެވެލް އައި.ޖީ.ސީ.އެސް.އީ އިމްތިހާނު މާދަމާ ފަށަނީ
1 މެއި 2021 | ހޮނިހިރު 17:52އިމްތިހާނުގައި ބައިވެރިވާ ހުރިހާ ދަރިވަރުންނަށް ހެޔޮ އެދުންތައް ފޮނުވާފައިވޭ
ދަރިވަރުންތަކެއް އިމްތިހާން ހަދަނީ
ކެމްބްރިޖް އޯލެވެލް އައި.ޖީ.ސީ.އެސް.އީ އިމްތިހާނު ހޯމަ ދުވަހު ފަށާނެއެވެ.
އިމްތިހާންގައި ބައިވެރިވާ ހުރިހާ ދަރިވަރުންނަށް އެޑިޔުކޭޝަން މިނިސްޓަރު ޑރ އައިޝަތު އަލީ ވަނީ ހެޔޮ އެދުންތަކާއި ތަހުނިޔާ ފޮނުއްވާފައެވެ.
ދަރިވަރުންނަށް ހިތްވަރު ދެއްވައި މިނިސްޓަރުގެ ހިއްސާކުރެއްވި ޕޯސްޓުގައި ވަނީ ތަކުރާރުކޮށް އިރުޝާދުތަކާއި ސުވާލުތައް ކިޔުމަށް އެދިވަޑައިގެންފައެވެ. ފަސޭހަ ސުވާލުތަކަށް ފުރަތަމަ ޖަވާބު ދިނުމަށް އެދިވަޑައިގެންފައިވާއިރު އެނގޭ މިންވަރެއް އެނގޭގޮތަކަށް ލިޔުމަށް ވަނީ ނަސޭހަތްތެރިވެ ވަޑައިގެންފައެވެ.
މީގެ ކުރިން އެޑިޔުކޭޝަން މިނިސްޓްރީން ހާމަކޮށްފައިވާ ގޮތުގައި މި އިމްތިހާނުގައި ރާއްޖޭގެ 1529 ކުދިން ބައިވެރިވާނެއެވެ.
ރާއްޖޭގައި ކޮންމެ އަހަރަކު އޮކްޓޯބަރު އަދި ނޮވެމްބަރު މަހު ބާއްވާ އޯލެވެލް އިމްތިހާނު ކޮވިޑް-19 އާ ގުޅިގެން ފަސްކުރިކަމުގައި ވީނަމަވެސް މެދުނުކެނޑި ކިޔެވުން ކުރިޔަށް ގެންދިޔައެވެ. ޚާއްސަ ގޮތެއްގައި އޯލެވެލްގައި ބައިވެރިވާ ދަރިވަރުންނަށް ސްކޫލުތަކުގައި އިތުރު ގަޑިތައް ކުރިއަށް ގެންދިއުމުގެ އިތުރުން އޮންލައިންކޮށް ވެސް ކްލާސްތައް ކުރިއަށް ގެންގޮސްފައިވެއެވެ.
