އަންނަ މަހުގެ 3ން ފެށިގެން ރާއްޖެ އާދެވޭނީ 96 ގަޑިއިރު ނުވާ ނެގެޓިވް ޕިސީއާރް ޓެސްޓެއް ހިފައިގެން ކަމަށް ކަނޑައަޅައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ނެރުނު ނޫސްބަޔާނެއްގައި ބުނީ އަންނަ މަހު 3ން ފެށިގެން ރާއްޖެ އަންނަ ފަތުރުވެރިންނާއި ކޮވިޑް-19 ވެކްސިން ޑޯޒުތައް ފުރިހަމަކޮށްފައިވާ މީހުން ވެސް ހިމެނޭގޮތުން ރާއްޖެ އަންނަ އެންމެން ވެސް 96 ގަޑިއިރު ހަމަ ނުވާ ޕީސީއާރު ޓެސްޓެއް ހުށަހަޅަން ޖެހޭނެ ކަމަށެވެ. އެކަމަކު އެއް އަހަރުން ދަށުގެ ކުޑަކުދިން އިސްތިސްނާ ވާނެ ކަމަށް ބަޔާނުގައި ވެއެވެ.

ބަޔާނުގައި ބުނީ އެގޮތަށް އަންގާފައި އޮތަސް ހާއްސަ ހާލަތުގެ ދަށުން ޑިރެކްޓަރ ޖެނެރަލް މައިމޫނާ އަބޫބަކުރު އަންގާ ގޮތެއްގެ މަތިން އަމަލުކުރެވޭނެ ކަމަށެވެ. އަދި އެކަން ތަންފީޒުކުރުމުގައި ވަގުތާއި ހާލަތަށް ރިއާޔަތްކޮށް ފިޔަވަޅު އެޅުތައް ފުލުހުންންނާއި ކަމާބެހޭ އެހެން މުއައްސާސަތަކުން އަޅާނެ ކަމަށެވެ.

އެޗްޕީއޭއިން މިގޮތަށް އަންގާފައި މިވަނީ އަވައްޓެރި އިންޑިއާގައި ކޮވިޑް-19ގެ ހާލަތު ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ. އެގައުމުން ކޮންމެ ދުވަހަކު ވެސް ތިން ލައްކައަށް ވުރެ ގިނަ މީހުން ކޮވިޑް-19ށް ޕޮޒިޓިވްވެ ރިޕޯޓުކުރަމުން އަންނައިރު އެ ގައުމަކީ ރާއްޖެއަށް އެންމެ ގިނަ ފަތުރުވެރިން އަންނަ ގައުމުތަކުގެ ލިސްޓުގެ ކުރީގައި ހިމެނޭ ގައުމެކެވެ. މީގެ އިތުރަށް ބޭސް ފަރުވާއަށާއި އެހެނިހެން ބޭނުންތަކަށް ވެސް ދިވެހިން އެންމެ ގިނައިސް ގޮސް އުޅޭ ގައުމެވެ.

ރާއްޖެއިން ރިޕޯޓުކުރާ ކޭސްތަކުގެ އަދަދުތައް ވެސް ކޮންމެ ދުވަހެއްގެ މައްޗަށް 300ށް ވުރެ ވެސް މައްޗަށް އަރަމުންދާއިރު، ރާއްޖޭގައި އިންޑިއާގައި ފެތުރެމުންދާ ކޮވިޑް-19ގެ ވޭރިއަންޓް އުޅުން އެކަށީގެންވާ ކަމަށް ވެސް އެޗްޕީއޭއިން ބުނެފައިވެއެވެ. ކޮވިޑް-19 ކޭސްތަކުގެ އަދަދުތައް މިހާ މައްޗަށް ގޮސްފައިވާއިރު ވެސް މާލެ ތެރޭގައި އަދި އަތޮޅުތެރޭގައި ވެސް މީހުން އަމަލުކުރަން ޖެހޭ ގޮތްތަކަށް އެޗްޕީއޭއިން ވަކި ހަރުކަށި ބަދަލުތަކެއް އަދި ގެނެސްފައެއް ނުވެއެވެ.

މިހާރު ރާއްޖޭގައި ކޭސްތައް ރިޕޯޓުކުރާ އަދަދަށް ބަލާއިރު މިއީ ރާއްޖެއިން ކޮވިޑް-19 ފެތުރެންފެށި ފަހުން އެންމެ ގިނައިން ކޭސްތައް ރިޕޯޓްކުރަމުން އަންނަ ދުވަސްވަރެވެ.