ޕޮޒިޓިވް ވުމުގެ އައު ރިކޯޑެއް، މިފަހަރު 465 ކޭސް!
30 އެޕްރީލު 2021 | ހުކުރު 18:08146 މީހަކު ދަނީ ހޮސްޕިޓަލުގައި ފަރުވާ ހޯދަމުން
ރޭގަނޑު މާލޭގެ މަގުމަތި
ހުކުރު ދުވަހު ރާއްޖެއިން 465ށް މީހުން ކޮވިޑް 19 އަށް ޕޮޒިޓިވްވެފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އާންމު ކުރި ތަފާސްހިސާބުތައް ދައްކާގޮތުން ބުރާސްފަތި ދުވަހުގެ އިރުއޮއްސި 06:00ން ހުކުރު ދުވަހުގެ އިރުއޮއްސި 06:00ށް 3،305 ސާމްޕަލް ވަނީ ނަގާފައެވެ. މިވަގުތު އެކްޓިވް ކޭސްތަކުގެ އަދަދު 4978ށް އަރާފައިވާއިރު 146 މީހަކު ދަނީ ހޮސްޕިޓަލުގައި ފަރުވާ ހޯދަމުންނެވެ.
ރާއްޖެއިން ޖުމްލަ 29835 މީހަަކު ވައިރަސް އަށް ޕޮޒިޓިވްވެފައިވާއިރު 24775 މީހަކު ވަނީ ބަލިން ފަސޭހަވެފައެވެ.
އެންމެ ފަހުން ޕޮޒިޓިވްވި 465 މީހުންގެ ތެރެއިން 193 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. ރަށްރަށުން 242 މީހަކު ވަނީ ޕޮޒިޓިވްވެފައެވެ. ރިސޯޓުތަކުން 25 މީހަކު ޕޮޒިޓިވް ވެފައިވާއިރު 5 މީހަކު ލިވަރބޯޑްތަކުން ޕޮޒިޓިވްވެފައިވެއެވެ.
ރަށްރަށުން 242 މީހަކު ޕޮޒިޓިވް ވެފައިވާއިރު ކ. މާފުށިން 85 ކޭސް، ޅ. ނައިފަރުން 38 ކޭސް އަދި ކ. ހިންމަފުށިން 30 ކޭސް ވަނީ ފެނިފައެވެ. މި ބަލި ޖެހިގެން މިހާތަނަށް ރާއްޖެއިން 73 މީހަކު ވަނީ ނިޔާވެފައެވެ.
މިހާތަނަށް ޖުމްލަ 23 ރަށެއް ވަނީ މޮނިޓަރިންގެ ހާލަތަށް ގެނެސްފައެވެ.
ކޮވިޑް-19ގެ ކޭސްތައް އިތުރުވަމުންދާ މި ދަނޑިވަޅުގައި ބޮޑެތި ލުއިތަކެއް ދީފައިވާތީ ބައެއް ފަރާތްތަކުން ދަނީ ކަންބޮޑުވުން ފާޅުކުރަމުންނެވެ. އަދި ބަލި ކޮންޓްރޯލް ކުރުމަށް އިތުރު ފިޔަވަޅުތައް އެޅުމަށް ވެސް ގޮވާލާފައިވެއެވެ.
މިހާރުގެ ހާލަތަށް ބާލާއިރު ރާއްޖޭގައި އިންޑިއާގެ ވޭރިއަންޓް އުޅެދާނެ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ވަނީ ލަފާކޮށްފައެވެ.
