ހަނގުރާމައިގައި ބައިވެރިވި ދިވެހި އަންހެނަކާއި ދަރިން ރާއްޖެ ގެންނަން މަސައްކަތް ކުރަނީ
30 އެޕްރީލު 2021 | ހުކުރު 17:56ދިވެހި އަންހެނަކާއި ހަތަރު ކުދިން ވަނީ ސީރިޔާއިން ތުރުކީއަށް ގަވާއިދާ ޚިލާފަށް އެތެރެވެފައި
ސީރިޔާއަށް ހަމަލާދިނުމުގައި ހަރަކާތްތެރިވާ ތުރުކީގެ ފައުޖު / ދިވެހި އާއިލާ މިވަގުތު ތިބީ ތުރުކީގެ ފުލުހުންގެ ބެލުމުގެ ދަށުގައި
ސީރިޔާ އާއި އަފްޣާނިސްތާނުގެ ދާޚިލީ ހަނގުރާމައިގައި ބައިވެރިވި ދިވެހި އާއިލާއެއް ތުރުކީން ރާއްޖެއަށް ގެނައުމުގެ މަސައްކަތް ފަށައިފިއެވެ.
ސީރިޔާއިން ތުރުކީ އަށް ގަވާއިދާ ޚިލާފަށް އެތެރެވެގެން އުޅެނިކޮށް އެގައުމުގެ ކަމާބެހޭ ފަރާތްތަކުގެ ބެލުމުގެ ދަށަށް ގެނެސް ދިވެހި ސަރުކާރަށް އެކަން އެންގުމާ ގުޅިގެން އެމީހުން ރާއްޖެއަށް ގެނައުމުގެ މަސައްކަތް ކުރަމުން އަންނަ ކަމަށް ދިވެހި ފުލުހުން ވެސް ވަނީ ބުނެފައެވެ.
ފުލުހުން ނެރުނު ބަޔާނެއްގައި ބުނީ އެ މައްސަލަ ތަހުގީގުކޮށް އެ އާއިލާއަށް ނިސްބަތްވާ ކުޑަކުދިންގެ ރަށްވެހިކަމާއި ދަތުރުފަތުރާ ގުޅުންހުރި ލިޔުންތަކާއި އެ މީހުން އަނބުރާ ދިވެހިރާއްޖެއަށް ގެނައުމަށް ހަމަޖައްސަންޖެހޭ އިދާރީ އިންތިޒާމުތައް ހަމަޖެއްސުމުގެ މަސައްކަތް ކުރަމުންދާ ކަމަށެވެ. އެކަމަށްޓަކައި ދިވެހި ފުލުހުންގެ ޓީމެއް ތުރުކީގެ ކަމާބެހޭ ފަރާތްތަކާ ގުޅިގެން ހަރަކާތްތެރި ވަމުން އަންނަ ކަމަށެވެ.
އެމީހުންގެ އެއްވެސް ރަސްމީ ލިޔެކިއުމެއް ނެތުމުން އޭގެ ތެރެއިން ދިވެހިރާއްޖޭގެ ރަށްވެހިކަން އޮތް ބަޔަކަށް ދަތުރުފަތުރު ކުރުމަށް ބޭނުންވާ ލިޔުންތައް ތައްޔާރު ކުރުމުގެ މަސައްކަތް މިހާރު ކުރަމުން އަންނަ ކަމަށްވެސް ފުލުހުން ބުންޏެވެ.
ފުލުހުން ބުނީ އެ އަންހެން މީހާއަށް ލިބިފައިވާ ހަތަރު ދަރިންނަކީ އަފްޣާނިސްތާނާއި ސީރިއާގެ ހަނގުރާމައިގައި އުޅުނު ދިވެހި ދެ ފިރިހެނަކަށް ލިބިފައިވާ ހަތަރު ދަރިން ކަމަށެވެ. އޭގެ ތެރެއިން ހަގު ދެ ކުދިންނަކީ އަފްޣާނިސްތާނާއި ސީރިޔާގައި އުޅެނިކޮށް ލިބިފައިވާ ދެ ކުދިން ކަމަށް އެމީހާ ބުނެފައިވާ ކަމަށެވެ. އެހެންވެ އެ ދެ ކުދިންނަކީ ދިވެހި އަންހެން މީހާގެ ދަރިންކަން ކަށަވަރު ކުރުމަށްޓަކައި މަސައްކަތް ކުރަމުން އަންނަ ކަމަށް ވެސް ބުނެފައިވެއެވެ.
އަދި އެ ކުދިންގެ ރަށްވެހިކަމާއި ރެޖިސްޓްރޭޝަނާއި ގުޅޭ ކަންކަން ހަމަޖެއްސުމަށްޓަކައި ދައުލަތުގެ ކަމާބެހޭ ފަރާތްތަކާ މަޝްވަރާކޮށް ގާނޫނީ ހައްލެއް ހޯދުމަށް މަސައްކަތް ކުރަމުން އަންނަ ކަމަށް ވެސް ބުންޏެވެ.
ފުލުހުން ބުނީ އެ އާއިލާއަށް ހަނގުރާމައިގެ ސަރަހައްދުގައި ބިރުވެރި ތަޖުރިބާތަކެއް ކުރަން ޖެހިފައިވާތީ ނަފުސާނީ ގޮތުންނާއި ސިއްހީގޮތުން ވެސް ނޭދެވޭ އަސަރުތަކެއް ކޮށްފައިވާ ކަމަށެވެ.
އެމީހުން ރާއްޖެ ގެނެސް ހަރުދަނާ ނިޒާމެއްގެ ތެރެއިން ރިހިބިލިޓޭޓްކޮށް އަނބުރާ މުޖުތަމައަށް ގެނައުމުގެ އިންތިޒާމްތައް މިނިސްޓްރީ އޮފް ހޯމް އެފެއާޒްގެ ދަށުން ހިންގާ ނޭޝަނަލް ރިއިންޓެގްރޭޝަން ސެންޓަރާ ގުޅިގެން ހަމަޖެއްސުމުގެ މަސައްކަތް ކުރަމުން އަންނަ ކަމަށްވެސް ބުނެފައިވެއެވެ.
އަދި އެމީހުންގެ މައްސަލަ ބަލައި އަޅަންޖެހޭ ގާނޫނީ ފިޔަވަޅުތައް އަޅާނެ ކަމަށް ވެސް ފުލުހުން ވަނީ ބުނެފައެވެ.
